எஸ்.ஜே.சூர்யா, ப்ரியா பவானி ஷங்கர் நடித்துள்ள ‘பொம்மை’ படத்தின் ட்ரெய்லர் வெளியாகியுள்ளது.
மாநாடு, டான் படங்களின் பிரம்மாண்ட வெற்றிக்கு பிறகு எஸ்.ஜே.சூர்யா நடிப்பில் வெளியாக இருக்கும் திரைப்படம் பொம்மை. தமிழில் மொழி, பயணம், காற்றின் மொழி உள்ளிட்ட படங்களை இயக்கிய ராதா மோகன் இந்தப்படத்தை இயக்கி இருக்கிறார். யுவன்ஷங்கர் ராஜா இசையமைத்துள்ள இந்தப்படத்தில் கதாநாயகியாக ப்ரியா பவானி ஷங்கர் நடித்துள்ளார். இந்தப் படம் குறித்து முன்னதாக பேசியிருந்த எஸ்.ஜே.சூர்யா இந்தப் படம் தனது சினிமா வாழ்கையில் மிக முக்கியமான படமாக இருக்கும் என்று கூறியிருந்தார்.
‘வாலி’ படத்தின் மூலம் திரையுலத்திற்கு இயக்குநராக அறிமுகமானவர் எஸ்.ஜே.சூர்யா. தொடர்ந்து குஷி படத்தை இயக்கிய அவர், நியூ, அன்பே ஆருயிரே படங்களை இயக்கியது மட்டுமல்லாமல் அதில் நடிக்கவும் செய்தார். தொடர்ந்து சில படங்களில் நடித்த அவர், அதன் பின்னர் சிறிய இடைவெளி எடுத்துக்கொண்டு ‘இசை’ என்கிற படத்தை தயாரித்து, இயக்கி, நடித்து, இசையும் அமைத்து இருந்தார். அதன் பின்னர் முழுக்க முழுக்க நடிப்பில் இறங்கிய எஸ்.ஜே.சூர்யா ‘இறைவி’ படத்தில் பிரமாதமாக நடித்திருந்தார்.
அதனைத் தொடர்ந்து வந்த ஸ்பைடர் படத்தில் வில்லனாக மிரட்டிய அவர் தொடர்ந்து விஜய் நடிப்பில் வெளியான மெர்சல் படத்திலும் வில்லனாக நடித்து அசத்தினார். இதனையடுத்து மீண்டும் கதாநாயகன் பாதைக்கு வந்த எஸ்.ஜே.சூர்யா மான்ஸ்டர், நெஞ்சம் மறப்பதில்லை உள்ளிட்ட படங்களில் நடித்து கவனம் ஈர்த்தார். மிரட்டிய எஸ்.ஜே.சூர்யா பின்னர் மீண்டும் மாநாடு படத்தில் வில்லனாக களமிறங்கினார். அதில் அவரது நடிப்பு பெரிய அளவில் பாராட்டை பெற்றது.
மீண்டும் இயக்கம்
இந்த நிலையில் தற்போது 7 ஆண்டுகளுக்கு பிறகு மீண்டும் ஒரு படத்தை இயக்க இருப்பதாகவும் தகவல் வெளியானது. இந்தப்படம் காரை மையப்படுத்தி எடுக்கப்பட உள்ளதாகவும் இதற்காக ஜெர்மனியில் கார் ஒன்றை வாங்க இருப்பதாகவும் சொல்லப்பட்டது.