பாலிவுட்டின் மூத்த சூப்பர் ஸ்டார் நடிகரான அமிதாப் பச்சனுக்கு உலகம் முழுவதும் மிகப்பெரும் ரசிகர் பட்டாளம் உள்ளது. 1970கள் தொடங்கி இந்தி சினிமாவில் கோலோச்சி வரும் நடிகர் அமிதாப் பச்சன் தன் ‘ஆங்ரி யங் மேன்’ கதாபாத்திரங்களால் ரசிகர்களை ஈர்த்து ஒட்டுமொத்த இந்திய சினிமாவின் டார்லிங்காக மாறினார்.


தற்போது 80ஆவது வயதில் நடைபோடும் அமிதாப் தேர்ந்தெடுத்த கதாபாத்திரங்களில் நடித்து ரசிகர்களைக் கவர்ந்து வருகிறார். நடிப்பு தாண்டி தன் குணத்துக்காகவும் ஏராளமான ரசிகர்களைக் கொண்டுள்ள அமிதாப், இன்னும் அசைக்க முடியாத சூப்பர் ஸ்டாராக பாலிவுட்டில் வலம் வருகிறார். 


மேலும் தன் இணைய பக்கத்திலும் தொடர்ந்து ஆக்டிவ்வாக இருந்து வரும் அமிதாப் தத்துவார்த்த ட்வீட்கள், புகைப்படங்களைப் பகிர்ந்து தன் ரசிகர்களை உற்சாகப்படுத்தி வருகிறார். அந்த வகையில் முன்னதாக ஷூட்டிங் ஸ்பாட்டுக்கு தனக்கு லிஃப்ட் கொடுத்து, தன்னை சரியான நேரத்துக்கு அழைத்துச் சென்ற நபருக்கு நன்றி தெரிவித்து அமிதாப் தன் சமூக வலைதளப் பக்கங்களில் பதிவிட்டிருந்தார். 


அமிதாப்பின் இந்தப் பதிவு பலரது கண்டனங்களையும் ஈர்த்தது. சூப்பர் ஸ்டாரான நடிகர் அமிதாப்பே ஹெல்மெட் அணியாமல் இப்படி பொது இடங்களில் செல்லலாமா எனக்கேட்டு நெட்டிசன்கள் அவருக்கு கண்டனங்களைப் பதிவு செய்து வருகின்றனர்.


இதேபோல் நடிகை அனுஷ்கா சர்மாவும் ஹெல்மெட் அணியாமல் பயணித்த நிலையில், இருவருக்கும் அபராதம் விதிக்கும்படி நெட்டிசன்கள் பலர் மும்பை ட்ராஃபிக் காவலர்களைக் குறிப்பிட்டு கோரினர். இதனைத் தொடர்ந்து, அமிதாப்,  அனுஷ்கா இருவரையும் அழைத்துச் சென்ற வாகன ஓட்டிகளுக்கு அபராதம் விதிக்கப்பட்டதாக  மும்பை காவல் துறை சார்பில் தெரிவிக்கப்பட்டது.


இந்நிலையில் தான் கைதாகிவிட்டதாகக் குறிப்பிட்டு நடிகர் அமிதாப் பச்சன் நெட்டிசன்களை ஜாலியாகக் கேலி செய்யும் வகையில் பதிவிட்டுள்ளார். இந்நிலையில், மும்பை போலீஸால் டானை கைது செய்ய முடியாது, எவராலும் பூத் நாத்தை கைது செய்ய முடியாது என அமிதாப்பின் கதாபாத்திரப் பெயர்களைக் குறிப்பிட்டு அவரது ரசிகர்கள் இந்தப் புகைப்படத்தின் கீழ் ரகளையாகக் கமெண்ட் செய்து வருகின்றனர்.






முன்னதாக படப்பிடிப்பு தளத்திற்குள் தான் அபராதம் இன்றி பயணித்ததாக அமிதாப் விளக்கம் கொடுத்திருந்தார். இறுதியாக உன்சாய் படத்தில் தோன்றியிருந்த அமிதாப் தற்போது ப்ராஜக்ட் கே படத்தில் நடிகர் பிரபாஸ் உடன் இணைந்து நடித்து வருகிறார். மேலும் பட்டர்ஃப்ளை எனும் கன்னட மொழி படத்திலும் நடித்து வருகிறார்.