பிரபல நடிகர் ஹரிஷ் கல்யாண் தனது ட்விட்டர் பக்கத்தில் தான் திருமணம் செய்யவிருக்கும் பெண்ணின் புகைப்படத்தை பகிர்ந்துள்ளார்.
ஹரிஷ் கல்யாண் தனது ட்விட்டர் பக்கத்தில் வெளியிட்டுள்ள அறிக்கையில், “அன்புள்ள அனைவருக்கும், என்னுடைய குழந்தைப் பருவத்திலிருந்தே எந்த நிபந்தனைகளும் அற்ற அன்பையும் பாசத்தையும் வாழ்நாள் முழுவதும் அனுபவிக்கும் அதிரஷ்டம் எனக்கு கிடைத்தது.
என்னுடைய ஒவ்வொரு சிறிய கனவையும் என் பெற்றோர் ஊக்குவித்தார்கள். அதுபோலவே இப்போது நீங்கள் அனைவரும் எனக்கு மிகவும் அன்பையும் ஆதரவையும் காட்டி வருகிறீர்கள். நீங்கள் ஒவ்வொருவரும் சினிமா உலகில் எனது சிறு சிறு வெற்றிகளை பதிக்க உதவியவர்கள், ஒவ்வொரு வெற்றியையும் மைல்கல்லையும் உங்களுடன் பகிர்ந்துகொள்வது எனது பயணத்தின் மிகவும் திருப்திகரமான பகுதியாகும்.
இப்போது மகிழ்ச்சி நிறைந்த இதயத்துடன், எனது தனிப்பட்ட வாழ்க்கையில் துவங்க உள்ள முக்கியமான பயணத்தின் தொடக்கத்தை உங்களுடன் பகிர்ந்து கொள்ள எழுதுகிறேன். எங்கள் பெற்றோர்கள் குடும்பத்தினர், திரையுலக நண்பர்கள், அன்பான ரசிகர்கள், ஊடகங்கள்/பத்திரிக்கை நண்பர்கள் மற்றும் எனது நலம் விரும்பிகள் அனைவரின் ஆசியுடன், நர்மதா உதயகுமார் உடனான எனது திருமணத்தை அறிவிப்பதில் மகிழ்ச்சி அடைகிறேன்.
எங்களை நாங்களே புதுப்பித்துக் கொள்ளும் இந்த புதிய வாழ்க்கைப் பயணத்தைத் தொடங்கும் நேரத்தில், இப்போதும் எப்போதும் உங்கள் அனைவரிடமிருந்தும் இரட்டிப்பு ஆசீர்வாதங்களையும் அன்பையும் நாங்கள் எதிர்பார்க்கிறோம்” என தெரிவித்துள்ளார்.
முன்னதாக இன்று காலையில் தனது வாழ்க்கை துணையோடு கைகோர்த்து இருக்கும் புகைப்படத்தை பதிவிட்டு “புதிய மங்களகரமான தொடக்கம்” என்று ஹரிஷ் கல்யாண் பதிவிட்டிருந்தார். திரையுலகைப் பொறுத்தவரை தமிழ் சினிமாவில் வளர்ந்துவரும் நடிகர்களில் ஹரிஷ் கல்யாணும் ஒருவர். தற்போது இவருக்கென்று தனி ரசிகர் வட்டம் இருக்கிறது.
‘சிந்து சமவெளி’ படம் மூலம் அறிமுகமான ஹரிஷ் கல்யாண் அதில் கிடைத்த பிரபலத்தின் வாயிலாக பிக்பாஸ் சீசன் 1 லும் போட்டியாளராக கலந்து கொண்டு அங்கும் கவனம் ஈர்த்தார். அதனைத்தொடர்ந்து இவர் நடித்த ‘ப்யார் ப்ரேமா காதல்’, ‘இஸ்பேடு ராஜாவும் இதய ராணியும்’ ‘தாராள பிரபு’ உள்ளிட்ட படங்களுக்கு இளைஞர்கள் மத்தியில் பெரும் வரவேற்பு கிடைத்தது. இதனையடுத்து ப்ரியா பவானி சங்கருடன் அவர் நடித்த ‘ஓ மன பெண்ணே’ படத்தில் நடித்தார். இந்தப்படத்தின் போது நெருங்கிய பழகியதாக தகவல்கள் வெளியாகியது.
தொடர்ந்து ஜி.வி. பிரகாஷை வைத்து ‘அடங்காதே’ படத்தை இயக்கிய சண்முகம் முத்துசாமி இயக்கத்தில் ‘டீசல்’ மற்றும் ஸ்டார் ஆகிய படங்களில் நடித்து வருகிறார். இதில் ‘டீசல்’ படத்தின் ஃபர்ஸ்ட் லுக் போஸ்டர்கள் சமூக வலைதளங்களில் வெளியாகி வரவேற்பை பெற்றது குறிப்பிடத்தக்கது.