Kim Ju Ae North Korea | `13 வயதில் அதிபராகும் மகள்' Kim Jong Un மாஸ்டர் ப்ளான்.. யார் இந்த Kim Ju Ae?
வட கொரியா அதிபர் கிம் ஜாங் உன்னின் 13 வயது மகள் கிம் ஜு ஏ விரைவில் அந்நாட்டின் முதல் பெண் அதிபராகப் பதவியேற்கவிருக்கிறார். அமெரிக்காவுக்குப் பெரும் அச்சுறுத்தலாக இருக்கும் கிம் ஜாங் உன்னின் இந்தத் திடீர் முடிவு சர்வதேச அரசியலில் பெரும் பேசுபொருளாகியிருக்கிறது.
வட கொரியாவில் அதிபர் கிம் ஜாங் உன் தலைமையிலான கொரியா உழைப்பாளர் கட்சியின் ஆட்சி நடைபெற்று வருகிறது. ஐந்தாண்டுகளுக்கு ஒருமுறை நடத்தப்படும் இக்கட்சியின் மாநாடு இம்மாத இறுதியில் நடைபெறவிருக்கிறது. இக்கூட்டத்தில்தான் மிக முக்கிய முடிவுகள் எடுக்கப்படுவது வழக்கம்.
இந்த நிலையில், அதிபர் கிம் ஜாங் உன்னின் மகள் கிம் ஜு ஏ, அதிபராகத் தேர்ந்தெடுக்கப்படவிருப்பதாக முக்கிய தகவல் வெளியாகியிருக்கிறது. வெறும் 13 வயதாகும் கிம் ஜு ஏ-வைப் பற்றிய விவரங்கள் இதுநாள் வரையிலும் பொதுவெளியில் பெரிதாக இல்லை.
2013-ல் அமெரிக்காவின் பிரபல பேஸ்கட் பால் வீரர் டென்னிஸ் ரோட்மேன் வட கொரியாவுக்குச் சென்றபோது, கிம் ஜாங் உன்னின் குழந்தை கிம் ஜு ஏ-யை ஏந்தியதாகவும் அவரின் மனைவியிடம் பேசியதாகவும் ஊடகத்திடம் பேசியது அப்போது வைரலானது. அப்போதுதான், கிம் ஜாங் உன்னுக்கு கிம் ஜு ஏ என்ற பெண் குழந்தை இருக்கிறது என்பதே வெளி உலகத்துக்கே தெரிந்தது.
ஆனால் அதன்பிறகு அவரின் ஒரு புகைப்படம் கூட வெளிவரவில்லை. இத்தகைய சூழலில் கிம் ஜு ஏ முதல்முறையாக கடந்த 2022-ல் தனது தந்தையுடன் பொதுவெளியில் தோன்றினார்.
2022 நவம்பர் 18-ம் தேதி வட கொரியாவில் நடைபெற்ற கண்டம் விட்டு கண்டம் பாயும் ஏவுகணை சோதனை நிகழ்வில் தனது தந்தையுடன் கிம் ஜு ஏ பங்கேற்றார். அதன்பின்னர், தொடர்ச்சியாக தனது தந்தையுடன் பல்வேறு முக்கிய நிகழ்வுகளில் அவர் பங்கேற்றார்.
குறிப்பாக, கடந்த ஆண்டு செப்டம்பரில் சீனாவில் நடைபெற்ற ராணுவ அணிவகுப்பில் தந்தையுடன் பங்கேற்றார். இந்த நிலையில்தான் கிம் ஜு ஏ அதிபராகத் தேர்வு செய்யப்படவிருப்பதாக முக்கிய தகவல் வெளியாகியிருக்கிறது.
இதன்மூலம், கிம் குடும்பத்திலிருந்து வரும் நான்காம் தலைமுறை அதிபராக கிம் ஜு ஏ பதவியேற்கவிருக்கிறார். அதுமட்டுமல்லாமல் 1948-ல் வட கொரியா என்ற நாடு உருவானதிலிருந்து ஆண்கள் மட்டுமே அதிபராக இருந்துவரும் நிலையில், அந்நாட்டின் முதல் பெண் அதிபர் என்ற சிறப்பையும் கிம் ஜு ஏ பெறவிருக்கிறார்.
இருப்பினும் 2019 முதல் வட கொரியாவின் அதிபராக இருக்கும் கிம் ஜாங் உன்னுக்கு 42 வயதே ஆகும் நிலையில் எதற்காக 13 வயது மகளை அவர் அதிபராக்கவிருக்கிறார் என்பது சர்வதேச அரசியலில் விவாதத்தை ஏற்படுத்தியிருக்கிறது.