ஆல்யா பட் :
பாலிவுட் மட்டுமல்லாது ஒட்டுமொத்த சினிமா துறையிலும் ஏராளமான ரசிகர்களை கொண்டவர் நடிகை ஆல்யா பட் . நெப்போட்டிசம் என்னும் வாரிசு நடிகை பட்டியலில் ஆல்யா இடம்பெற்றிருந்தாலும் , அதனை தகர்க்க வேண்டும் என்பதற்காக கடுமையாக உழைக்கிறார் என்பதையும் நம்மால் மறுக்க முடியாது. ஆல்யா பட் தற்போது தயாரிப்பாளராகவும் களமிறங்கியிருக்கிறார். சமீபத்தில் அவரது நடிப்பில் நெட்ஃபிளிக்ஸில் வெளியான டார்லிங்ஸ் என்னும் திரைப்படத்தை ஆல்யாவும் , ஷாருக்கானும் இணைந்து தயாரித்திருந்தனர். பாலிவுட்டில் மூன்று தலைமுறைகளாக கோலோச்சும் கபூர் வீட்டு மருகள் ஆல்யா. ரன்பீர் கபூரை சில மாதங்களுக்கு முன்னதாக திருமணம் செய்துக்கொண்டவர் தற்போது கர்ப்பிணியாக உள்ளார் .
முதல் சம்பளம் :
பாலிவுட் ரசிகர்களால் நெப்போட்டிசம் குரு என விமர்சனம் செய்யப்படுபவர் கரண் ஜோகர். இவரது ஆதரவு முழுக்க வாரிசு நடிகர்களுக்குதான் என்பதை கங்கனா ரனாவத் போன்ற சில நடிகைகள் வெளிப்படையாகவே பகிர்ந்திருக்கின்றனர். இவரது இயக்கத்தில் அறிமுகமானவர்தான் ஆல்யா பட் . 2012 ஆம் ஆண்டு வெளியான ஸ்டூடண்ட் ஆஃப் தி இயர் திரைப்படத்தில் கல்லூரிப் பெண்ணான ஷனாயாவாக வலம் வந்தார் . அறிமுக படமான அந்த படத்தில் நடித்ததற்கு ஆல்யாவிற்கு 15 லட்சம் ரூபாய் சம்பளமாக கிடைத்திருக்கிறது. முதல் படத்திலேயே இவ்வளவு சம்பளம் வாங்கிய நடிகை ஆலியாவாகத்தான் இருப்பாரோ என்னவோ !
”பேங்க்ல எவ்வளவும் காசு இருக்குனு தெரியாது “
முதல் படத்தின் காசோலையை வாங்கிய ஆல்யா , நேரடியாக அதனை தனது அம்மா சோனி ரஸ்தானிடம் கொடுத்து , இதுதான் என் முதல் பட சம்பளம் இதனை வைத்துக்கொண்டு , நீங்களே எல்லாவற்றையும் பார்த்துக்கொள்ளுங்கள் என்றாராம் . இன்றுவரையில் தனக்கு வங்கியில் எவ்வளவு பணம் இருக்கிறது என்றே தெரியாது என்னும் ஆல்யா , நிச்சயமாக நிறைய பணம் இருக்கும். என்னுடையை டீம் எப்போதுமே என்னை கொஞ்சம் கணக்கு வழக்கையும் பாருங்கனு சொல்லுவாங்க. எனக்குன்னு குழந்தை வரப்போகுது நான் அதுலயும் கொஞ்சம் கவனம் செலுத்தணும்னு நினைக்குறேன் “ என்றார்.