கடந்த மார்ச் 28 அன்று, நடிகர் சூர்யா, இயக்குநர் பாலா ஆகியோர் இணையும் திரைப்படத்தின் படப்பிடிப்புப் பணிகள் தொடங்கப்பட்டுள்ளதாக அறிவிக்கப்பட்டுள்ளது. `சூர்யா 41’ என்று தற்காலிகமாக பெயர் சூட்டப்பட்டுள்ள இந்தத் திரைப்படம், சூர்யா நடிகராக நடிக்கும் 41வது திரைப்படமாகவும், தயாரிப்பாளராக 15வது திரைப்படமாகவும் அமைய இருக்கிறது. ஜோதிகா, சூர்யா தம்பதியின் 2டி எண்டெர்டெயின்மெண்ட் நிறுவனம் இந்தத் திரைப்படத்தின் தயாரிப்பை மேற்கொண்டிருக்கிறது.
இயக்குநர் பாலா இயக்கத்தில் உருவாக்கப்பட்டு வரும் `சூர்யா 41’ திரைப்படத்தின் அப்டேட்கள் இதுவரை வெளியாகவில்லை என்னும் நிலையில், இந்தத் திரைப்படத்தைக் குறித்த 5 தகவல்களை இங்கே வெளியிட்டிருக்கிறோம்...
1. `சூர்யா 41’ படப்பிடிப்பின் முதல்கட்டப் படப்பிடிப்புகள் கன்னியாகுமரியில் நடைபெற்று வருகின்றன.
தமிழ்நாட்டின் முனையில் இருக்கும் அழகான கடற்கரை நகரமான கன்னியாகுமரியில் இந்தத் திரைப்படத்தின் முதல்கட்டப் படப்பிடிப்புப் பணிகள் தொடங்கப்படுவதாக, 2டி எண்டெர்டெயின்மெண்ட் வெளியிட்டிருந்த அறிவிப்பில் கூறப்பட்டிருந்தது. மேலும், படப்பிடிப்பு தொடங்குவதற்கு முன்பாக, அதற்கான பூஜை நடைபெற்றதாகவும் அறிவிக்கப்பட்டிருந்தது.
2. 18 ஆண்டுகளுக்குப் பிறகு இணையும் சூர்யா - பாலா கூட்டணி!
இயக்குநர் பாலாவும் நடிகர் சூர்யாவும் இணையும் நான்காவது திரைப்படம் இது. இதற்கு முன்பாக, பாலா இயக்கத்தில் நடிகர் விக்ரம், லைலா ஆகியோர் நடித்து, தேசிய விருது பெற்ற `பிதாமகன்’ திரைப்படத்திலும், சூர்யாவின் நடிப்புப் பயணத்தில் மிக முக்கியமான திரைப்படமான `நந்தா’ ஆகியவற்றில் முன்னணி வேடங்களில் சூர்யா நடித்திருந்தார். தொடர்ந்து, ஆர்யா, விஷால் ஆகியோர் நடித்திருந்த `அவன் இவன்’ திரைப்படத்திலும் கேமியோ காட்சியில் நடித்திருந்த சூர்யா, தற்போது18 ஆண்டுகளுக்குப் பிறகு மீண்டும் இயக்குநர் பாலாவுடன் இணைந்திருக்கிறார்.
3. கடந்த ஆண்டே அறிவிக்கப்பட்ட திரைப்படம் இது!
கடந்த 2021ஆம் ஆண்டு அக்டோபர் மாதம், தன்னுடைய சமூக வலைத்தளப் பக்கங்களில் இயக்குநர் பாலா, தன் தந்தையும் நடிகருமான சிவகுமார் ஆகியோருடன் இருக்கும் படத்தைப் பதிவிட்ட நடிகர் சூர்யா, `நான் என் மேல் வைத்திருந்த நம்பிக்கையை விட அதிகம் நம்பிக்கை கொண்டவர் பாலா.. புதிய உலகங்களை நான் அனுபவிக்கச் செய்தவர் இவர்.. பாலாவுடன் மீண்டும் ஒரு அழகான பயணத்தைத் தொடங்குகிறேன்’ என அவர் அதில் குறிப்பிட்டிருந்தார்.
4. க்ரித்தி ஷெட்டி, மமிதா பைஜூ முன்னணி நடிகர்களாகத் தேர்வு!
`ஷ்யாம் சிங்கா ராய்’ தெலுங்குத் திரைப்படம் மூலமாக புகழ்பெற்ற தெலுங்கு நடிகை க்ரித்தி ஷெட்டி இந்தத் திரைப்படத்தில் முன்னணி கதாபாத்திரங்களாக நடிப்பதாக அறிவிக்கப்பட்டுள்ளது. அவரோடு மலையாள நடிகை மமிதா பைஜூ இந்தத் திரைப்படத்தில் நடிக்கவுள்ளார். இவர்களின் கதாபாத்திரங்கள் என்ன என்பது குறித்து தகவல்கள் வெளியாகாத நிலையில், சூர்யா இரண்டு வேடங்களில் நடிக்கவுள்ளதாகக் கூறப்பட்டுள்ளது. இரண்டு வேடங்களில் ஒரு கதாபாத்திரம் செவித்திறன், பேச்சுத் திறன் குறைபாடுள்ள மாற்றுத்திறனாளி வேடம் எனவும் கூறப்பட்டுள்ளது.
5. இசை, பிற தொழில்நுட்பப் பணிகளில் யார்?
`சூரரைப் போற்று’ திரைப்படத்தில் சூர்யாவுடன் இணைந்த ஜி.வி.பிரகாஷ் குமார் இந்தத் திரைப்படத்திற்குப் பின்னணி இசையை அமைத்துள்ளார். மேலும், சூர்யா - வெற்றிமாறன் இணையும் `வாடிவாசல்’ திரைப்படத்திற்கும் இவரே இசையமைப்பாளர்.
கலை இயக்குநராக வி. மாயாண்டி, படத்தொகுப்பாளராக சதிஷ் சூர்யா, ஒளிப்பதிவு பாலசுப்ரமணியம் ஆகியோர் பணியாற்றுவதாகக் கூறப்பட்டுள்ளது.