அடல் பென்ஷன் யோஜனா என்று அழைக்கப்படும் அடல் ஓய்வூதிய திட்டத்தின் கீழ் சிறிய முதலீடுகள் மேற்கொள்வது ஓய்வூதியத்தை உறுதி செய்வதால் நல்ல திட்டமாகக் கருதப்படுகிறது. அடல் ஓய்வூதியத் திட்டத்தின் கீழ் இணைபவர்கள் அனைவருக்கும் 60 ஆண்டுகளுக்குப் பிறகு, ஒவ்வொரு மாதமும் ஆயிரம் முதல் 5 ஆயிரம் ரூபாய் வரையிலான ஓய்வூதியத்தை அரசு உறுதிசெய்துள்ளது. அதே நேரம், அரசின் இந்த ஓய்வூதியத் திட்டத்தின் கீழ், 40 வயதுக்கு மேற்பட்டவர்களும் இணைந்து கொள்ளலாம். நாள் ஒன்றுக்கு 7 ரூபாய் என்ற கணக்கில் முதலீடு மேற்கொண்டால் ஓய்வூதியமாக மாதம் 5 ஆயிரம் ரூபாய் வரை உங்களால் பெற முடியும்.
அடல் ஓய்வூதியத் திட்டத்தின் நோக்கம் அனைத்து விதமான மக்களையும் ஓய்வூதியத்தின் கீழ் கொண்டுவருவது ஆகும். ஒரு குறிப்பிட்ட தொகையை இந்தத் திட்டத்தின் கீழ் ஒவ்வொரு மாதமும் சேமித்து வந்தால், உங்கள் ஓய்வுக்குப் பிறகு, ஒவ்வொரு மாதமும் ஆயிரம் முதல் 5 ஆயிரம் ரூபாய் வரை ஓய்வூதியமாகப் பெற முடியும். இதன் மூலம் அரசு ஒவ்வொரு மாதமும் 5 ஆயிரம் ரூபாய் ஓய்வூதியத்தை உறுதி செய்கிறது.
6 மாதங்களுக்கு ஒரு முறை வெறும் 1239 ரூபாய் முதலீடு செய்து 60 வயதைக் கடந்த பிறகு ஆண்டுக்கு 60 ஆயிரம் ரூபாய் பணத்தை வாழ்நாள் முழுவதும் பெறும் திட்டமாக இது வடிவமைக்கப்பட்டுள்ளது. மேலும் தற்போதைய விதிமுறைகளின் படி, இந்த ஓய்வூதியத் திட்டத்தில் அதிக பட்சமாக 5 ஆயிரம் ரூபாய் முதலீடு செய்யும் 18 வயது நபர், சராசரியாக நாள் ஒன்றுக்கு 7 ரூபாய் என்ற கணக்கில், மாதம் தோறும் 210 ரூபாய் தொகையை செலுத்தினால் போதும். இதே தொகையை 3 மாதங்களுக்கு ஒருமுறை என்ற விகிதத்தில் 626 ரூபாய் என்றும், 6 மாதங்களுக்கு ஒருமுறை என்ற விகிதத்தில் 1239 ரூபாய் என்ற அளவிலும் செலுத்தலாம். ஓய்வுக்குப் பிறகு மாதம் தோறும் ஆயிரம் ரூபாய் ஓய்வூதியம் பெற விரும்புபவர்கள் தங்கள் 18 வயதிலேயே மாதம் தோறும் 42 ரூபாய் என்ற கணக்கில் தொகை செலுத்தி இந்தத் திட்டத்தில் இணையலாம்.
உதாரணமாக, இந்தத் திட்டத்தில் 5 ஆயிரம் ரூபாய் ஓய்வூதியம் பெற விரும்பும் 35 வயதான நபர் இணைகிறார் என்றால் அவர் அடுத்த 25 ஆண்டுகளுக்கு ஒவ்வொரு 6 மாதங்களுக்கு ஒருமுறை 5323 ரூபாய் முதலீடு செய்ய வேண்டும். இவ்வாறு செய்வதன் மூலம், உங்கள் மொத்த முதலீடு 2.66 லட்சம் ரூபாயாக இருக்கும். அதில் இருந்து ஒவ்வொரு மாதமும் 5 ஆயிரம் ரூபாய் ஓய்வூதியம் வழங்கப்படும். அதே வேளையில், 18 வயதிலேயே இந்தத் திட்டத்தில் இணைந்தால் உங்கள் மொத்த முதலீடு 1.04 லட்சம் ரூபாயாக இருக்கும்; ஒரே ஓய்வூதியத் திட்டத்தில் 1.60 லட்சம் ரூபாய் உங்களுக்குக் கிடைக்கும்.