வெளிநாடுகளில் உயர்கல்வி பயில விரும்பும் மாணவர்களுக்கு ஒரு நற்செய்தி வெளியாகியுள்ளது. இதன்படி, கத்தாரின் முன்னணி கல்வி நிறுவனமான 'கத்தார் பல்கலைக்கழகம்' (Qatar University), 2026ஆம் கல்வியாண்டிற்கான முதுகலை மற்றும் முனைவர் பட்ட படிப்புகளுக்கான முழுமையான கல்வி உதவித்தொகைத் திட்டத்தை அறிவித்துள்ளது.
இந்தத் திட்டத்தின் கீழ், தகுதியுள்ள சர்வதேச மாணவர்கள் கத்தாரில் தங்கி தங்களது ஆராய்ச்சிகளை மேற்கொள்ள முடியும். குறிப்பாக, மத்திய கிழக்கு மற்றும் பிற நாடுகளைச் சேர்ந்த மாணவர்களை ஊக்குவிக்கும் வகையில் இந்த உதவித்தொகை வழங்கப்படுகிறது.
கல்வித்தகுதி
இந்த உதவித்தொகைக்கு விண்ணப்பிக்க விரும்பும் மாணவர்கள், அங்கீகரிக்கப்பட்ட பல்கலைக்கழகத்தில் இளங்கலை அல்லது அதற்கு இணையான பட்டம் பெற்றிருக்க வேண்டும். விண்ணப்பதாரர்கள் தங்களது முந்தைய படிப்புகளில் சிறந்த மதிப்பெண்களை (GPA) பெற்றிருப்பது அவசியமாகும். பாடப்பிரிவுகள் அனைத்தும் ஆங்கில வழியில் பயிற்றுவிக்கப்படுவதால், அதற்கேற்ப மொழித்திறன் பெற்றிருக்க வேண்டும்.
என்னென்னசலுகைகள்?
தேர்ந்தெடுக்கப்படும் மாணவர்களுக்குப் பின்வரும் நிதியுதவிகள் முழுமையாக வழங்கப்படும்:
- முழுமையான கல்விக் கட்டண விலக்கு (Tuition Fees).
- பல்கலைக்கழக வளாகத்திலேயே இலவச தங்கும் வசதி.
- பாடப் புத்தகங்களுக்கான கட்டணச் சலுகை.
- ஆண்டுக்கு ஒருமுறை சொந்த ஊருக்குச் சென்று வர இலவச விமான டிக்கெட்.
விண்ணப்பிப்பது எப்படி?
ஆர்வமுள்ள மாணவர்கள் கத்தார் பல்கலைக்கழகத்தின் அதிகாரப்பூர்வ இணையதளப் பக்கத்திற்குச் செல்ல வேண்டும்.
அதாவது, https://www.qu.edu.qa/en-us/ என்ற இணையப் பக்கத்தில் பிப்ரவரி 25, 2026-க்குள் ஆன்லைன் வாயிலாக விண்ணப்பிக்க வேண்டும்.
விண்ணப்ப நடைமுறையில், மாணவர்கள் தங்களது கல்விச் சான்றிதழ்கள், பரிந்துரைக் கடிதங்கள் (Recommendation Letters) மற்றும் தனிப்பட்ட நோக்கம் குறித்த கடிதம் (Personal Statement) ஆகியவற்றைச் சமர்ப்பிக்க வேண்டும். சில குறிப்பிட்ட பாடப்பிரிவுகளுக்கு நேர்காணல்கள் நடத்தப்படலாம்.
விண்ணப்பத்தின் நிலையை பல்கலைக்கழக இணையதளப் பக்கத்திலேயே மாணவர்கள் அவ்வப்போது பார்த்துக் கொள்ளலாம். தகுதியின் அடிப்படையில் தேர்ந்தெடுக்கப்படும் மாணவர்களுக்கு மின்னஞ்சல் மூலம் அதிகாரப்பூர்வ அறிவிப்பு அனுப்பப்படும்.
உலகத்தரம் வாய்ந்த ஆராய்ச்சி வசதிகளுடன், எவ்விதச் செலவுமின்றி கத்தாரில் உயர்கல்வி பயில விரும்புவோருக்கு இது ஒரு பொன்னான வாய்ப்பாகும்.
கூடுதல் விவரங்களுக்கு கத்தார் பல்கலைக்கழகத்தின் https://www.qu.edu.qa/en-us/ என்ற அதிகாரப்பூர்வ இணையதளத்தைப் பார்வையிடலாம்.