Just In
Ram Charan : நடிகர் ராம் சரண் வாங்கிய புதிய ரோல்ஸ் ராய்ஸ் கார்...எத்தனை கோடி தெரியுமா?
நடிகர் ராம் சரண் வாங்கியுள்ள புதிய ரோல்ஸ் ராய்ஸ் காரின் விலை மற்றும் இந்த காரின் சிறப்பம்சங்களைப் பார்க்கலாம்
ராம் சரண்
டோலிவுட் சினிமாவின் முன்னணி நடிகர்களில் ஒருவர் நடிகர் ராம் சரண். மெகா ஸ்டார் சிரஞ்சீவியின் மகனாக சினிமாத் துறைக்குள் வந்தாலும் இன்று தனக்கேன் ஒரு தனி அடையாளத்தையும் ரசிகர்கள் கூட்டத்தையும் கொண்டிருக்கிறார். ராஜமெளலி இயக்கிய ஆர்.ஆர்.ஆர் படத்தின் மூலம் சர்வதேச அளவில் பிரபலமானார் ராம் சரண்.
இந்தப் படத்தைத் தொடர்ந்து அவர் சோலோவாக எந்த படத்திலும் இதுவரை நடிக்கவில்லை. தற்போது ஷங்கர் இயக்கும் கேம் சேஞ்சர் படத்தில் நடித்து வருகிறார். கியாரா அத்வானி , எஸ்.ஜே சூர்யா , ஸ்ரீகாந்த் , அஞ்சலி , ஜெயராம் உள்ளிட்டவர்கள் இப்படத்தில் நடித்து வருகிறார்கள். தமன் இப்படத்திற்கு இசையமைத்துள்ளார்.
ராம் சரணின் நடிப்பு பயணத்தை பாராட்டும் வகையில் சமீபத்தில் அவருக்கு வேல்ஸ் பல்கலைகழகத்தின் சார்பாக டாக்டர் பட்டம் வழங்கப் பட்டது. ராம் சரண் மற்றும் அவரது மனைவி உப்சானாவுக்கு கடந்த ஆண்டு பெண் குழந்தை பிறந்தது.
'கேம் சேஞ்சர்' படத்தை தொடர்ந்து புச்சி பாபு சானாவின் இயக்கத்தில் RC16 என்ற படத்தில் நடித்து வருகிறார் ராம் சரண். கிராம கதையை மையமாக வைத்து உருவாகி வரும் இப்படத்தில் ராம் சரண் ஜோடியாக நடிகை ஜான்வி கபூர் நடிக்கிறார். இவர்களுடன் முக்கியமான கதாபாத்திரத்தில் நடிகர் சிவராஜ்குமார் நடித்து வருகிறார்.
ராம் சரணனின் புதிய கார்
ராம் சரண் சமீபத்தில் தனது மனைவி மற்றும் மகள் உடன் ஹைதராபாத் விமான நிலையத்தில் காணப்பட்டார். அப்போது அவரது புதிய ரோல்ஸ் ராய்ஸ் காரின் மீது அனைவரது கவனமும் குவிந்துள்ளது. ராம் சரண் வாங்கியுள்ள இந்த புதிய Rolls Royce Spectre வகையைச் சேர்ந்தது. இந்த காரின் விலை 7.50 கோடிகளாகும். முழுக்க முழுக்க மின்சாரத்தால் இயக்கப்படும் இந்த காரை முதல் முறையாக ஹைதராபாதில் வாங்கியிருப்பவர் ராம் சரண் என்பது குறிப்பிடத்தக்கது.
முன்னதாக தனது தந்தை சிரஞ்சீவிக்கு ராம் சரண் ரோல்ஸ் ராய்ஸ் ஃபாண்டம் காரை பரிசாக அளித்திருந்தார். தற்போது இந்த புதிய கார் ராம் சரண் குடும்பத்தில் இருக்கும் உயர் ரக சொகுசு கார்களில் ஒன்றாக இணைந்துள்ளது.