விஜய்
நடிகர் விஜய் நடித்துள்ள தி கோட் படம் வரும் செப்டம்பர் 5 ஆம் தேதி வெளியாக இருக்கிறது. வெங்கட் பிரபு இயக்கத்தில் வெளியாகும் இப்படம் பல்வேறு வசூல் சாதனைகளை முறியடிக்கும் என எதிர்பார்க்கப்படுகிறது. படத்திற்கான முன்பதிவுகள் வெளிநாடுகளில் ஏற்கனவே தொடங்கிவிட்ட நிலையில் இன்று தமிழ்நாட்டு மற்றும் பிற மாநிலங்களிலும் தொடங்கியுள்ளது. கேரள மாநிலத்தில் தி கோட் படத்திற்கு அதிகாலை நான்கு மணி சிறப்பு காட்சிகள் திரையிடப்படுகின்றன. அதே நேரம் தமிழகத்தில் முதல் காட்சி காலை 9 மணிமுதல் தொடங்க இருக்கின்றன.
தி கோட் படத்தினைத் தொடர்ந்து விஜய் தளபதி 69 படத்தில் நடிக்க இருக்கிறார். இப்படத்துடன் விஜய் தனது திரைவாழ்க்கைக்கு ஃபுல் ஸ்டாப் வைத்துக் கொள்வார் என எதிர்பார்க்கப்படுகிறது
தவெக முதல் மாநாடு
ஒரு பக்கம் தி கோட் படத்தின் ரிலீஸ் வேலைகள் படுதீவிரமாக நடைபெற்று வருகின்றன. இன்னொரு பக்கம் விஜய் தனது அரசியல் செயல்பாடுகளில் தீவிரம் காட்டி வருகிறார். கடந்த வாரம் தமிழக வெற்றிக் கழகத்தில் கட்சிக்கொடி மற்றும் கட்சிப்பாடல் வெளியிடப்பட்டது. மேலும் அரசியலில் முழு கவனத்தையும் செலுத்தி வரும் விஜய் தி கோட் படத்தில் ஆடியோ லாஞ்ச் நிகழ்வைக்கூட நடத்த வேண்டாம் என்று சொல்லிவிட்டதாக தகவல்கள் வெளியாகியுள்ளன.
அடுத்தபடியாக தவெக வின் முதல் கட்சி மாநாடு வரும் செப்டம்பர் 23 ஆம் தேதி விக்கிரவாண்டியில் நடைபெற இருக்கிறது. அடுத்தடுத்த இரு முக்கியமான நிகழ்வுகளுக்கு விஜய் மற்றும் அவரது ரசிகர்கள் காத்திருக்கும் நிலையில் விஜய் இன்று புகழ்பெற்ற சீரடி சாய்பாபா கோயிலுக்கு புறப்பட்டுச் சென்றுள்ளார்.
சீரடி சாய்பாபா கோயிலுக்கு விஜய் பயணம்
ஏற்கனவே தனது அன்னையின் விருப்பத்திற்கு ஏற்ப சாய்பாபா கோயில் ஒன்றை கட்டிக் கொடுத்தார் விஜய். தற்போது மகாராஷ்ட்ரா மாநிலத்தில் அகமது நகரில் இருக்கும் புகழ்பெற்ற சீரடி சாய்பாபா கோயிலுக்கு சிறப்பு வழிபாடு செய்ய இன்று காலை சென்னை விமான நிலையத்தில் இருந்து தனி விமானம் ஒன்றில் விஜய் புறப்பட்டார்.