கரூர் அருகே 2வது மனைவி நடத்தையில் சந்தேகப்பட்டு அடித்து கொன்று புதைத்த மாட்டு வண்டி தொழிலாளி போலீசாரிடம் சரணடைந்தார்.
கரூர் மாவட்டம், வெள்ளியணை அடுத்த பள்ள சங்கனூர் கிராமத்தைச் சேர்ந்தவர் மாட்டு வண்டி தொழிலாளியான தனபால் (34). இவரது மனைவி மேனகா (28). மேனகாவின் அக்கா அம்பிகா (30). அம்பிகாவின் கணவர் கடந்த ஏழு வருடங்களுக்கு முன்பு விபத்தில் இறந்த நிலையில் தனபால் முதல் மனைவியான மேனகாவின் சம்மதத்துடன் இரண்டாவதாக அம்பிகாவை திருமணம் செய்து கொண்டுள்ளார்.
இந்த நிலையில் கடந்த 29 ஆம் தேதி தெற்கு மேட்டுப்பட்டி கிராமத்தில் இரண்டாவது மனைவி அம்பிகாவின் நடத்தையில் சந்தேகப்பட்டு அவரைக் அடித்துக் கொலை செய்து புதைத்துள்ளார். அங்கிருந்து இரண்டு நாட்கள் தலைமறைவான அவர் நேற்று வெள்ளியணை போலீசாரிடம் உண்மையை ஒப்புக்கொண்டு சரணடைந்துள்ளார்.
மூன்று நாட்கள் கழித்து இன்று மனைவியின் பிரேதம் இருக்கும் இடம் குறித்து தகவல் தெரிவித்துள்ளார். பிரேதத்தை கைப்பற்ற சம்பவ இடத்திற்கு போலீசார் விரைந்தனர். சம்பவம் நடந்ததாக கூறப்படும் தெற்கு மேட்டுப்பட்டி கிராமத்தில் போலீசார் தீவிர தேடுதல் வேட்டையில் இறங்கி உள்ளனர்.
தலைக்கேறிய மது போதையில் கணவர் மூலமாக தனக்கும் கொலை முயற்சி நடைபெற்றதாக முதல் மனைவி மேனகா(28) வாக்குமூலம் அளித்துள்ளார். கொலை நடந்ததாக கூறப்படும் சம்பவ இடத்திற்கு அருகில் உள்ள மொட்டை கிணற்றில் உடல் இருப்பதாக கூறப்படுகிறது.
இதனை தொடர்ந்து இன்று கரூர் அரசு மருத்துவ கல்லூரி மருத்துவமனை மருத்துவர்கள் சம்பவ இடத்திற்கு வந்து உடல்கூறு ஆய்வு செய்தனர். சம்பவ இடத்திற்கு தனபாலை அழைத்து வந்தனர். அவர் புதைத்து வைத்திருந்த இடத்தை காட்டினார்.
கிணற்றில் இறங்கிய தீயணைப்புப் துறையினர், போலீசார் புதைத்த இடத்தில் அம்பிகாவின் உடலை தோண்டி எடுத்தனர். அவரது உடலை பார்த்து உறவினர்கள் கதறி அழுதனர். தோண்டி எடுக்கப்பட்ட உடலை சம்பவ இடத்திலேயே மருத்துவர்கள் உடல் கூறு ஆய்வு செய்து உறவினரிடம் ஒப்படைத்தனர். கரூர் நகர காவல் துணை கண்காணிப்பாளர் தேவராஜ் தலைமையில் போலீசார் பாதுகாப்பு பணியில் ஈடுபட்டனர்.இரண்டாவது மனைவியை கணவர் கொலை செய்து கிணற்றில் புதைத்த சம்பவம் பெரும் பரபரப்பு ஏற்படுத்தியுள்ளது.