Meiyazhagan Teaser : தமிழ் திரையுலகின் முன்னணி நடிகர்களில் ஒருவர் கார்த்தி. நடிகர்  சிவகுமாரின் மகன், சூர்யாவின் தம்பி கார்த்தி. பருத்திவீரன், ஆயிரத்தில் ஒருவன், பையா, நான் மகான் அல்ல, கைதி, சர்தார் என பல படங்களில் நடித்து தனக்கென்று தனி ரசிகர்கள் கூட்டத்தை உருவாக்கிக் கொண்டுள்ளார்.


வெற்றிக்கு போராடும் கார்த்தி:


நடிகர் கார்த்திக்கிற்கு கைதி படத்திற்கு பிறகு மிகப்பெரிய வெற்றிப்படம் தமிழில் இதுவரை கிடைக்கவில்லை என்றே கூற வேண்டும். கடைசியாக வெளியான சர்தார் படம் அவருக்கு வெற்றிப்படமாக அமைந்தது. பொன்னியின் செல்வனின் இரண்டு பாங்களுக்கும் கலவையான விமர்சனமே கிடைத்தது.


கடைசியாக குக்கூ இயக்குனர் ராஜூமுருகன் இயக்கத்தில் கார்த்தி நடிப்பில் வெளியான ஜப்பான் படம் படுதோல்வியைச் சந்தித்தது. இது கார்த்தி ரசிகர்களுக்கும் ஏமாற்றமான படமாக அமைந்தது. இந்த சூழலில், நடிகர் கார்த்தி நடிப்பில் உருவாகியுள்ள மெய்யழகனின் டீசர் நேற்று வெளியானது.

எதிர்பார்ப்பை ஏற்படுத்தியுள்ள மெய்யழகன்:


ரத்தம், கத்தி, அரிவாள் என்று எதுவும் இல்லாமல் மிகவும் மென்மையான கிராமத்து வாசனையில் வெளியாகியுள்ள இந்த படத்தின் டீசர் பலருக்கும் மகிழ்ச்சியை ஏற்படுத்தியுள்ளது. தமிழ் சினிமாவில் நீண்ட வருடங்களாகவே கத்தி, ரத்தம், சண்டை இல்லாமலே முழு நீள திரைப்படங்கள் வெளியாகாமல் இருந்து வருகிறது. இந்த சூழலில், இப்படியொரு படத்தின் டீசர் வெளியாகி இருப்பது தமிழ் சினிமா ரசிகர்களுக்கும், கார்த்தி ரசிகர்களுக்கும் மகிழ்ச்சியை ஏற்படுத்தியுள்ளது.


டெல்டா மண்ணை கதைக்களமாக கொண்டு உருவாகியுள்ள இந்த படத்தை 96 படத்தை இயக்கிய பிரேம்குமார் இயக்கியுள்ளார். கோவிந்த் வசந்தா இசையமைத்துள்ளார். அர்விந்த் சுவாமி இந்த படத்தில் கார்த்திக்கிற்கு இணையான கதாபாத்திரத்தில் நடித்துள்ளார். சூர்யா – ஜோதிகாவின் 2டி என்டர்டெயின்மெண்ட் தயாரித்துள்ள இந்த படத்தில் நடிகர் ராஜ்கிரண், ஸ்ரீதிவ்யா, ஜெயபிரகாஷ், தேவதர்ஷினி, கருணாகரன், இளவரசு ஆகியோர் முக்கிய கதாபாத்திரத்தில் நடித்துள்ளனர். கிராமத்து கதாபாத்திரத்தில் வெள்ளந்தியான தோற்றத்தில் கார்த்தி நடித்துள்ளார்.  


கம்பேக் தருவாரா கார்த்தி?


ப்ளாக்பஸ்டர் படம் கொடுத்து நீண்ட வருடங்களான கார்த்திக்கிற்கு இந்த படம் கடைக்குட்டி சிங்கம் போல குடும்பங்கள் கொண்டாடும் படமாக அமையும் என்று எதிர்பார்க்கப்படுகிறது. வரும் 27ம் தேதி வெளியாக உள்ள இந்த படத்தை ரசிகர்கள் மிகுந்த ஆவலுடன் எதிர்பார்த்து காத்துள்ளளனர்.


மேலும், படத்தின் வெளியீட்டு தேதியில் ஆங்கில தேதி மட்டுமின்றி புரட்டாசி 11 என்று தமிழ் தேதியையும் குறிப்பிட்டு படக்குழு அறிவித்திருப்பது ரசிகர்களுக்கு மேலும் மகிழ்ச்சியை ஏற்படுத்தியுள்ளது.