சென்னை போரூரில் உள்ள ஸ்ரீ ராமச்சந்திரா உயர் கல்வி மற்றும் ஆராய்ச்சி நிறுவனம் 550 பள்ளி மாணவர்களுக்கு இலவசமாக பல்நோக்கு உடல் பரிசோதனை செய்தது உலக சாதனைப் புத்தகத்தில் இடம்பெற்றுள்ளது.
சென்னை போரூரில் உள்ள ஸ்ரீ ராமச்சந்திரா உயர் கல்வி மற்றும் ஆராய்ச்சி நிறுவனம் (SRIHER) சார்ந்த ரோட்ராக்ட் சங்கம் சார்பில் பள்ளி மாணவர்களுக்கு இலவச பல்நோக்கு உடல் பரிசோதனை நடைபெற்றது. இதில் சிறார் நலம், பல், கண், காது, பேச்சு, இயன்முறை, உடல், நுண்ணுயிரியல், சத்துணவு என பல்வேறு துறைகளைச் சார்ந்த 150 மருத்துவர்கள் கலந்து கொண்டனர்.
உலக சாதனை
அதில், 8 முதல் 15 வயது நிரம்பிய 550 மாணவர்களுக்கு இலவசமாக பல்நோக்கு மருத்துவப் பரிசோதனை செய்தனர். இந்த நிகழ்வு வேர்ல்ட் யூனியன் புத்தகத்தில் உலக சாதனையாக இடம்பெற்றுள்ளது.
இந்த சாதனைக்கு காரணமான மருத்துவக் குழுவினரை ஸ்ரீ ராமச்சந்திரா பல்கலைக்கழக வேந்தர் வெங்கடாசலம் அழைத்து கவுரவித்து, சான்றுகளை வழங்கினார்.
ஸ்ரீ ராமச்சந்திரா ராமச்சந்திரா உயர் கல்வி மற்றும் ஆராய்ச்சி நிறுவனம் முன்பு ஸ்ரீ ராமச்சந்திரா பல்கலைக்கழகம் என அறியப்பட்டது. 1985-ல் உருவாக்கப்பட்ட இந்த நிறுவனம், தற்போது 9 உறுப்புக் கல்லூரிகளுடன் செயல்பட்டு வருகிறது. 6 ஆயிரத்துக்கும் மேற்பட்ட மாணவர்கள் இங்கு படித்து வருகின்றனர். 1994ஆம் ஆண்டு இதற்கு நிகர்நிலைப் பல்கலைக்கழக அந்தஸ்து வழங்கப்பட்டது.
2023ஆம் ஆண்டுக்கான மத்திய அரசின் என்ஐஆர்எஃப் தரவரிசைப் பட்டியலில், இந்திய அளவில் ஸ்ரீகர் நிறுவனம் 98ஆம் இடத்தையும் பல்கலைக்கழக அளவில் 57ஆவது இடத்தையும் பெற்றது குறிப்பிடத்தக்கது.