பிக்பாஸ் தமிழ் 5 நிகழ்ச்சியை அடுத்து பிக்பாஸ் அல்டிமேட் என்ற புதிய நிகழ்ச்சி ஆரம்பிக்கப்பட்டது. பிக் பாஸ் நிகழ்ச்சியின் ஐந்து சீசன்களையும், பிக் பாஸ் அல்டிமேட் நிகழ்ச்சியையும் கமல்ஹாசன் தொகுத்து வழங்கி வருகிறார். இடையே, அவருக்கு கொரோனா பாதிப்பு ஏற்பட்டிருந்தபோது மட்டும் ரம்யாகிருஷ்ணன் தொகுத்து வழங்கினார். இந்நிலையில், அடுத்தடுத்து படங்களில் நடிக்க இருப்பதால், பிக் பாஸ் அல்டிமேட் நிகழ்ச்சியில் இருந்து கமல் விலக இருப்பதாக தகவல் வெளியாகியுள்ளது. 


இந்தியன் 2, விக்ரம் ஆகிய படங்களுக்கான படபிடிப்பு நடக்க உள்ளதால், கமலுக்கு பதில் வேறு பிரபலம் நிகழ்ச்சியைத் தொகுத்து வழங்குவார் என செய்திகள் வெளியாகியுள்ளது. இந்நிலையில், பிக் பாஸ் அல்டிமேட் நிகழ்ச்சியை இனி சிம்பு தொகுத்து வழங்குவார் என தகவல் வெளியாகியுள்ளது. 






கமலுக்கு பதில் வேறு ஒரு நடிகர் பிக் பாஸ் நிகழ்ச்சியைத் தொகுத்து வழங்க இருக்கிறார் போன்ற தகவல்கள் பரவுவது இது முதல் முறை அல்ல. இந்நிலையில், பிக் பாஸ் அல்டிமேட் நிகழ்ச்சியை கமலுக்கு பதில் தொகுத்து வழங்க இருப்பது யார் என்பதில் எதிர்ப்பார்ப்பு அதிகரித்துள்ளது. 


பிக் பாஸ் சீசன் 5-ல் சிறப்பு விருந்தினராக வீட்டினுள் சென்ற சரத்குமார், போட்டியாளர்களுடன் கலந்துரையாடினார். இதனால், கமலுக்கு பதில் அவர் இந்த நிகழ்ச்சியை தொடர்ந்து நடத்துவார் என்ற தகவல் கிடைத்துள்ளது. சரத்குமாருக்கு டிவி நிகழ்ச்சிகள் தொகுத்து வழங்குவதில் அனுபவம் வாய்ந்தவர். எனவே, கமலுக்கு பதில் அவர் எண்ட்ரி தர வாய்ப்பிருக்கிறது.


இதே போல, கமலுக்கு கொரோனா பாதிப்பு ஏற்பட்டிருந்தபோது ரம்யாகிருஷ்ணன் தொகுத்து வழங்கினார். இதனால், அவரது பெயரும் சொல்லப்படுகிறது. 



கோலிவுட்டின் சிறந்த நடிகர்களின் ஒருவரான பிரகாஷ் ராஜ், சின்னத்திரையை பொறுத்தவரை ’நீங்களும் வெல்லலாம் ஒரு கோடி’ நிகழ்ச்சியை தொகுத்து வழங்கி இருக்கிறார். இதனால், கமலுக்கு பதில் அவர் தொகுத்து வழங்கலாம் என தெரிவிக்கப்படுகிறது.


பிக் பாஸ் தமிழ் சீசன் அறிமுகமானபோது, கமலுக்கு முன் அரவிந்த் சாமியை தொகுப்பாளராக ஒப்பந்தம் செய்ய தயாரிப்பு நிறுவனம் திட்டமிட்டிருந்தது. ஆனால், சில காரணங்களுக்காக அவர் விலகி கொண்டார். இறுதியில், கமல் ஒப்பந்தம் செய்யப்பட்டார். இதனால், கமல் விலக இருக்கும் தருணத்தில் மீண்டும் அரவிந்த் சாமியிடம் பேச்சுவார்த்தை நடத்த தயாரிப்பு குழு திட்டமிட்டுள்ளதாக தெரிவிக்கப்பட்டுள்ளது.


சிம்பு பிக் பாஸ் நிகழ்ச்சியை தொகுத்து வழங்குவார் என கிளம்பிய புரளிதான் இந்த தகவல்கள் சமூக வலைதளத்தை ஆக்கிரமிக்க காரணம். கமலுக்கு பதில் அவர்தான் நிகழ்ச்சியை தொகுத்து வழங்குவார் என்றும், நாளை ப்ரொமோ வெளியாகும் எனவும் தகவல் கிடைத்துள்ளது. எனினும், இது குறித்து பிக் பாஸ் தயாரிப்பு நிறுவனமோ, சிம்புவோ அதிகாரப்பூர்வ அறிவிப்பை வெளியிடவில்லை. 



மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்


ABP நாடு செய்திகளை சமூக வலைத்தள பக்கங்களிலும் பின் தொடரலாம்


பேஸ்புக் பக்கத்தில் தொடர


ட்விட்டர் பக்கத்தில் தொடர


யூடிபில் வீடியோக்களை காண