விழுப்புரம் : ஸ்ரீ வில்லிபுத்தூரிலிருந்து பேருந்தில் பயணம் செய்த 14 வயது சிறுவன் மர்மமான முறையில் உயிரிழந்தது குறித்து போலீசார் விசாரணை செய்து வருகின்றனர்.
சென்னை மயிலாப்பூர் பிவிகே தெருவை சேர்ந்த ஜெபஸ்டின் ராஜ் மகன் அந்தோணி ஜான் லோஷன்(14). இவர் அதே பகுதியில் உள்ள தனியார் பள்ளியில் ஒன்பதாம் வகுப்பு படித்து வருகிறார். இந்நிலையில் குடும்பத்தாருடன் சொந்த ஊரான ஸ்ரீ வில்லிபுத்தூருக்கு சென்று விட்டு மீண்டும் அரசு பேருந்தில் சென்னைக்கு சென்றுள்ளனர். அப்போது மதுரை பேருந்து நிறுத்தம் அருகே பேருந்து நின்றபோது அங்கிருந்த ஒரு கடையில் சிப்ஸ் மற்றும் கூல்ட்ரிங்க்ஸ் வாங்கி கொடுத்ததாக கூறப்படுகிறது. இதனை சாப்பிட்ட மாணவன் சிறிது நேரத்தில் வாந்தி எடுத்துள்ளார். உறவினர்கள் அவருக்கு தண்ணீர் கொடுத்து உறங்க வைத்துள்ளனர். பின்னர் விக்கிரவாண்டி அருகே பேருந்து வந்த போது சிறுவனை எழுப்பியதில் எந்தவித சுயநினைவின்றி இருந்துள்ளார்.
மேலும் திண்டிவனம் பேருந்து நிறுத்தத்தில் சிறுவனை எழுப்பிய போது இரண்டு முறை பெருமூச்சு விட்டதாகவும், வேறு எந்தவித அசைவும் இல்லாததால் சந்தேகம் அடைந்த உறவினர்கள் பேருந்தில் கதறி அழுதுள்ளனர். இதனை அறிந்த ஓட்டுனர் பேருந்தை ஓரமாக நிறுத்திவிட்டு, 108 ஆம்புலன்ஸ்க்கு தகவல் தெரிவித்தனர். பின்னர் 108 ஆம்புலன்ஸ் மூலம் திண்டிவனம் அரசு பொது மருத்துவமனைக்கு மாணவனை அழைத்துச் சென்றனர். அங்கு பரிசோதித்த மருத்துவர் சிறுவன் இறந்துவிட்டதாக தெரிவித்தார். இதனையடுத்து மாணவன் மர்மமான முறையில் உயிரிழந்தது குறித்து திண்டிவனம் போலீசார் விசாரணை செய்து வருகின்றனர்.
குளிர்பானங்கள் குடிப்பதால் பல்வேறு தீமைகள் ஏற்படுவதாக சர்வதேச ஆய்வு முடிவுகள் தெரிவித்திருப்பதாக நிபுணர்களும் குற்றம் சாட்டுகின்றனர். எதுவுமே அளவுக்கு மீறினால் உடலுக்கு கேடு விளைவிக்கும் என்பதில் மாற்றுக்கருத்து இல்லை. அதனால் குழந்தைகளுக்கு என்ன உணவு கொடுக்கிறோம் என்பதில் பெற்றோரும் கவனமுடன் இருக்க வேண்டியது கடமையாக உள்ளது.
இதனிடையே கடையில் கூல்ட்ரிங்க்ஸ் குடித்ததற்கு பிறகே சிறுவன் மயங்கியதாக பெற்றோர் புகார் தெரிவிக்கின்றனர்.