தனித் தேர்வர்களுக்கான எட்டாம் வகுப்பு பொதுத் தேர்வுக்கு நாளை முதல் விண்ணப்பிக்கலாம் என்று அரசுத் தேர்வுகள் இயக்ககம் அறிவிப்பு வெளியிட்டுள்ளது.
இதுகுறித்து அரசுத் தேர்வுகள் இயக்ககம் இன்று தெரிவித்துள்ளதாவது:
’’ 1. ஆன்லைன் மூலம் விண்ணப்பப் பதிவு
ஆகஸ்ட் 2023-ல் நடைபெறவுள்ள தனித் தேர்வர்களுக்கான எட்டாம் வகுப்புப் பொதுத்தேர்விற்கு 01.08.2023 அன்று 12 1/2 வயது பூர்த்தி அடைந்த தனித் தேர்வர்கள் நாளை (20.06.2023) பிற்பகல் முதல் 28.06.2023 வரை விண்ணப்பிக்கலாம். குறிப்பாகத் தேர்வர்கள் www.dge.tn.gov.in என்ற தளத்தில் குறிப்பிட்டுள்ள சேவை மையங்களுக்கு (Service Centre) நேரில் சென்று ஆன்லைன் மூலம் பதிவு செய்து கொள்ளலாம்.
2. தேர்வுக் கட்டண விவரம்
விண்ணப்பித்த பின், தேர்வுக் கட்டணம் ரூ.125/- மற்றும் ஆன்லைன் பதிவுக் கட்டணம் ரூ.70/- என மொத்தம் ரூ.195/-ஐ பணமாக சேவை மையங்களில் நேரடியாகச் செலுத்தலாம்.
மேற்குறிப்பிட்ட நாட்களில் விண்ணப்பிக்கத் தவறியவர்கள் 30.06.2023 மற்றும் 01.07.2023 ஆகிய நாட்களில் தேர்வு கட்டணத்துடன் தட்கல் விண்ணப்ப கட்டணத் தொகையாக ரூ.500/-ஐ கூடுதலாக செலுத்தி பதிவு செய்து கொள்ளலாம்.
3. விண்ணப்பத்துடன் இணைக்க வேண்டியவை
* முதன்முறையாக தேர்வெழுத விண்ணப்பிப்பவர்கள்
விண்ணப்பதாரர்கள் ஆன்லைன் விண்ணப்பத்துடன் சான்றிடப்பட்ட தங்களது பள்ளி மாற்றுச் சான்றிதழ் நகல் / பள்ளி பதிவுத் தாள் நகல் / பிறப்புச் சான்றிதழ் நகல், இவற்றில் ஏதேனும் ஒன்றினை இணைத்த சமர்ப்பிக்க வேண்டும்
* ஏற்கனவே எட்டாம் வகுப்பு பொதுத் தேர்வெழுதி தோல்வி அடைந்த பாடத்தைத் தேர்வெழுத விண்ணப்பிப்பவர்கள்
ஏற்கனவே தேர்வெழுதி பெற்ற மதிப்பெண் சான்றிதழின்/ சான்றிதழ்களின் நகல்களை கண்டிப்பாக இணைத்து சமர்ப்பிக்க வேண்டும்.
தனித் தேர்வர்கள் ரூ.42-க்கான அஞ்சல் வில்லை ஒட்டப்பட்ட, பின்கோடுடன் கூடிய சுய முகவரியிட்ட உறை ஒன்றினை விண்ணப்பத்துடன் இணைத்து சமர்ப்பிக்க வேண்டும்.
4. ஆன்லைன் மூலம் பெறப்படும் விண்ணப்பங்கள் மட்டுமே ஏற்றுக்கொள்ளப்படும். தபால் மூலம் பெறப்படும் விண்ணப்பங்கள் நிராகரிக்கப்படும்.
5. தேர்விற்கான விரிவான தகவல்களை www.dge.tn.gov.in என்ற இணையதளத்தில் காணலாம்’’.
இவ்வாறு அரசுத் தேர்வுகள் இயக்ககம் தெரிவித்துள்ளது.
| தேதி | கிழமை | நேரம் | பாடம் |
| 07.08.2023 | திங்கட்கிழமை | காலை 10 மணி முதல் 12 மணி வரை | தமிழ் |
| 08.08.2023 | செவ்வாய்க்கிழமை | காலை 10 மணி முதல் 12 மணி வரை | ஆங்கிலம் |
| 09.08.2023 | புதன் கிழமை | காலை 10 மணி முதல் 12 மணி வரை | கணிதம் |
| 10.08.2023 | வியாழக்கிழமை | காலை 10 மணி முதல் 12 மணி வரை | அறிவியல் |
| 11.08.2023 | வெள்ளிக்கிழமை | காலை 10 மணி முதல் 12 மணி வரை | சமூக அறிவியல் |
கடந்த ஆண்டு அக்டோபர் மாதத்தில் 10ஆம் தேதி முதல் 14ஆம் தேதி வரை, தனித் தேர்வர்களுக்கான எட்டாம் வகுப்பு பொதுத் தேர்வு நடைபெற்றது குறிப்பிடத்தக்கது.
கூடுதல் விவரங்களுக்கு: www.dge.tn.gov.in