பொன்னியின் செல்வன் படம் வெளியாவதை முன்னிட்டு நடிகர் சரத்குமார் செய்தியாளர்களை சந்தித்து படம் குறித்து பல தகவல்களை பகிர்ந்து கொண்டார்.
கல்கியின் ’பொன்னியின் செல்வன்’ நாவலைத் தழுவி அதே பெயரில் பொன்னியின் செல்வன் என்ற படம் இரண்டு பாகங்களாக எடுக்கப்பட்டுள்ளது. இப்படத்தில் விக்ரம், கார்த்தி, ஜெயம் ரவி, த்ரிஷா, ஐஸ்வர்யா ராய், சரத்குமார், ஜெயராம், சரத்குமார், ஐஸ்வர்யா லட்சுமி, விக்ரம் பிரபு உள்ளிட்ட மிகப்பெரிய நட்சத்திரப் பட்டாளமே நடித்துள்ளது. மணிரத்னம் இயக்கியுள்ள இப்படத்துக்கு ஏ.ஆர்.ரஹ்மான் இசையமைத்துள்ளார். ரவி வர்மன் ஒளிப்பதிவு செய்துள்ளார்.
5 மொழிகளில் உருவாகியுள்ள இப்படத்தின் முதல் பாகம் செப்டம்பர் 30 ஆம் தேதி ரிலீசாகவுள்ளது. இதில் பெரிய பழுவேட்டரையர் கேரக்டரில் நடிகர் சரத்குமார் நடித்துள்ளார். முன்னதாக படக்குழுவினர் கேரளா, கர்நாடகா, ஆந்திரா, டெல்லி, மும்பை ஆகிய இடங்களில் ப்ரோமோஷனுக்காக சென்றிருந்தனர். இதில் சரத்குமார் பங்கேற்கவில்லை. ஏன் அவர் கலந்து கொள்ள வில்லை என்ற கேள்வி அனைவருக்கும் எழுந்தது.
இந்நிலையில் தொடர் படப்பிடிப்பில் இருந்த சரத்குமார் இன்று செய்தியாளர்களை சந்தித்தார். அப்போது அவர் பொன்னியின் செல்வன் படத்தில் நடித்தது பாக்கியம் என்றும், நிச்சயம் இந்த படம் மக்களை கவரும். இதைப் பார்த்து விட்டு சோழ சாம்ராஜ்யம் பற்றி அனைவருக்கும் தெரிய வரும் என கூறினார். தொடர்ந்து செய்தியாளர்களின் கேள்விக்கு அவர் பதிலளித்தார். மேலும் தனக்கு இப்படத்தில் வந்தியத்தேவன் கேரக்டர் பண்ணியிருக்கலாமோ என தோன்றியதாகவும் குறிப்பிட்டார்.
அதில் வில்லனாக நடிப்பது குறித்து கேள்வியெழுப்பப்பட்டது. அதற்கு பதிலளித்த சரத்குமார், மக்களின் ரசனை மாறிவிட்டது. ஹீரோவோ, வில்லனோ, அல்லது என்ன கேரக்டரோ நம்முடைய பெர்பார்மன்ஸை அளித்தால் ரசிப்பார்கள் என கூறினார். அப்போது வாரிசு படத்தில் விஜய்யுடன் நடிப்பது குறித்து கேள்வி கேட்கப்பட்டது. அதற்கு வாரிசு படம் மிகச்சிறந்த படமாக அமையும் என்றும், நடிகர் விஜய் படப்பிடிப்பு தளத்தில் பொன்னியின் செல்வனில் வரும் ‘பொன்னி நதி’ பாடலை பாடிக் கொண்டிருப்பார் என்றும் சரத்குமார் தெரிவித்துள்ளார்.