Tindivanam train | ரயிலில் சிக்கிய 7 மாத குழந்தை! ஓடிவந்து காப்பாற்றிய மக்கள்! திக் திக் நிமிடங்கள்

திண்டிவனம் ரயில் நிலையத்தில் 7 மாத கைக்குழந்தையுடன் ரயிலில் ஏற முயன்ற போது கால் இடறி தண்டவாளத்தில் விழுந்த 4 பேர், ரயிலில் சிக்கிக் கொண்ட சம்பவத்தால் பெரும் பரபரப்பு ஏற்பட்டது.

திருவண்ணாமலை மாவட்டத்தை சேர்ந்த மணிகண்டன் கோமதி தம்பதி தங்களுடைய 7 மாத குழந்தை மற்றும் உறவினர்களுடன் தெள்ளார் கிராமத்தில் இருந்து பேருந்து மூலமாக திண்டிவனத்திற்கு வந்துள்ளனர். பின்னர் திண்டிவனம் ரயில் நிலையத்தில் இருந்து திருச்செந்தூர் கோயிலுக்கு செல்வதற்காக திருச்செந்தூர் எக்ஸ்பிரஸ் ரயிலில் ஏற முயன்றுள்ளனர்.

ரயிலில் ஏறும் போது திடீரென ரயிலை இயக்கியதால் கால் இடறி விழுந்ததில் கைக்குழந்தையுடன் 4 பேர் கீழே விழுந்து ரயில் பெட்டிக்கு தண்டவாளத்திற்கும் இடையே சிக்கிக் கொண்டனர். உடனடியாக ரயிலில் இருந்த பயணிகள் அபாயசங்கிலியை இழுத்து ரயிலை நிறுத்தினர். இதில் 7 மாத கைக்குழந்தை கிருத்திகா உள்ளிட்டோர் சிறுகாயங்களுடன் அதிர்ஷ்டவசமாக உயிர் தப்பினர். 

முன்னறிவிப்பு இன்றி ரயிலை இயக்கத் தொடங்கியதாக ஆத்திரமடைந்த பயணிகள், ரயிலை மறித்து வாக்குவாதத்தில் ஈடுபட்டனர். இதனால், திண்டிவனம் ரயில் நிலையத்தில் பெரும் பரபரப்பு ஏற்பட்டது. திண்டிவனம் போலீசார் மற்றும் ரயில்வே போலீசார் பேச்சுவார்த்தை நடத்தி  பயணிகளை அப்புறப்படுத்தினர். மேலும், இந்தச் சம்பவம் தொடர்பாக போலீசார் விசாரணை நடத்தி வருகின்றனர். இந்தச் சம்பவத்தால் திருச்செந்தூர் எக்ஸ்பிரஸ் ரயில் 15 நிமிடங்கள் தாமதமாகப் புறப்பட்டுச் சென்றது.