இந்தியாவின் `தேசிய க்ரஷ்’ என்று அழைக்கப்படும் நடிகை ராஷ்மிகா மந்தனா `புஷ்பா’ படத்தில் `சாமி சாமி’ என்று ஆடிய நடனம் பட்டிதொட்டியெங்கும் கலக்கிக் கொண்டிருக்கிறது. சமூக வலைத்தளங்களில் வைரலாகி இருக்கும் இந்தப் பாடலுக்கு ரசிகர்கள் மட்டுமின்றி பிரபலங்களும் ராஷ்மிகாவைப் போல நடனம் ஆடி பதிவிட்டு வருகின்றனர். இதனால் மிகவும் மகிழ்ந்திருக்கும் ராஷ்மிகா, `சாமி சாமி’ பாடலின் நடனம் சிறப்பாக வர வேண்டும் என்பதற்காக பல மணி நேரங்கள் அதனைப் பயிற்சி எடுத்திருக்கிறார்.
தனது நன்றியைத் தெரிவிக்கும் விதமாகப் பேசியுள்ள ராஷ்மிகா மந்தனா, `என்னுடைய `சாமி சாமி’ பாடலுக்காக எனக்கு கிடைத்திருக்கும் அன்பு என்னை நெகிழச் செய்கிறது. இந்தப் பாடலை வெற்றிகரமாக மாற்றியதற்காகவும், அதில் நடித்த என்னை விரும்பியதற்காகவும் எனது ரசிகர்கள் அனைவருக்கும் எனது நன்றியைத் தெரிவித்துக் கொள்கிறேன். `சாமி சாமி’ பாடல் படப்பிடிப்பு மகிழ்வாக இருந்தது; என்னுடைய நடனம் சிறப்பாக வருவதற்காக நான் பல மணி நேரங்கள் நடனப் பயிற்சி மேற்கொண்டேன். சமீபத்தில் நான் ஆடிய நடனத்தைச் சமூக வலைத்தளங்களில் மற்றவர்கள் ஆடுவதைப் பார்க்கும் போது, `புஷ்பா’ படப்பிடிப்பு நாள்களுக்கு என் மனம் செல்கிறது. உலகம் முழுவதும் உள்ள மக்களிடம் நான் பெற்றிருக்கும் இந்த அன்பே இந்தப் பாடலை ஸ்பெஷலானதாகவும், நினைவுக்குரியதாகவும் மாற்றுகிறது’ என்று கூறியுள்ளார்.
ராஷ்மிகாவின் `சாமி சாமி’ நடனம் தற்போது மிகப் பெரிய ஹிட்டாக மாறியுள்ளது.
தற்போது நடிகை ராஷ்மிகா மந்தனா தன்னுடைய இந்தி படங்களின் வெளியீட்டிற்காக காத்துக் கொண்டிருக்கிறார். `மிஷன் மஜ்னு’ என்ற பெரிய பட்ஜெட் திரைப்படத்தின் மூலம் பாலிவுட்டில் கால் பதிக்கிறார் ராஷ்மிகா. இதில் சித்தார்த் மல்ஹோத்ரா நாயகனாகவும், அமிதாப் பச்சன் முக்கிய வேடத்திலும் நடித்துள்ளனர்.