தமிழ் சினிமாவில் ரசிகர்களிடையே அடுத்த சூப்பர் ஸ்டார் யார் என்ற பிரச்சினை எழுந்துள்ள நிலையில், இணையத்தில் வீடியோ ஒன்று வைரலாகியுள்ளது. 


தமிழ் சினிமாவின் சூப்பர் ஸ்டார் 


திரையுலகை பொறுத்தவரை நடிகர், நடிகை, இசையமைப்பாளர், இயக்குநர் என ஒவ்வொருவரையும் ரசிகர்கள் விதவிதமான அடைமொழியுடன் அழைக்கின்றனர். உதாரணமாக சூப்பர் ஸ்டார் என அந்த பட்டம் ஒவ்வொரு மொழி திரையுலகிலும் உள்ளது. தமிழ் சினிமாவை பொறுத்தவரை சூப்பர் ஸ்டார் என சொன்னால், சின்ன குழந்தை கூட ரஜினியின் பெயரை சொல்லும் அளவுக்கு கடந்த 48 ஆண்டுகளாக முன்னணி நடிகராக உள்ளார். 


அவருடன் நடித்தவர்கள், பின்னால் வந்தவர்கள் எல்லாம் ஒரு கட்டத்தில் நின்று விட்டாலும் அல்லது தனக்கென தனி பாணியை கடைபிடித்து சென்று விட்டாலும் யாரும் ரஜினி படங்கள் செய்த சாதனையை நெருங்க முடியவில்லை என்பதே உண்மை. அவர் சும்மா ஸ்க்ரீனில் வந்து நின்னாலே போதும் .. இங்கு சில்லறையை சிதறவிடும் ரசிகர்கள் ஏராளம். ஸ்டைலையும் மனிதர்களையும் அடித்துக் கொள்ள முடியாது. அப்படி விதவிதமான மேனரிசங்களில் ஸ்டைல் காட்டும் பிரபலங்களை கொண்டாடவே செய்வார்கள். 


அடுத்த சூப்பர் ஸ்டார்


அதிலும் ரஜினி என்றால் சொல்லவா வேண்டும். இப்படி ரஜினி ஏன் சூப்பர் ஸ்டாராக கொண்டாடப்படுகிறார் என்பதை கேட்டால் பக்கம் பக்கமாக அவரது ரசிகர்கள் காரணத்தை அடுக்குவார்கள். அதேசமயம் திரையுலகில் மார்க்கெட் நிலவரத்தை பொறுத்தே தற்போதைய சூப்பர் ஸ்டார்,அடுத்த சூப்பர் ஸ்டார் என்றெல்லாம் வரையறுக்கிறார்கள். அப்படி ரஜினியை தொடந்து விஜய், அஜித் போன்றவர்கள் முன்னணியில் உள்ளனர். 


இவர்கள் இருவரில் விஜய் தான் அடுத்த சூப்பர் ஸ்டார் என்ற பேச்சு பலமாக அடிபடுகிறது. ரசிகர்களும் சரி, திரையுலகைச் சேர்ந்த சிலரும் சரி, படங்களின் வசூல் நிலவரம், மக்களின் மனநிலை இவற்றை வைத்து கணக்கிட்டு சொல்கிறார்கள். இதனிடையே கடந்த ஜூலை 28 ஆம் தேதி ரஜினிகாந்த் நடித்த ஜெயிலர் படத்தின் ஆடியோ வெளியிட்டு விழா நடைபெற்றது. இதில் பேசிய ரஜினி, பிரச்சினைகளை கண்டுகொள்ளாமல் முன்னேற வேண்டும் என சொல்வதறாக காகம் - கழுகு கதை ஒன்றை சொல்லினார். 


வைரலாகும் வீடியோ


உடனே விஜய்யை தான் காகம் என ரஜினி சொல்லாமல் சொல்கிறார் என்ற விவாதம் எழுந்தது. சமூக வலைத்தளங்களில் இருதரப்பு ரசிகர்களும் கருத்து மோதலில் ஈடுபட்டனர். நிலவரம் கலவரமாகி கொண்டு இருக்கும் நிலையில் இன்ஸ்டாகிராமில் வீடியோ ஒன்று வைரலாகி வருகிறது. அதில், இந்தியில் பிரபுதேவா இயக்கத்தில் அக்‌ஷய் குமார் நடித்த ரவுடி ரத்தோர் படத்தில் விஜய் ஒரு பாடலில் சில காட்சிகள் தோன்றியிருப்பார். அப்போது விஜய் வருவதை பார்க்கும் அக்‌ஷய் குமார், பிரபுதேவாவிடம் ‘சூப்பர் ஸ்டார் விஜய்’ என சொல்வார். இப்படியான காட்சிகள் அந்த வீடியோவில் உள்ளது.