நடிகை ஸ்ருதி ஹாசன் - தனுஷ் - ஐஸ்வர்யா ரஜினிகாந்த் கூட்டணியில் கடந்த 2012ஆம் ஆண்டு வெளியான திரைப்படம் ‘3’. அனிருத் இந்தப் படத்துக்கு இசையமைத்திருந்தார். நடிகர் சிவகார்த்திகேயன் இந்தப் படத்தில் காமெடியான நடித்திருந்த நிலையில் இந்தப் படம் வெளியாகி ஹிட் அடித்தது.
3 படத்தின்போது காதலா?
இந்நிலையில், 3 படத்தில் நடிகர் தனுஷ் உடன் இணைந்து நடித்தபோது ஸ்ருதி ஹாசனும் தனுஷூம் காதலில் விழுந்ததாகவும், இதனால் தனுஷின் மனைவியும் தோழியுமான ஐஸ்வர்யா ரஜினிகாந்துடன் ஸ்ருதி ஹாசனுக்கு மனஸ்தாபம் ஏற்பட்டதாகவும் தகவல்கள் தீயாய் பரவின.
3 படத்தில் காதல் காட்சிகளும் தனுஷ் - ஷ்ருதிஹாசன் இடையேயான கெமிஸ்ட்ரியும் பெரும் வரவேற்பைப் பெற்ற நிலையில், தனுஷ் - ஷ்ருதி காதலால் சிறந்த தோழர்களான ரஜினி - கமல் இடையே மனஸ்தாபம் ஏற்பட்டதாக தகவல்கள் கோலிவுட் வட்டாரத்தில் பரவின.
இந்நிலையில் இந்தக் கிசுகிசுக்களுக்கு 10 ஆண்டுகளுக்குப் பிறகு தன் சமீபத்திய நேர்காணலில் ஸ்ருதி பதில் அளித்துள்ளார்.
10 ஆயிரம் வதந்தி
”இந்த வதந்தி மட்டுமல்ல, என்னைச் சுற்றி பத்தாயிரம் வதந்திகள் சூழ்ந்து கொண்டு உள்ளன. 3 படத்தின்போது யாரும் என் மீது நம்பிக்கை வைக்காதபோது தனுஷ் என் மீது நம்பிக்கை வைத்தார். என் உடலில் மைக்ரோ சிப் பொருத்தி அனைவரிடமும் என்னால் விளக்க முடியாது” என ஸ்ருதி தெரிவித்துள்ளார்.
தற்போது தெலுங்கு சினிமாவில் ஸ்ருதி ஹாசன் கோலோச்சி வருவதுடன் தன் காதல் வாழ்க்கையையும் கொண்டாட்டமாக வாழ்ந்து, தன் இன்ஸ்டா பக்கத்தில் காதலர் உடனான புகைப்படங்களை தொடர்ந்து பதிவிட்டு வருகிறார்.
டுடுல் கலைஞருடன் காதல்
மும்பையைச் சேர்ந்த பிரபல டூடுல் கலைஞரான சாந்தனு ஹசாரிகா என்பவரை ஸ்ருதி ஹாசன் காதலித்து வருகிறார். இவர்கள் இருவரும் சமூக வலைதளங்களில் தொடர்ந்து புகைப்படங்கள் பகிர்ந்து இணையதள சென்சேஷனாக மாறி லைக்ஸ் அள்ளி வருகின்றனர்.
டோலிவுட்டில் சமீபத்தில் சங்கராந்தி ஸ்பெஷலாக வெளியான வால்ட்டர் வீரய்யா, வீர சிம்ஹா ரெட்டி ஆகிய படங்களில் சிரஞ்சீவி, பாலகிருஷ்ணா ஆகிய உச்ச நட்சத்திரங்களுக்கு ஜோடியாக ஸ்ருதி ஹாசன் நடித்திருந்தார்.
தற்போது கேஜிஎஃப் திரைப்பட இயக்குநர் பிரசாந்த் நீல் இயக்கத்தில் பான் இந்தியா படமாக உருவாகி வரும் சலார் படத்தில் ஸ்ருதி ஹாசன் நடித்து வருகிறார். இந்தப் படத்தின் மீது எக்கச்சக்க எதிர்பார்ப்புகள் எகிறியுள்ள நிலையில், இந்தப் படத்தின் மூலம் கன்னட திரை உலகிலும் ஸ்ருதி கால் பதிக்கிறார்.