சிட்டிசன் படத்தின் வெற்றியைத் தொடர்ந்து அந்த படத்தின் இரண்டாம் பாகமான “இதிகாசம்” படத்தில் அஜித் நடிக்க இருந்ததாக இயக்குநர் சரவண சுப்பையா தெரிவித்துள்ளார்.


சிட்டிசன்


அஜித் நடித்த ‘சிட்டிசன்’ திரைப்படம் கடந்த 2001 ஆம் ஆண்டு வெளியானது. கடந்த ஆண்டு இப்படம் 22 ஆண்டுகளை நிறைவு செய்கிதது. அஜித் குமாரின் கேரியரில் சிட்டிசன் மாறுபட்ட, அதே நேரத்தில் அவருக்கு மிகப் பெரிய வெற்றியைக் கொடுத்த ஒரு திரைப்படம் . ஏற்கனவே வாலி படத்தில் இரண்டு கதாபாத்திரங்களில் நடித்திருந்தாலும் இந்தப் படத்திலும் இரண்டு கதாபாத்திரங்களில் அவர் செய்தது ரசிகர்களை பெருமளவில் ஈர்த்தது.


படம் முழுவதும் பல்வேறு வேஷங்களில் தோன்றுவார் அஜித்.  மீனா, வசுந்தரா தாஸ்,  நக்மா, நிழல்கள் ரவி, பாண்டியன் , தேவன், அஜய் ரத்னம் ஆகியோர் சிட்டிசனில் நடித்திருந்தார்கள். அரசியல் கதைகளத்தை மையமாக வைத்து த்ரில்லர் பாணியில் இந்தப் படத்தை இயக்கியிருப்பார் சரவண சுப்பையா. 


படத்தின் இயக்குநரான சரவணா சுப்பையா இயக்கிய முதல் படம் சிட்டிசன். இந்தப் படத்தின் வெற்றியைத் தொடர்ந்து அஜித்துடன் சேர்ந்து இதிகாசம் என்கிற படத்தை எடுக்க முடிவு செய்தார்கள். இதிகாசம் திரைப்படம் சாதியப் பிரச்சனையை மையப்படுத்திய படமாக இருக்கும் என எதிர்பார்க்கப்பட்டது. ஆனால் சில காரணங்களால் இந்தப் படத்தின் முயற்சி கைவிடப்பட்டது. இதனைத் தொடர்ந்து ‘மீண்டும்’, ‘ABCD’  ஆகிய  திரைப்படங்களை இயக்கினார். மேலும் ராவணன், விசாரணை, காஷ்மோரா, வேலைக்காரன், கோலி சோடா ஆகிய திரைப்படங்களில் நடிகராகவும் தோன்றினார் சரவண சுப்பையா .


இதிகாசம்


இந்நிலையில், முன்னதாக சாய் வித் சித்ராவுடனான நிகழ்ச்சியில் பேசிய இயக்குநர் சரவண சுப்பையா சிட்டிசன் படம் குறித்தும் இதிகாசம் படம் குறித்தும் பேசினார். “ சிட்டிசன் படம் வெளியானதும் தயாரிப்பாளர் சக்கரவர்த்தி எனக்கு ஒரு புதிய மாருதி ஸென் கார் ஒன்றைப் பரிசாக வழங்கினார்.


அதே காரின் உள்ளே இரண்டு 25 ஆயிரம் கட்டுகள் இருந்தன. சக்கரவர்த்தி என்னிடம் இந்தக் காரை எடுத்துக் கொண்டு என்னுடைய குடும்பத்தினர் அனைவரையும் பார்த்துவிட்டு வரச்சொன்னார். நான் திரும்பி வந்ததும் இதிகாசம் படத்தின் வேலைகளைத் தொடங்கலாம் என்றார். அதே ப்ரோடக்‌ஷன் கம்பெனியில் இதிகாசம் படத்தின் விளம்பரமும் வெளியானது. சக்கரவர்த்தி என்மேல் அந்த அளவிற்கு நம்பிக்கை வைத்திருந்தார்.


இன்னொரு விஷயம் என்னவென்றால் சக்கரவர்த்தி அந்தக் காரை எனக்கு பரிசாக தரவில்லை என்றால், அஜித் சார் எனக்கு நிச்சயமாக ஒரு கார் பரிசாகக் கொடுத்திருப்பார். தனது பட இயக்குநர்களுக்கு கார் வாங்கிக் கொடுப்பதை அஜித் குமார் வழக்கமாக வைத்திருந்தார்” என்று இயக்குநர்  சரவண சுப்பையா கூறியுள்ளார். அஜித் மற்றும் சரவண சுப்பையா கூட்டணியில் இதிகாசம் படம் வெளியாகியிருந்தால் அது நிச்சயம் மிகப்பெரிய வெற்றிப்படமாக அமைந்திருக்கும் என்று அஜித் ரசிகர்கள் கருதுகிறார்கள்.


விடாமுயற்சி


தற்போது அஜித் குமார் மகிழ் திருமேனி இயக்கத்தில் விடாமுயற்சி படத்தில் நடித்து வருகிறார். த்ரிஷா, அர்ஜூன் உள்ளிட்டவர்கள் இந்தப் படத்தில் முக்கியக் கதாபாத்திரங்களில் நடித்து வருகிறார்கள். அனிருத் இந்தப் படத்திற்கு இசையமைக்க லைகா ப்ரோடக்‌ஷன்ஸ் இந்தப் படத்தை தயாரித்து வருகிறது.