மயிலாடுதுறை: மயிலாடுதுறை மாவட்டத்தில் விவசாயிகளின் பொருளாதாரத்தை மேம்படுத்தும் நோக்கத்துடன் மாநில அரசு புதிய திட்டத்தை அறிமுகப்படுத்தியுள்ளது. 2026–2027 ஆம் ஆண்டுக்கான சட்டமன்ற கூட்டத்தொடரில் தாக்கல் செய்யப்பட்ட வேளாண்மை நிதிநிலை அறிக்கையில், வேளாண்மை மற்றும் உழவர் நலத்துறை அமைச்சரால் வெளியிடப்பட்ட முக்கிய அறிவிப்புகளின் அடிப்படையில் பல்நோக்கு பண்ணைக்குட்டைகளில் மீன்வளர்ப்பினை ஊக்குவிக்கும் திட்டம் தற்போது நடைமுறைப்படுத்தப்பட்டு வருகிறது.
இத்திட்டத்தின் கீழ் மாநிலத்தில் உள்ள பல்வேறு மாவட்டங்களுக்கு இலக்குகள் நிர்ணயிக்கப்பட்டுள்ள நிலையில், மயிலாடுதுறை மாவட்டத்திற்கு என பிரத்யேகமாக 5 பண்ணைக்குட்டைகள் என்ற இலக்கு ஒதுக்கீடு செய்யப்பட்டுள்ளது. விவசாயம் மற்றும் மீன்வளத்துறையை ஒருங்கிணைத்து கிராமப்புற வருவாயைப் பெருக்குவதை இலக்காகக் கொண்டு செயல்படுத்தப்படும் இத்திட்டம் அப்பகுதி விவசாயிகளிடையே மிகுந்த எதிர்பார்ப்பை ஏற்படுத்தியுள்ளது.
திட்டத்தின் சிறப்பம்சங்கள் மற்றும் நிதி உதவி விபரங்கள்
இத்திட்டத்தின் கீழ் பயன்பெறும் விவசாயிகளின் பண்ணைக்குட்டைகள் குறைந்தபட்சம் 250 சதுர மீட்டர் முதல் அதிகபட்சம் 1000 சதுர மீட்டர் வரை நீர்ப்பரப்பளவு கொண்டவையாக இருக்க வேண்டும். இத்தகைய பல்நோக்கு பண்ணைக்குட்டைகளில் கிப்ட் திலேப்பியா, நன்னீர் வாவல், ரூப்சந்த், விரால் மற்றும் பாரம்பரிய இந்தியப் பெருங்கெண்டை போன்ற சந்தையில் அதிக வரவேற்பும் விரைவாக வளரக்கூடியதுமான மீன் இனங்களை வளர்க்கலாம். மீன்வளர்ப்புக்குத் தேவையான அனைத்து அவசியமான உள்ளீடுகளும் இந்தத் திட்டத்தின் ஊடாக மானிய விலையில் வழங்கப்படுகின்றன.
குறிப்பாக, ஒரு பண்ணைக்குட்டைக்கு 1000 மீன்குஞ்சுகள், 350 கிலோ மீன் தீவனம், அவசியமான உரங்கள், பிற பண்ணைப் பொருட்கள் மற்றும் மீன்களைப் பாதுகாக்க ஏதுவாக பச்சை நிழல் வலை, பறவை தடுப்பு வேலி அல்லது பாலித்தீன் உறை வசதிகள் உள்ளிட்டவை அடங்கிய மொத்த அலகுச் செலவினமாக ரூ. 40,000 மதிப்பீடு நிர்ணயிக்கப்பட்டுள்ளது. இதில் 50 சதவீதத் தொகையான ரூ. 20,000 பின்னேற்பு மானியமாக நேரடியாகத் தகுதியான பயனாளிகளின் வங்கிக் கணக்கில் வரவு வைக்கப்படும் என்பது குறிப்பிடத்தக்கது.
