உலக நாயகன் கமல்ஹாசன் நான்கு வேடங்களில் நடித்து அசத்தியிருந்த படம்தான் 'மைக்கேல் மதன காமராஜன்’. 1990 ஆம் ஆண்டு வெளியான இந்த படத்தை சிங்கீதம் சீனிவாசராவ் இயக்கியிருந்தார். படத்திற்கு திரைக்கதையை கமல்ஹாசன் எழுதியிருந்தார். வசனங்களை மறைந்த கிரேஸி மோகன் எழுதியிருந்தார். நகைச்சுவை படமாக உருவான மைக்கேல் மதன காமராஜன் இன்றும் பலருக்கு ஃபேவரேட். இந்நிலையில் கடந்த இரண்டு வாரங்களுக்கு முன்னர் பிரேமம் திரைப்பட இயக்குநர் அல்ஃபோன்ஸ் புத்திரன் முகநூல் வாயிலாக கமல்ஹாசனிடம் ஒரு கேள்வி கேட்டிருந்தார். ”மைக்கேல் மதன காமராஜன் படம் ஒரு பட்டப்படிப்பு போன்றது அதனை எப்படி செய்தீர்கள்” என கேட்டிருந்தார’ அதற்கு பதிலளித்த கமல்ஹாசன் “ பல வருடங்கள் கழித்து அந்த படம் குறித்து பேசுவது எனக்கு நிறைய பாடங்களை கற்றுக்கொடுக்கிறது. மைக்கேல் மதன காமராஜன் படம் ஒரு மாஸ்டர் பீஸ், விரைவில் அது குறித்து விளக்குகிறேன் நன்றி அல்போன்ஸ் புத்திரன்” என தெரிவித்திருந்தார்.
பலராலும் பாராட்டப்பட்ட பாலக்காடு காமேஷ்வரன் கதாபாத்திரத்தில் பேசிய மலையாள மொழியை தனது நண்பர்கள் மற்றும் மலையாள திரைப்பட அனுபவங்கள் மூலம் கற்றதாகவும், தனது முதல் மனைவி ஒரு பாலக்காடு பிராமண பெண் எனவும் குறிப்பிட்டுள்ளார். மேலும் இன்றளவும் புகழ்பெற்ற மைக்கேல் மதன காமராஜன் க்ளைமேக்ஸ் காட்சிக்காக தான் அப்போது வரைந்த சாம்பிள் புகைப்படம் ஒன்றையும் பகிர்ந்துள்ளார். இது தவிற மற்ற கதாபாத்திரங்களின் பங்களிப்பு மற்றும் அவை உருவான விதம் குறித்தும் தனது சமூக வலைதள பக்கங்களில் பகிர்ந்துள்ளார் கமல்ஹாசன்.