ராணிப்பேட்டையில் முகவரி கேட்பது போல சிறுமியிடம் பாலியல் அத்துமீறலில் ஈடுபட்ட இளைஞரை போலீசார் கைது செய்தனர். இந்த சம்பவம் அந்த பகுதியில் பெரும் பரபரப்பை ஏற்படுத்தியுள்ளது.
ராணிப்பேட்டை மாவட்டம் வாலாஜாபேட்டை அருகே தென்கடப்பந்தாங்கல் என்ற ஊர் உள்ளது. இந்த பகுதியைச் சேர்ந்த மணிகண்டன் என்ற இளைஞர் ஸ்ரீபெரும்புதூரில் உள்ள தனியார் செல்போன் உதிரி பாகங்கள் தயாரிக்கும் தொழிற்சாலையில் வேலை பார்த்து வந்துள்ளார். இதனிடையே இவர் பள்ளமுள்ளு வாடி கிராமத்தில் உள்ள தனது நண்பரை பார்க்க பைக்கில் சென்றுள்ளார். அப்போது போகும் வழியில் அந்த பகுதியைச் சேர்ந்த சிறுமி ஒருவர் பேனா வாங்க கடைக்கு சென்றதாக சொல்லப்படுகிறது.
சிறுமியை பார்த்த மணிகண்டன் ஏரிக்கரையோரமாக உள்ள சாலையில் சிறுமி சைக்கிளில் வருவதை கண்டுள்ளார். அவரை நிறுத்தி நண்பர் வீட்டு முகவரி கேட்பது போல நடித்துள்ளார். சிறுமியும் சைக்கிளை நிறுத்தி விட்டு முகவரி சொல்லியுள்ளது. அப்போது மணிகண்டன் சிறுமியிடம் பாலியல் சீண்டலில் ஈடுபட்டது தெரிய வந்தது. இதனால் அதிர்ச்சி அடைந்த சிறுமி கூச்சலிட்டார். இதனையடுத்து சத்தம் கேட்டு அக்கம் பக்கத்தினர் வந்த போது மணிகண்டன் தனது பைக்கில் தப்பியோட முயன்றார். அந்நேரம் அந்த வாகனத்தின் பதிவு எண்ணை சிறுமி குறித்து வைத்துள்ளார்.
பின்னர் நடந்த சம்பவம் பற்றி பெற்றோர்கள், அக்கம்பக்கத்தில் மணிகண்டன் மீது புகார் கொடுக்கச் சென்றனர். அப்போது சிறுமி சொன்ன பதிவெண் கொண்ட பைக் சாலையில் வந்துள்ளது. உடனடியாக வண்டியை நிறுத்தும்படி பொதுமக்கள் சொன்னதை மீறி, மணிகண்டன் மாட்டிக்கொண்டால் அவ்வளவு தான் என நினைத்து மின்னல் வேகத்தில் பைக்கை ஓட்டியுள்ளார். சுமார் 3 கிமீ தூரம் சிறுமியின் பெற்றோர்கள் துரத்தி சென்ற நிலையில், அப்போதும் அந்த இளைஞர் தப்பி சென்றுள்ளார்.
இதனை வீடியோ பதிவு செய்த சிறுமியின் பெற்றோர்கள் ராணிப்பேட்டை அனைத்து மகளிர் காவல் நிலையத்தில் புகாரளித்தனர். இதனையடுத்து பைக்கின் பதிவெண் கொண்டு விசாரணை நடத்திய போலீசார் மணிகண்டனை கைது செய்து போக்சோ சட்டத்தின் கீழ் சிறையில் அடைத்தனர்.