தீபாவளி பண்டிகையை ஒட்டி, பள்ளி, கல்லூரிகள் உள்ளிட்ட கல்வி நிலையங்களுக்கு நாளை (அக்.30) அரை நாள் விடுமுறை விடுமுறை அளிக்கப்படுவதாக தமிழ்நாடு அரசு அறிவித்துள்ளது.
தீபாவளி திருநாள் (Deepavali, Diwali) என்பது பொதுவாக ஐந்து நாட்கள் கொண்டாடப்படுகின்ற ஒரு பண்டிகையாகும். வாழ்க்கையின் இருளை நீக்கி, ஒளியைக் கொடுக்கும் பண்டிகையாக தீபாவளி கருதப்படுகிறது. இது இந்து, சீக்கியம், சைனம் மற்றும் பௌத்த மதங்களிடையே மிகவும் பிரபலமான பண்டிகைகளில் ஒன்றாகும். இப்பண்டிகை இந்தியா, இலங்கை, சிங்கப்பூர் உட்பட பல நாடுகளில் கொண்டாடப்படுகிறது. இந்த நிலையில் 2024ஆம் ஆண்டுக்கான தீபாவளி பண்டிகை அக்டோபர் 31ஆம் தேதி அன்று கொண்டாடப்படுகிறது.
ஏற்கெனவே அறிவிக்கப்பட்ட நவம்பர் 1 விடுமுறை
தீபாவளி வியாழக்கிழமை அன்று வருவதால், அடுத்த நாளான வெள்ளி அன்று அரசு விடுமுறை அளிக்க வேண்டும் என்று அரசு ஊழியர்களும் மாணவர்களும் கோரிக்கை விடுத்தனர். சொந்த ஊர்களுக்குச் சென்று வர ஏதுவாக இருக்கும் என்றும் அவர்கள் தெரிவித்து இருந்தனர். இதை அடுத்து, தீபாவளிக்கு மறுநாள் அரசு விடுமுறை அளிக்கப்படுவதாக தமிழக அரசு அறிவித்து இருந்தது.
இந்த நிலையில் தீபாவளிக்கு முந்தைய நாளான நாளை அரை நாள் விடுமுறை அளிக்கப்பட்டுள்ளது. இதுகுறித்துத் தமிழக அரசு இன்று வெளியிட்டுள்ள அறிவிப்பில், ’’தமிழ்நாட்டில் தீபாவளி பண்டிகையை முன்னிட்டு, பள்ளிகள், கல்லூரிகள் மற்றும் கல்வி நிறுவனங்கள் நாளை முற்பகல் மட்டும் செயல்படும். பிற்பகல் அரை நாள் விடுமுறை அறிவிக்கப்படுகிறது’’ என்று தெரிவிக்கப்பட்டு உள்ளது.
நான்கரை நாட்களுக்குத் தொடர் விடுமுறை
இதன் மூலம் தீபாவளிக்கு முந்தைய நாளாக அக்டோபர் 30 புதன் பிற்பகல், தீபாவளி நாளான அக்டோபர் 31 வியாழக்கிழமை, நவம்பர் 1ஆம் தேதி வெள்ளிக்கிழமை, அடுத்த நாளான சனிக்கிழமை, வார விடுமுறை ஞாயிற்றுக் கிழமை ஆகிய நான்கரை நாட்களுக்குத் தொடர் விடுமுறை அளிக்கப்பட்டு உள்ளது. இதனால் அரசு ஊழியர்களும் மாணவர்களும் உற்சாகம் அடைந்துள்ளனர்.
எனினும் நாளை கல்வி நிறுவனங்களுக்கு மட்டுமே அரை நாள் விடுமுறை அளிக்கப்பட்டுள்ளது குறிப்பிடத்தக்கது.