நடிகர் எஸ்.ஜே.சூர்யாவோடு நடிக்க பயந்ததாக பொம்மை படத்தின் செய்தியாளர் சந்திப்பில்  நடிகை சாந்தனி தெரிவித்துள்ளார். 


அழகியே தீயே படத்தின் மூலம் தமிழ் சினிமாவில் இயக்குநராக அறிமுகமானவர் ராதா மோகன். யதார்தமான காட்சிகளால் ரசிகர்களை கவர்ந்த அவர் பொன்னியின் செல்வன், மொழி, அபியும், நானும், பயணம், காற்றின் மொழி உள்ளிட்ட படங்களை இயக்கியுள்ளார். அடுத்ததாக ராதாமோகன் இயக்கத்தில் எஸ்.ஜே.சூர்யா, பிரியா பவானி ஷங்கர், சாந்தினி உள்ளிட்ட பலரும் நடித்துள்ள ‘பொம்மை’ படம் உருவாகியுள்ளது. யுவன் சங்கர் ராஜா இசையமைத்துள்ள இப்படம் வரும் ஜூன் 16 ஆம் தேதி தியேட்டரில் வெளியாகிறது. 


இதனிடையே பொம்மை படத்தின் செய்தியாளர் சந்திப்பு நேற்று நடைபெற்றது. இதில் பேசிய நடிகை பிரியா பவானி ஷங்கர், “பொம்மை படம் நான் ஆசைப்பட்டு பண்ணிய படம். ரொம்ப நாளா எதிர்பார்த்துக் கொண்டிருக்கும் படம். ஜூன் 16 ஆம் தேதி வெளியாகிறது. இது 200% ராதாமோகனின் படம். அதற்கு மேல எதுவும் சொல்லவே வேண்டாம். ஒவ்வொரு காட்சிக்கும் அவர் வைக்கும் வலிமையே அவரது திறமையை சொல்லி விடும். அவருடன் வேலை பார்த்தது நல்ல அனுபவம்.


அதேபோல் எஸ்.ஜே.சூர்யாவோடு இது எனக்கு 2வது படம். முந்தைய படத்துல அவர் ஹீரோ மட்டும் தான். பொம்மை படத்தில் எஸ்.ஜே.சூர்யா தயாரிப்பாளராகவும் உள்ளார். அவர் நெருப்பு மாதிரி இருப்பார். அவர் நடிக்கிறதைப் பார்ப்பதே தனி அனுபவம் தான். 20,30 டேக் எடுத்தாலும் எனர்ஜி குறையாமல் விதவிதமாக நடித்துக் கொடுப்பார். ஷூட்டிங் ஸ்பாட்டில் அதை பார்க்க விளையாட்டாக தோன்றினாலும் ஸ்கிரீனில் பார்க்கும்போது அவரது உழைப்பு தெரிகிறது” என கூறினார்.


தொடர்ந்து பேசிய நடிகை சாந்தினி, இந்த படம் எனக்கு மிகவும் நினைவுக்கூரத்தக்க படமாக அமைந்துள்ளது. நான் ரொம்ப என்ஜாய் பண்ண கேரக்டர். முதல்முறையாக ராதாமோகன் அலுவலகத்தில் இருந்து போன் வந்த போது ரொம்ப ஆர்வமாக இருந்தது. இந்த படத்தில் என்னுடைய எதார்த்தமான நடிப்பை அவர் வெளிப்படுத்த உதவினார். எஸ்.ஜே.சூர்யாவின் நடிப்புக்கு மிகப்பெரிய ரசிகை நான். எல்லோரையும் சமமாக மதிப்பார். எவ்வளவு பிஸியாக இருந்தாலும் மற்ற படங்களுக்கும் சப்போர்ட் செய்தார். ஷூட்டிங்கில் ஒருநாள் பயங்கரமாக கத்திக் கொண்டு இருந்தார். நான் நடிக்க பயந்தேன். ஆனால் காட்சியில் நடிக்க வந்தபோது ரொம்ப கூலாக நடித்தார். அவரின் அர்ப்பணிப்பை கண்டு நான் வியந்தேன்.  


மேலும் படிக்க: S.J.Suryah: 'சம்பாதித்த பணத்தையெல்லாம் சினிமாவிலேயே இழந்தேன்’ .. வேதனையுடன் பேசிய எஸ்.ஜே.சூர்யா..!