‘அண்ணாத்த’ படத்தைத் தொடர்ந்து கீர்த்தி சுரேஷ் தங்கையாக நடித்த இரண்டாவது படமும் தோல்வியை சந்தித்துள்ளது.
குழந்தை நட்சத்திரமாக அறிமுகம்
தமிழ் சினிமாவில் தனது 8 ஆண்டுகளை நிறைவு செய்து கோலோச்சி வருகிறார் நடிகை கீர்த்தி சுரேஷ். 2015ஆம் அண்டு ஏ.எல்.விஜய் இயக்கத்தில் விக்ரம் பிரபு ஹீரோவாக நடித்த ‘இது என்ன மாயம்’ படத்தின் மூலம் தமிழ் திரையுலகில் அறிமுகமானார் கீர்த்தி.
இதனைத் தொடர்ந்து ஆண்டு தனுஷ் நடிப்பில் வெளிவந்த தொடரி படத்தில் மேக்கப் இல்லாமல் நடிப்பில் அசத்திய கீர்த்தி சுரேஷ், அதே ஆண்டு சிவகார்த்திகேயனின் ரெமோ படத்தில் பப்ளி மருத்துவராக வந்து ரசிகர்கள் மனதை கொள்ளையடித்தார். சிவகார்த்திகேயனுடன் மீண்டும் இணைந்த கீர்த்தி சுரேஷ், ரஜினி முருகன் படத்தில் எதார்த்தமான நடிப்பை வெளிப்படுத்தி இருப்பார்.
நடிகையர் திலகம் சாவித்திரி
தமிழ் சினிமாவின் முன்னணி நடிகர்களுடன் நடித்திருந்தாலும் கீர்த்தி சுரேஷின் நடிப்பை திரையுலகமே பார்த்து வியந்தது ‘நடிகையர் திலகம்’ படத்தில் தான். தென்னிந்தியாவின் நடிகையர் திலகம் என அழைக்கப்படும் பழம்பெரும் நடிகை சாவித்ரியின் வாழ்க்கையை கொண்டு எடுக்கப்பட்ட ‘மகாநடி’ படத்தில் கீர்த்தி சுரேஷ் நடித்திருந்தார்.
நடிப்புக்கே பெயர் போன சாவித்ரி போல், அவரது ஒவ்வொரு அசைவுகளையும் மீண்டும் திரையில் கொண்டு வந்தார் கீர்த்தி சுரேஷ். நடிகையர் திலகம் சாவித்ரியை கண்முன் காட்டிய கீர்த்தி சுரேஷின் நடிப்புக்கு பெருமை சேர்க்கும் விதமாக தேசிய விருது கிடைத்தது.
தங்கச்சியாக அவதாரம்
தொடர்ந்து, அண்ணாத்த படத்தில் ரஜினியின் பாசமான இன்னசெண்ட் தங்கையாக நடித்தார் கீர்த்தி. எப்படியாவது திருப்பாச்சிக்கு நிகரனான ஒரு அண்ணன் - தங்கச்சி செண்டிமெண்ட் படத்தில் நடித்துவிடலாம் என்கிற ஆசை தான். இந்தப் படத்தில் நடிப்பதற்காக மணிரத்னம் இயக்கிய பொன்னியின் செல்வன் திரைப்படத்தில் குந்தவையாக நடிக்கும் வாய்ப்பை விட்டுக்கொடுத்தார் கீர்த்தி. ஆனால் அண்ணாத்த படம் மிகப்பெரிய தோல்வியடைந்தது.
இந்த டைம் மிஸ் ஆகாது
சரி ஒரு முறை தவறிவிட்டது. இந்த முறை எப்படியாவது தங்கச்சியாக நடித்து ஒரு ஹிட் கொடுத்துவிட வேண்டும் என்று மீண்டும் ஒரு முறை தங்கையாக நடித்தார் கீர்த்தி. தமிழில் சிறுத்தை சிவா இயக்கத்தில் அஜித் குமார் லக்ஷ்மி மேனன் நடித்து வெளியான வேதாளம் படத்தின் தெலுங்கு ரீமேக்கில் நடிகர் சீரஞ்சீவியின் தங்கையாக நடித்திருக்கிறார் கீர்த்தி சுரேஷ்.
கடந்த ஆகஸ்ட் 11ஆம் தேதி பலத்த எதிர்பார்ப்புகளுடன் வெளியானது போலா சங்கர் திரைப்படம். இந்நிலையில் வேதாளம் படம் தமிழில் ரசிகர்களால் விமர்சிக்கப்பட்டதை விட அதிகமான தெலுங்கில் விமர்சிக்கப்பட்டு வருகிறது போலோ சங்கர். இரண்டாவது முறையாகவும் தங்கையாக கீர்த்தி நடித்திருக்கும் படம் தோல்வியடைந்திருப்பதாகத் தகவல்கள் வெளியாகி வருகின்றன. திருப்பாச்சி தங்கச்சியாகும் கீர்த்தியின் கனவு நிறைவேறாமலே போய்விடுமோ!