2025- 26ஆம் கல்வி ஆண்டில், 12ஆம் வகுப்பு பொதுத்தேர்வு எழுத உள்ள மாணவர்களின் பெயர்ப் பட்டியலில் திருத்தம் செய்ய நவம்பர் 7ஆம் தேதி வரை அவகாசம் அளிக்கப்பட்டு உள்ளது.

Continues below advertisement


முன்னதாக அக்டோபர் 21ஆம் தேதி முதல் 31ஆம் தேதி வரை அவகாசம் அளிக்கப்பட்டு இருந்த நிலையில், தற்போது அவகாசம் நவம்பர் 7ஆம் தேதி வரை நீட்டிக்கப்பட்டு உள்ளதாக அரசுத் தேர்வுகள் இயக்ககம் தெரிவித்துள்ளது. இதுதொடர்பான அறிவிப்பை, அரசுத் தேர்வுகள் இயக்குநர் சசிகலா, அனைத்து மாவட்ட அரசுத் தேர்வுகள் உதவி இயக்குநர்களுக்கு அனுப்பி உள்ளார்.


பெயர்ப் பட்டியல் தயாரிப்பு


மேல்நிலை முதலாம்‌ ஆண்டு பொதுத்‌ தேர்வெழுதிய பள்ளி மாணவர்களின்‌ பெயர்ப் பட்டியலினை அடிப்படையாகக்‌ கொண்டு, மேல்நிலை இரண்டாம்‌ ஆண்டு பொதுத்‌ தேர்விற்கான பள்ளி மாணவர்களின்‌ பெயர்ப் பட்டியல்‌ தயாரிக்கப்பட உள்ளது.


அனைத்து மேல்நிலை பள்ளித்‌ தலைமையாசிரியர்களும்‌ www.dge.tn.gov.in என்ற இணையதள முகவரிக்கு சென்று, தங்கள்‌ பள்ளிக்கு அரசுத்‌ தேர்வுகள்‌ இயக்ககத்தால்‌ வழங்கப்பட்டுள்ள யூசர் ஐடி மற்றும் பாஸ்வேர்டைப் பயன்படுத்தி, மேல்நிலை இரண்டாம்‌ ஆண்டு பொதுத்‌ தேர்வெழுதவுள்ள தங்களது பள்ளி மாணவர்களின்‌ நிரந்தரப்‌ பதிவண்‌, பெயர்‌, பிறந்த தேதி, பாடத்தொகுதி உள்ளிட்ட விவரங்கள்‌ அடங்கிய பட்டியலை பதிவிறக்கம்‌ செய்துகொள்ள வேண்டும்‌.


என்னென்ன வழிமுறைகள்?



  1. பதிவிறக்கம்‌ செய்யப்பட்ட மாணவர்‌ விவரம்‌ அடங்கிய பட்டியலில்‌, தங்கள்‌ பள்ளியில்‌ பயிலும்‌ மாணவர்களது பெயர்‌ தமிழ்‌ மற்றும்‌ ஆங்கிலத்தில்‌ (Initial and Spelling Mistake only), புகைப்படம் மற்றும் பிறந்த தேதி ஆகியவற்றில்‌ திருத்தங்கள்‌ இருப்பின்‌, அதன்‌ விவரங்களை பத்தாம்‌ வகுப்பு மதிப்பெண்‌ சான்றிதழின்‌ நகலுடன்‌ இணைத்து சம்பந்தப்பட்ட மாவட்ட அரசுத்‌ தேர்வுகள்‌ உதவி இயக்குநர்‌ அலுவலகத்தில்‌ ஒப்படைக்க வேண்டும்‌. 

  2. பத்தாம்‌ வகுப்பு பொதுத்‌ தேர்வெழுதிய பின்னர்‌, அரசிதழில்‌ பதிவுசெய்து பெயர்‌ மாற்றம்‌ செய்த மாணாக்கர்களுக்கு மட்டும்‌, பத்தாம்‌ வகுப்பு சான்றிதழில்‌ உள்ளவாறு இல்லாமல்‌ அரசிதழில்‌ உள்ளவாறு பெயரை மாற்றம்‌ செய்துகொள்ள அனுமதிக்கப்படும்‌.

  3. பதிவிறக்கம்‌ செய்யப்பட்ட மாணவர்‌ விவரம்‌ அடங்கிய பட்டியலில்‌, மாணவர்‌ பெயர்‌, தலைப்பெழுத்து விடுபட்டிருப்பின்‌, தமிழில்‌ தவறாக இருப்பின்‌ அதனை முழுமையாக நீக்கம்‌ செய்து, மீண்டும்‌ யூனிகோட் எழுத்தில்‌ சரியான பெயரை தமிழில்‌ தட்டச்சு செய்தால்‌ மட்டுமே இதனை சரிசெய்ய இயலும்‌.

  4. மாணவரது பெயர்ப்பட்டியலில்‌ திருத்தங்கள்‌ மேற்கொள்வதற்கு அம்மாணவருக்கு பெயர்ப் பட்டியலில்‌ வழங்கப்பட்டுள்ள ஜி.ஆர். எண்‌ குறிப்பிட்டு திருத்தங்கள்‌ குறித்த விவரங்களை மேற்கொள்ள வேண்டும்‌.

  5. பெயர்ப் பட்டியலில்‌ திருத்தங்கள்‌ மற்றும்‌ சேர்க்கை போன்றவற்றினை எவ்வாறு மேற்கொள்வது தொடர்பான விவரங்களை www.dge.tn.gov.inஎன்ற இணையதளத்தில்‌ அறிந்து கொள்ளலாம்‌ என்று அரசுத் தேர்வுகள் இயக்ககம் தெரிவித்துள்ளது.