மத்தியப் பல்கலைக்கழகங்கள் மற்றும் அதன்கீழ் இயங்கி வரும் கல்வி நிலையங்களில் நடத்தப்படும் இளங்கலை மற்றும் முதுநிலை படிப்புகளில் சேர பல்கலைக்கழகங்களுக்கான பொது நுழைவுத் தேர்வு (Common University Entrance Test - CUET) கட்டாயம் ஆக்கப்பட்டுள்ளது. 2024ஆம் ஆண்டுக்கான க்யூட் இளநிலைத் தேர்வுகள் மே 15, 16, 17, 18, 21, 22 மற்றும் 24 ஆகிய தேதிகளில் நடைபெற்றன. அதேபோல 29ஆம் தேதியும் பேனா – காகித முறையில் நடைபெற்றது.

  


11.13 லட்சம் பேர் எழுதிய தேர்வு


முதல்முறையாக கலப்பு முறையில் அதாவது கணினி வழியிலும் பேனா- காகித முறையிலும் க்யூட் தேர்வு நடைபெற்றது. குறிப்பாக 15 பாடங்களுக்கு பேனா – காகித முறையிலும் 48 பாடங்களுக்கு கணினி முறையிலும் நடைபெற்றது. இந்த க்யூட் தேர்வு நாடு முழுவதும் 13 மொழிகளில் 26 வெளிநாட்டு நகரங்கள் உட்பட 379 நகரங்களில் நடைபெற்றது. 13,47,820 தேர்வர்கள் இந்தத் தேர்வை எழுத விண்ணப்பித்த நிலையில், 11,13,610 பேர் தேர்வை எழுதினர். 


இந்த நிலையில் 2024ஆம் ஆண்டுக்கான தேர்வு முடிவுகள் ஜூன் 30ஆம் தேதி வெளியாகும் என்று எதிர்பார்க்கப்பட்டு வந்தது. எனினும் நீட், நெட் உள்ளிட்ட நுழைவுத் தேர்வுகளில் நடந்த முறைகேடுகள், மோசடிகள், ஆள்மாறாட்டங்கள் காரணமாக யுஜிசி நெட் தேர்வு ரத்து செய்யப்பட்டது. சிஎஸ்ஐஆர் தேர்வு ஒத்திவைக்கப்பட்டது. முதுகலை நீட் தேர்வும் தள்ளி வைக்கப்பட்டது. இதனால் க்யூட் தேர்வு முடிவுகளும் தாமதமாகி வந்தது.


தேர்வு முடிவுகள் வெளியீடு


இதற்கிடையே உத்தேச விடைக் குறிப்புகள் ஜூலை 6ஆம் தேதி வெளியாகின. சில மாணவர்கள் சில விடைகளுக்கு ஆட்சேபனை தெரிவித்த நிலையில், ஜூலை 19ஆம் தேதி சுமார் 1000 மாணவர்களுக்கு மறு தேர்வு நடத்தப்பட்டது. தொடர்ந்து திருத்தப்பட்ட உத்தேச விடைக் குறிப்புகள் ஜூலை 22ஆம் தேதி வெளியிடப்பட்டன.


தொடர்ந்து க்யூட் தேர்வு முடிவுகள் நேற்று (ஜூலை 28) இரவு வெளியாகின. இதைக் காண்பது எப்படி என்று பார்க்கலாம்.



  • தேர்வர்கள் https://exams.nta.ac.in/CUET-UG/ என்ற இணைப்பை க்ளிக் செய்யவும்.

  • அதில், https://exams.nta.ac.in/CUET-UG/CUETUG2024SC28.html என்ற பக்கம் தோன்றும்.

  • தொடர்ந்து https://cuetug.ntaonline.in/frontend/web/scorecard/index என்ற இணைப்பை க்ளிக் செய்யவும்.

  • அதில் விண்ணப்ப எண், பிறந்த தேதி, தேர்வர் இ- மெயில், மொபைல் எண், பாதுகாப்பு எண் ஆகியவற்றை உள்ளிட்டால் போதும்.

  • க்யூட் தேர்வு முடிவுகள் திரையில் தோன்றும்.


சாதி வாரி, பாலினம், மாநிலம், மொழி வாரியான கூடுதல் தகவல்களை https://exams.nta.ac.in/CUET-UG/images/press-release-for-declaration-of-nta-score-for-cuet-ug-2024-dated-28-july-2024.pdf என்ற இணைப்பை க்ளிக் செய்து காணலாம். 


மாணவர்கள் நிம்மதி


நாடு முழுவதும் பொறியியல், மருத்துவம் ஆகிய தொழில்முறைப் படிப்புகளைத் தவிர, பிற படிப்புகளுக்கெல்லாம் மாணவர் சேர்க்கை பெரும்பாலும் முடிந்துவிட்டது. இந்த நிலையில், கலை, அறிவியல் படிப்புகளுக்கு நடத்தப்படும் நுழைவுத் தேர்வு முடிவுகள் தற்போது வெளியாகி உள்ளதால், மாணவர் சேர்க்கை தொடங்கும் என நிம்மதி அடைந்துள்ளனர்.