நடிகர் அஜித்குமார் நடித்துள்ள துணிவு படத்தில் இருந்து 2 ஆம் பாடலாக ‘காசேதான் கடவுளடா’ பாடல் இன்று வெளியாகும் என படக்குழு அறிவித்துள்ளது.
போனி கபூர் தயாரிப்பில் ஹெச். வினோத் இயக்கத்தில் நடிகர் அஜித் குமார் நடித்துள்ள திரைப்படம் 'துணிவு'. இதில் அஜித்துக்கு ஜோடியாக மலையாள திரையுலகின் முன்னணி நடிகையான மஞ்சு வாரியர் நடித்துள்ள இப்படத்திற்கு இசையமைத்துள்ளார் ஜிப்ரான். போனிகபூர்- இயக்குநர் ஹெச்.வினோத் கூட்டணியில் 3வது முறையாக அஜித் மூன்றாவது முறையாக இணைந்துள்ளதால் இப்படத்திற்கு பெரிய எதிர்பார்ப்பு நிலவுகிறது.
துணிவு படத்தின் திரையரங்க விநியோக உரிமையை நடிகர் உதயநிதி ஸ்டாலினின் ரெட் ஜெயன்ட் மூவிஸ் நிறுவனம் கைப்பற்றியுள்ள நிலையில் கடந்த செப்டம்பர் 22 ஆம் தேதி துணிவு படத்தின் டைட்டில் மற்றும் ஃபர்ஸ்ட் லுக் போஸ்டர்கள் வெளியாகியது. இதனைத் தொடர்ந்து படத்தின் முதல் பாடலாக ‘சில்லா சில்லா’ பாடல் கடந்த டிசம்பர் 9 ஆம் தேதி வெளியாகி ரசிகர்களிடையே நல்ல வரவேற்பை பெற்றது.
வைசாக் எழுதிய இப்பாடலை இசையமைப்பாளர் அனிருத் பாடியுள்ளார். இப்பாடல் யூட்யூப் ட்ரெண்டிங்கில் முதல் இடத்தில் உள்ளது. . 2023 ஆம் ஆண்டு பொங்கலுக்கு துணிவு வெளியாகும் என தெரிவிக்கப்பட்டுள்ள நிலையில், அதே நாளில் நடிகர் விஜய்யின் வாரிசு படமும் வெளியாகவுள்ளதால் ரசிகர்கள் ஆவலுடன் காத்திருக்கின்றனர். இந்நிலையில் துணிவு படத்தின் அடுத்த பாடல் எப்போது வெளியாகும் என்பதை தயாரிப்பாளர் போனி கபூர் தனது சமூக வலைத்தளப் பக்கத்தில் இரவு 11 மணிக்கு தெரிவித்துள்ளார்.
அதன்படி இன்று (டிசம்பர் 18) மதியம் 2 மணிக்கு “காசேதான் கடவுளடா” என தொடங்கும் பாடல் வெளியாகும் என தெரிவித்துள்ளார். இதனால் அஜித் ரசிகர்கள் Money Money Money, KasethanKadavulada, #ThunivuSecondSingle ஆகிய ஹேஸ்டேக்குகளில் தங்கள் மகிழ்ச்சியை வெளிப்படுத்தி வருகின்றனர்.