தமிழ் திரையுலகின் பிரபல நடிகராக உலா வருபவர் சிவகார்த்தகேயன். இவரது நடிப்பில் நீண்ட நாட்களாக படப்பிடிப்பில் இருந்த படம் அயலான். பல முறை பட வெளியீடு தள்ளிப்போன நிலையில், இன்று அயலான் திரைப்படத்தின் டீசர் வெளியானது.
அயலான் டீசர்:
நேற்று இன்று நாளை என்ற படத்தில் கால இயந்திர கதைக்களத்தில் அசத்தலாக ஹிட் கொடுத்த இயக்குனர் ரவிக்குமாரின் இந்த படத்தை இயக்கியுள்ளார். இந்த கதை ஏற்கனவே இயக்குனர் ஏலியன்கள் கதைக்களத்தை கொண்டது என்று ரசிகர்களுக்கு தெரியும். தற்போது வெளியாகியுள்ள டீசரில் இடம்பெற்றுள்ள காட்சிகள் ரசிகர்கள் மிகவும் ரசிக்கும் வகையில் காட்டப்பட்டுள்ளது.
குறிப்பாக, படத்தில் இடம்பெற்றுள்ள வேற்றுக்கிரகவாசிகளான ஏலியன்கள் தொடர்பாக கிராபிக்ஸ் காட்சிகள் ஹாலிவுட் படத்திற்கு நிகராக காட்சிகள் வடிவமைக்கப்பட்டுள்ளது. வேற்று கிரகத்தில் இருந்து பூமிக்கு வந்த வேற்றுக்கிரக வாசியான ஏலியன் ஒன்று தமிழ்நாட்டில் வசித்து வரும் சிவகார்த்திகேயன் மற்றும் அவரது நண்பர்களை சந்திப்பதும், அவரது நண்பர்களுடன் ஏலியனுக்கும் நிகழும் நிகழ்வுகளுமே கதைக்களமாக அமைந்துள்ளது என்பதை டீசர் காட்டுகிறது.
சிவகார்த்திகேயன் ரசிகர்கள் மகிழ்ச்சி:
ஏலியன் கதைக்களத்துடன் கிராபிக்ஸ் காட்சிகள், சிவகார்த்திகேயனுக்கே உரித்தான நகைச்சுவை, யோகிபாபு காமெடி கூட்டணியுடன் படம் உருவாகியுள்ளதால் இந்த படத்தின் மீது மிகுந்த எதிர்பார்ப்பு ஏற்பட்டுள்ளது. இந்த படத்திற்கு இசையமைப்பாளர் ஏ.ஆர்.ரஹ்மான் இசையமைத்துள்ளார். இந்த படத்தில் சிவகார்த்திகேயனுக்கு ஜோடியாக ரகுல்ப்ரீத் சிங் நடித்துள்ளார்.
இந்த படத்திற்கு நீரவ்ஷா ஒளிப்பதிவு செய்துள்ளார். அன்பறிவு சண்டைப்பயிற்சி காட்சிகளை உருவாக்கியுள்ளனர். கே.ஜே. ஆர். ஸ்டூடியோஸ் இந்த படத்தை வெளியிட உள்ள நிலையில், இந்த படத்தை 24 ஏ.எம்.ஸ்டூடியோஸ் நிறுவனம் சார்பில் கே.ராஜா தயாரித்துள்ளார். நீண்டநாட்களாக படப்பிடிப்பிலே இருந்த அயலான் படத்தின் டீசர் தற்போது வெளியாகி இருப்பது சிவகார்த்திகேயன் ரசிகர்கள் மத்தியில் பெரும் மகிழ்ச்சியை ஏற்படுத்தியுள்ளது.
பொங்கல் பண்டிகைக்கு அயலான் திரைப்படம் வெளியாக இருப்பதாக படக்குழு அறிவித்துள்ளது. பொங்கல் பண்டிகையின்போது தொடர் விடுமுறை வரும் என்பதால் வசூலை வாரிக்குவிக்க படக்குழு திட்டமிட்டுள்ளது.