விடாமுயற்சி
ஒரு அஜித் படம் வெளியானால் அஜித் ரசிகர்கள் எவ்வளவு மகிழ்ச்சி அடைகிறார்களோ அதே அளவிற்கு வருந்தவும் செய்கிறார்கள். அடுத்து அஜித் நடிக்கும் படத்திற்கான அப்டேட்களுக்காக காத்திருந்தே வருடங்களை கடந்துவிடுகின்றன. அப்படி துணிவு படத்திற்கு பின் அஜித் நடிக்க இருப்பதாக அறிவிக்கப்பட்ட படம் தான் விடாமுயற்சி. தடம், மீகாமன் உள்ளிட்ட படங்களை இயக்கிய மகிழ் திருமேணி இப்படத்தை இயக்குகிறார். அனிருத் இசையமைக்க லைகா ப்ரோடக்ஷன்ஸ் இப்படத்தை தயாரிக்கிறது. கடந்த ஆண்டு இப்படத்தின் டைட்டில் வெளியாகி ரசிகர்களிடம் கலவையான ரியாக்ஷன்களைப் பெற்றது.
இதனைத் தொடர்ந்து துபாய் , அஜர்பைஜான் உள்ளிட்ட நாடுகளில் படத்தின் படப்பிடிப்பு நடைபெற்றது. அர்ஜூன் , த்ரிஷா , ஆரவ் , ரெஜினா உள்ளிட்டவர்கள் இப்படத்தில் நடிக்கிறார்கள். ஓம் பிரகாஷ் மற்றும் நிரவ் ஷா இப்படத்திற்கு ஒளிப்பதிவு செய்துள்ளார்கள்.
டைட்டிலை தவிர்த்து படத்தைப் பற்றிய எந்த வித தகவலும் இல்லாதது அஜித் ரசிகர்களின் பொறுமையை சோதித்தது. இதற்கிடையில் படத்தின் ஸ்டண்ட் மாஸ்டர் ஒருவர் விபத்தில் உயிரிழ்ந்த செய்தி பெரும் சோகத்தை ஏற்படுத்தியது. பின் அஜித் நடிக்கும் குட் பேட் அக்லி படத்தின் அறிவிப்பு வெளியானது . அப்போ விடாமுயற்சி அவ்ளோதானா என ரசிகர்கள் கேள்வி எழுப்பினார்கள். இப்படம் கைவிடப்பட்டுள்ளதாக வதந்திகள் பரவின. இந்த வதந்திகளுக்குப் பிறகே படக்குழு ரசிகர்களுக்கு படம் குறித்த குட்டி குட்டி அப்டேட்களை கொடுக்கத் தொடங்கியது .
விடாமுயற்சி ரிலீஸ் ஒத்திவைப்பு ?
ஒரு சில இடைவேளைக்குப் பின் விடாமுயற்சி படப்பிடிப்பு மீண்டும் தொடங்கி முடிவுக்கு வந்துள்ளது. தற்போது இன்னும் சில பேட்ச் வர்க் காட்சிகள் மட்டுமே மீதமிருப்பதாகவும் போஸ்ட் ப்ரோடக்ஷன் பணிகள் நடைபெற்று வருவதாகவும் தகவல்கள் வெளியாகியுள்ளன. இந்த ஆண்டு தீபாவளிக்கு விடாமுயற்சி படம் திரையரங்கில் வெளியாக இருப்பதாக படக்குழு கடந்த ஆண்டு முதல் திட்டவட்டமாக கூறி வருகிறது. மேலும் சமீப காலத்தில் படத்தின் அடுத்தடுத்த போஸ்டர்களை வெளியிட்டு இழந்துபோன ரசிகர்களின் நம்பிக்கையை உயிர்ப்பாக வைத்து வருகிறார்கள் படக்குழுவினர்
தற்போது படம் தீபாவளிக்கு வெளியாகும் என ரசிகர்கள் ஆர்வமாக எதிர்பார்த்து வந்த நிலையில் படத்தின் ரிலீஸ் ஒத்திவைக்கப் பட்டுள்ளதாக தகவல்கள் வெளியாகியுள்ளன. ஏற்கனவே வரும் அக்டோபர் 10 ஆம் தேதி வெளியாக இருந்த கங்குவா ரிலீஸ் தேதி ஒத்திவைக்கப்பட்டது. தற்போது விடாமுயற்சி படத்தின் ரிலீஸூம் பொங்கலுக்கு ஒத்திவைக்கப் பட்டுள்ளதாக தகவல்கள் வெளியாகியுள்ளன. இந்த தகவல் அஜித் ரசிகர்களை உற்சாகமிழக்கச் செய்துள்ளது.
கமலின் தக் லைஃப் படமும் பொங்கலுக்கு வெளியாக இருப்பதால் அஜித் மற்றும் கமல் படத்திற்கு இடையே கடுமையான போட்டி நிலவும் என்று எதிர்பார்க்கப் படுகிறது