நடிகை சமந்தா நடித்துள்ள யசோதா படத்தின் டீசர் வெளியிட்டு தேதியை படக்குழு அறிவித்துள்ளது.
தமிழ், தெலுங்கில் முன்னணி நடிகையாக இருக்கும் சமந்தா கடந்தாண்டு அக்டோபர் மாதம் தனது காதல் கணவரும், நடிகருமான நாக சைதன்யாவை விவாகரத்து செய்தார். திரையுலகைச் சேர்ந்தவர்களுக்கு, ரசிகர்களுக்கும் இந்த சம்பவம் கடும் அதிர்ச்சியை ஏற்படுத்தியது. இதனைத் தொடர்ந்து இருவரும் தங்களது திரையுலகப் பயணத்தில் கவனம் செலுத்தி வருகின்றனர். அந்த வகையில் சமந்தா கடந்தாண்டு வெளியான புஷ்பா படத்தில் ஊ சொல்றியா மாமா பாடலின் மூலம் இந்திய அளவில் பிரபலமானார்.
இதனால் அவரின் அடுத்தடுத்த படங்கள் மீது ரசிகர்களின் கவனம் குவிந்து வருகிறது. இதனிடையே ஸ்ரீதேவி மூவிஸ் சார்பில் சிவலெங்கா கிருஷ்ண பிரசாத் தயாரிப்பில் யசோதா என்ற படத்தில் சமந்தா நடித்து வருகிறார். ஹரிஹரிஷ் இயக்கியுள்ள இப்படத்தில் வரலட்சுமி சரத்குமார், உன்னி முகுந்தன், ராவ் ரமேஷ், முரளி சர்மா உள்ளிட்ட பலரும் நடித்துள்ளனர். த்ரில்லர் பாணியில் உருவாகியுள்ள யசோதா படம் முதலில் ஆகஸ்ட் 12 ஆம் தேதி வெளியாகும் என அறிவிக்கப்பட்டது.
ஆனால் போஸ்ட் புரொடக்ஷன்ஸ் பணிகள் தாமதமானதால் ரிலீஸ் தேதி தள்ளிவைக்கப்பட்டுள்ளது. இந்நிலையில் விநாயகர் சதுர்த்தியை முன்னிட்டு யசோதா படத்தின் அப்டேட் வெளியாகியுள்ளது. அதன்படி செப்டம்பர் 9 ஆம் தேதி மாலை 5.49 மணியளவில் யசோதா படத்தின் டீசர் வெளியாகும் என அறிவிக்கப்பட்டுள்ளதோடு புதிய போஸ்டர் ஒன்றும் வெளியாகியுள்ளது. கடந்த ஒரு மாதமாக இன்ஸ்டாகிராமில் தலைகாட்டாத சமந்தா மீண்டும் யசோதா படத்தின் அப்டேட் மூலம் ஆக்டிவாக உள்ளதால் ரசிகர்கள் மகிழ்ச்சியடைந்துள்ளனர்.