இந்திய திரையுலகினர் மத்தியில் பெரும் அதிர்ச்சியை ஏற்படுத்தியிருப்பது இசையமைப்பாளர் ஏ.ஆர்.ரஹ்மான் - சாய்ரா பானு விவாகரத்து ஆகும். இவர்களது விவாகரத்து இந்திய திரையுலகை அதிர்ச்சியை ஏற்படுத்தியுள்ள நிலையில், இவர்களது வழக்கறிஞர் வந்தனாஷ கடந்த சில நாட்களுக்கு முன்பு பேசிய வீடியோ இணையத்தில் வைரலாகி வருகிறது.
ஏ.ஆர்.ரஹ்மான் - சாய்ரா பானு விவாகரத்து:
விவாகரத்துக்கு பெயர் போன பிரபல வழக்கறிஞர் தான் மும்பையை சேர்ந்த வந்தனா ஷா. ஏ.ஆர் ரஹ்மானின் இந்த விவாகரத்து செய்தியை அறிவிப்பதற்கு சில நாட்கள் முன், பிரபலங்களின் வாழ்வில் ஏற்படும் பிரிவு குறித்து வழக்கறிஞர் வந்தனா ஷா பேசிய வீடியோ தற்போது வைரலாக பரவி வருகிறது.
தீபக் ஃபரீக்கின் யூடியூப் சேனல் பாட்கேஸ்டில் பேசிய வந்தனா, “பிரபலங்களின் வாழ்க்கை மிகவும் வித்தியாசமானது. பல நேரங்களில் அவர்களின் திருமண முறிவுக்கு துரோகம் மட்டுமே காரணமாக இருப்பதில்லை. உண்மையான காரணம் சலிப்பு. வாழ்க்கை அவர்களுக்கு சலித்துவிடுகிறது. திருமண வாழ்வில் இருப்பவர்கள் எல்லாவற்றையும் பார்த்துவிட்டதாக உணர்கிறார்கள். இது பாலிவுட் மற்றும் பெரும் கோடீஸ்வர குடும்பங்களில் நடைபெறுவதை மிகவும் சாதாரணமாக பார்க்க முடிகிறது. ஆனால் இதை வேறு திருமணங்களில் என்னால் பார்க்க முடியவில்லை.
One Night Stand:
இரண்டாவது முக்கியமான விஷயம், அவர்கள் அனைவரும் மிகவும் வித்தியாசமான பாலியல் வாழ்க்கையை வாழ்கிறார்கள். சாதாரண திருமண வாழ்வில் இருப்பவர்களை விட இவர்கள் வாழ்வில் பாலியல் சார்ந்த எதிர்பார்ப்புகள் அதிகமாக உள்ளது. மூன்றாவதாக, அவர்களுக்கு பாலியல் தொடர்புகள் அதிகமாக இருக்கிறது. ஒருவருடன் ஒரு நாள் இரவு மட்டும் செலவிடும் One Night Stand கலாச்சாரம் ஓங்கி இருக்கிறது. இது அனைத்தையும் அவர்கள் ஒரு பொருட்டாகவே மதிப்பதில்லை. நான் பாலிவுட்டின் ஒரு அங்கமாக அதில் பணியாற்றியதில்லை. ஆனால் என்னிடம் வந்த வழக்குகளில் இருந்து என்னால் இந்த விஷயங்களை புரிந்து கொள்ள முடிகிறது."
இவ்வாறு அவர் பேசியுள்ளார். இந்தியாவின் மற்ற திரையுலகங்களை காட்டிலும் பாலிவுட் திரையுலகினர் வாழ்க்கை முறை உள்பட பலவற்றிலும் அவர்களது செயல்பாடு மாறுபட்டதாகவே அமைகிறது. சமீபத்திய ஆண்டுகளில் பிரபலங்கள் இடையேயான விவாகரத்து அதிகரித்து வரும் நிலையில், மலைகா அரோரா-அர்பாஸ் கான், சோஹைல் கான்-சீமா சஜ்தே, ஹர்திக் பாண்டியா-நடாசா ஸ்டான்கோவிக், அமீர் கான்-கிரண் ராவ், சமந்தா -நாகா சைதன்யா , ஜெயம் ரவி-ஆர்த்தி, தனுஷ்-ஐஸ்வர்யா ரஜினிகாந்த் என்ற வரிசையில் தற்போது ஏ.ஆர் ரஹ்மானின் பெயரும் சேர்ந்துள்ளது.