தகுதிகளும் தேர்வு செய்யும் முறையும்
இத்திட்டத்தின் கீழ் பயனாளிகளைத் தேர்வு செய்யும் முறையானது முற்றிலும் வெளிப்படையான முறையில் மேற்கொள்ளப்படவுள்ளது. தகுதியான விவசாயிகள் மூப்புநிலையின் அடிப்படையில் அதாவது விண்ணப்பித்த வரிசை மற்றும் முன்னுரிமையின் அடிப்படையில் தேர்வு செய்யப்படுவார்கள். குறிப்பாக, பண்ணைக்குட்டைகளுக்குத் தேவையான போதிய நீர் ஆதாரம் தொடர்ந்து இருக்கும் வகையிலான வசதி கொண்ட விவசாயிகளுக்கு முதலிடம் வழங்கப்படும்.
மேலும், கடந்த முந்தைய ஆண்டுகளில் இதே திட்டத்தின் கீழ் அரசு மானியம் பெறாத புதிய விவசாயிகளுக்கு முன்னுரிமை அளிக்கப்படும் என்று மாவட்ட நிர்வாகம் தரப்பில் தெரிவிக்கப்பட்டுள்ளது. இதன் மூலம் கிராமப்புறங்களில் உள்ள அதிக அளவிலான விவசாயிகளைச் சென்றடைவதுடன், ஏற்கனவே மானியம் பெற்றவர்களுக்கே மீண்டும் வாய்ப்பு செல்வது தவிர்க்கப்பட்டு அனைவருக்கும் சமமான வாய்ப்பு உறுதி செய்யப்படுகிறது.
விண்ணப்பிக்கும் முறை மற்றும் தேவையான ஆவணங்கள்
மயிலாடுதுறை மாவட்டத்தைச் சேர்ந்த ஆர்வமுள்ள தகுதியுடைய விவசாயிகள் இத்திட்டத்தின் கீழ் பயன்பெற உரிய விண்ணப்பப் படிவங்களைப் பெற்று பூர்த்தி செய்து சமர்ப்பிக்க வேண்டும். விண்ணப்பத்துடன் இணைக்கப்பட வேண்டிய ஆவணங்களாக நில உரிமையாளர் ஆவணங்களான கணினி பட்டா, சிட்டா, வரைபடம், கிராம நிர்வாக அலுவலர் வழங்கும் சிட்டா மற்றும் அடங்கல், வில்லங்க சான்று ஆகியவற்றுடன் தங்களது பாஸ்போர்ட் அளவு புகைப்படங்கள் மற்றும் அடையாள ஆவணங்களை இணைக்க வேண்டும்.
ஆதிதிராவிடர் மற்றும் பழங்குடியினர் வகுப்பைச் சேர்ந்தவர்களாக இருப்பின் அவர்களுக்கான சாதி சான்று இணைப்பது கட்டாயமாகும். மேலும், குடும்ப அட்டை நகல் மற்றும் வங்கி கணக்கு புத்தகத்தின் முன்பக்க நகல் ஆகியவற்றுடன் விண்ணப்பத்தை சமர்ப்பிக்க வேண்டும்.
விண்ணப்பங்களைச் சமர்ப்பிக்க வேண்டிய முகவரி மற்றும் இறுதி நாள்
பூர்த்தி செய்யப்பட்ட விண்ணப்பங்களை மயிலாடுதுறை மாவட்டத்தைச் சேர்ந்த விவசாயிகள் நேரில் சென்று ஒப்படைப்பதற்கான முகவரி அறிவிக்கப்பட்டுள்ளது. அதன்படி, 41-யூ, தென்பாதி மெயின் ரோடு, பெஸ்ட் பள்ளி வளாகத்திற்கு எதிரில், சீர்காழி - 609111 என்ற முகவரியில் இயங்கி வரும் மீன்வளம் மற்றும் மீனவர் நலத்துறை உதவி இயக்குநர் அலுவலகத்தில் (மயிலாடுதுறை இருப்பு, சீர்காழி) உரிய ஆவணங்களுடன் விண்ணப்பங்களை நேரில் சமர்ப்பிக்கலாம். இது குறித்த மேலதிக விபரங்களுக்கும் வழிகாட்டுதல்களுக்கும் துறைசார் அதிகாரிகளைத் தொடர்பு கொள்ளலாம். மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த், வெளியிட்டுள்ள இந்த அறிவிப்பின் மூலம் விவசாயிகள் தங்களுடைய தரிசு நிலங்கள் மற்றும் பண்ணைக்குட்டைகளைச் சிறந்த முறையில் பயன்படுத்தி கூடுதல் லா ஈட்ட முன்வருமாறு கேட்டுக்கொள்ளப்படுகின்றனர்.