ஆர்.ஆர்.ஆர் படத்தில் இடம் பெற்ற நாட்டு நாட்டு பாடலுக்கு கோல்டன் குளோப் விருது வழங்கப்பட்டதையடுத்து, அந்த படக்குழுவினருக்கு ஏ.ஆர் ரஹ்மான் வாழ்த்து தெரிவித்துள்ளார்
கடந்தாண்டு மார்ச் 22 ஆம் தேதி பிரமாண்ட இயக்குநர் ராஜமௌலி இயக்கத்தில் ஆர்.ஆர்.ஆர். படம் வெளியாகி சூப்பர் ஹிட்டானது. இந்த படத்தில் ராம்சரண், ஜூனியர் என்.டி.ஆர்., அஜய் தேவ்கன், ஆலியா பட், ஸ்ரேயா, சமுத்திரக்கனி உள்ளிட்ட பலரும் நடித்திருந்த நிலையில் கீரவாணி இசையமைத்திருந்தார். இதனிடையே ஆஸ்கர் விருதுக்கு அடுத்தபடியாக உள்ள கோல்டன் குளோப் விருதுக்கான நாமினேஷன் பட்டியலில் இரண்டு பிரிவுகளில் ஆர்.ஆர்.ஆர் படம் இடம் பெற்றிருந்தது.
இவ்விழாவில் இயக்குநர் ராஜமௌலி, நடிகர்கள் ராம் சரண், ஜூனியர் என்.டி.ஆர்., இசையமைப்பாளர் கீரவாணி ஆகியோர் கலந்து கொண்டு விருதைப் பெற்றுக்கொண்டனர்.
ஏ.ஆர். ரஹ்மானின் வாழ்த்து
ஸ்லம்டாக் மில்லியனயர் படத்திற்காக இசையமைத்த ஏ.ஆர்.ரஹ்மான், சிறந்த மூல பாடல் மற்றும் சிறந்த இசையமைப்பிற்காக இரண்டு ஆஸ்கார் விருதுகளை பெற்றுள்ளார். ஆஸ்கார் விருதை பெற்ற முதல் இந்தியன் என்ற பெருமையையும் புகழையும் இன்றும் தாங்கி வருகிறார்.
தற்போது, இசையமைப்பாளர் ஏ.ஆர்.ரஹ்மான், அவரது ட்விட்டர் பக்கத்தில் வாழ்த்துக்களை தெரிவித்துள்ளார். அந்த பதிவில், “இது நம்பமுடியாத முன்மாதிரியான மாற்றம். கீரவாணி காருவிற்கு இந்திய ரசிகர்கள் சார்பாக வாழ்த்துக்கள்.ஆர்.ஆர்.ஆர் படக்குழுவிற்கும் ராஜமெளலி காருவிற்கும் எனது வாழ்த்துக்களை தெரிவித்து கொள்கிறேன்.” என்று ஏ.ஆர்.ஆர் பதிவிட்டுள்ளார்.
ஆஸ்கர் விருது கிடைக்குமா?
அகாடமி அவார்ட்ஸ் என அழைக்கப்படும் ஆஸ்கர் விருது விழாவின் 95வது நிகழ்வு வரும் மார்ச் மாதம் 12 ஆம் தேதி நடைபெறுகிறது.
இதில் ஆர்.ஆர்.ஆர். படம், சிறந்த இயக்குநர் (ராஜமெளலி), சிறந்த நடிகர் (ஜூனியர் என்.டிஆர், ராம் சரண்), சிறந்த துணை நடிகர்(அஜய் தேவ்கன்), சிறந்த பாடல் ( நாட்டு நாட்டு), சிறந்த பின்னணி இசை (கீரவாணி), சிறந்த படத்தொப்பாளர் (ஸ்ரீகர் பிரசாத்), சிறந்த ஒலி அமைப்பு (ரகுநாத் கெமிசெட்டி, போலோ குமார் டோலாய், ராகுல் கர்பே), சிறந்த திரைக்கதை ( விஜயேந்திர பிரசாத், ராஜமெளலி, சாய் மாதவ்), சிறந்த துணை நடிகை ( ஆலியா பட்), சிறந்த ஒளிப்பதிவு ( செந்தில் குமார்), சிறந்த தயாரிப்பு வடிவமைப்பு (சாபு சிரில்), சிறந்த ஆடை அமைப்பாளர் ( ராம ராஜமெளலி), சிறந்த சிகை அலங்காரம் மற்றும் ஒப்பனையாளர் (நல்ல ஸ்ரீனு, சேனாபதி ), சிறந்த காட்சி அமைப்பு (ஸ்ரீனிவாஸ் மோகன்) ஆகிய பட்டியலில் பரிந்துரைக்கப்பட்டது.
இதனையடுத்து ஒரிஜினல் பாடல் என்ற பிரிவில் ஆர்.ஆர்.ஆர். படத்தில் இடம் பெற்ற நாட்டு நாட்டு பாடல் இடம் பெற்றது. ஆஸ்கர் விருதுகளின் இறுதிப்பட்டியல் வரும் ஜனவரி 24 ஆம் தேதி வெளியிடப்படுகிறது.
மேலும் படிக்க : Thunivu Review : வலிமை போச்சு... துணிவு என்னாச்சு.. கம்பேக் கொடுத்ததா அஜித் - வினோத் கூட்டணி? - முதல் விமர்சனம் இதோ..!