கள்ளக்குறிச்சி மாவட்டம் உளுந்தூர்பேட்டை தாலுகா பாண்டூர் கிராமத்தை சேர்ந்தவர் மனோகரன் மனைவி செல்வி (வயது 65). இவர் கள்ளக்குறிச்சி அரசு மருத்துவமனையில் சிகிச்சை பெற்று வரும் உறவினரை பார்ப்பதற்காக வந்தார். பின்னர் மருத்துவமனையில் சிகிச்சை பெற்று வரும் உறவினரை பார்த்துவிட்டு செல்வி தனது அக்காள் கல்யாணி, உறவினர் அன்னபூரணி உட்பட 5 பேருடன் உளுந்தூர்பேட்டை செல்வதற்காக கள்ளக்குறிச்சி பேருந்து நிலையத்துக்கு வந்தார். தொடர்ந்து உளுந்தூர்பேட்டை செல்லும் பேருந்தில் செல்வி ஏறினார். அப்போது அங்கிருந்த கூட்ட நெரிசலை பயன்படுத்தி 2 பெண்கள் செல்வியின் கழுத்தில் கிடந்த 5 பவுன் சங்கிலியை பறித்துக்கொண்டு தப்பி ஓடினர். அதிர்ச்சியடைந்த செல்வி, அருகில் இருந்தவர்கள் உதவியுடன் அந்த 2 பெண்களையும் மடக்கிப்பிடித்து கள்ளக்குறிச்சி போலீசாரிடம் ஒப்படைத்தனர். போலீசார் நடத்திய விசாரணையில் அவர்கள் திருச்சி மாவட்டத்தை சேர்ந்தவர்கள் என்பது தெரியவந்தது. தொடர்ந்து அவர்களிடம் போலீசார் விசாரணை நடத்தி வருகின்றனர். கள்ளக்குறிச்சி பேருந்து நிலையத்தில் மூதாட்டியிடம் நகை பறித்த சம்பவம் அப்பகுதியில் பரபரப்பை ஏற்படுத்தி உள்ளது.
மேலும், சங்கராபுரம் அருகே உள்ள காட்டுவன்னஞ்சூரை சேர்ந்தவர் துரை மகன் இளவரசன் (வயது 17). இவர் சங்கராபுரம் அரசு ஆண்கள் மேல்நிலைப்பள்ளியில் பிளஸ்-2 படித்து வருகிறார். இவர் சங்கராபுரம் பேருந்து நிறுத்தத்தில் இருந்து வீட்டுக்கு நடந்து சென்று கொண்டிருந்தார். கள்ளக்குறிச்சி மெயின் ரோடு தனியார் பெட்ரோல் பங்க் அருகே சென்றபோது, அங்கு மோட்டார் சைக்கிளில் வந்த 3 பேர், திடீரென கத்தியை காட்டி மிரட்டி இளவரசனிடம் இருந்த செல்போனை பறித்து சென்றனர். இதுகுறித்து சங்கராபுரம் போலீசார் வழக்குப்பதிவு செய்தனர். இந்த நிலையில் காவல் உதவி ஆய்வாளர் நரசிம்மஜோதி தலைமையிலான போலீசார் மூரார்பாளையத்தில் வாகன சோதனையில் ஈடுபட்டிருந்தனர்.
அப்போது அந்த வழியாக மோட்டார் சைக்கிளில் வந்த 2 பேரை போலீசார் மறித்து விசாரித்தனர். விசாரணையில் அவர்கள் கள்ளக்குறிச்சி தாலுகா, புக்கிரவாரியை சேர்ந்த ஆறுமுகம் மகன் அய்யப்பன் (வயது 23) மற்றும் 16 வயது சிறுவன் என்பதும், இளவரசனிடம் கத்தியை காட்டி மிரட்டி செல்போன் பறித்தவர்கள் என்பதும் தெரியவந்தது. இதையடுத்து அய்யப்பன் மற்றும் சிறுவனை போலீசார் கைது செய்த போலீசார், செல்போனை பறிமுதல் செய்தனர். மேலும் இச்சம்பவத்தில் தொடர்புடைய ஒருவரை தேடி வருகின்றனர். கைது செய்யப்பட்ட 16 வயது சிறுவனை செஞ்சி சீர்திருத்த பள்ளியில் சேர்க்க போலீசார் நடவடிக்கை மேற்கொண்டனர்.