தாய்லாந்து விசா விதிகளில் திடீர் மாற்றம்: 93 நாடுகளுக்கு கிடுக்கிப்பிடி; இந்தியர்களின் நிலை என்ன?

தாய்லாந்து அரசு 93 நாடுகளைச் சேர்ந்த சுற்றுலாப் பயணிகளுக்கான 60 நாள் விசா இல்லாத தங்கும் காலம் 30 நாட்களாகக் குறைக்கப்பட உள்ளது.

தாய்லாந்து அரசு

Source : https://x.com/

சட்டவிரோத வெளிநாட்டு வணிகங்கள் மற்றும் குற்றச் செயல்களைத் தடுக்கும் நோக்கில், பல நாடுகளுக்கான விசா இல்லாத தங்கும் காலத்தைக் குறைக்க தாய்லாந்து அரசு முடிவு செய்துள்ளது.

அந்நாட்டு அமைச்சர் சிஹாசாக் புவாங்கேட்கேவ் இது தொடர்பான முன்மொழிவை விரைவில் அமைச்சரவையில் சமர்ப்பிக்க உள்ளார். இதன் மூலம் 93 நாடுகளைச் சேர்ந்த சுற்றுலாப் பயணிகளுக்கான 60 நாள் விசா இல்லாத தங்கும் காலம் 30 நாட்களாகக் குறைக்கப்பட உள்ளது.

விசா கொள்கை மறுஆய்வு 

விசா காலத்தைக் குறைப்பது மட்டுமின்றி, முதலீட்டு விசாக்கள், நீண்ட கால தங்கும் அனுமதி, மாணவர் விசாக்கள் மற்றும் 'டிஜிட்டல் நோமட்' திட்டங்கள் ஆகியவற்றையும் தாய்லாந்து அரசு மறுஆய்வு செய்து வருகிறது. உள்ளூர்வாசிகளைப் பினாமிகளாகப் பயன்படுத்தி, வெளிநாட்டு உரிமையாளர் கட்டுப்பாடுகளை மீறி நிறுவனங்களை நடத்தும் முறைகேடுகளைத் தடுக்க இந்த நடவடிக்கை எடுக்கப்படுகிறது. குறிப்பாக ரஷ்யா மற்றும் சீன நாட்டினரால் நடத்தப்படும் வணிகங்கள் தீவிர கண்காணிப்புக்கு உள்ளாக்கப்பட்டுள்ளன.

சுற்றுலா வளர்ச்சியும் பொருளாதார அழுத்தமும்

தாய்லாந்தின் பொருளாதாரம் சுற்றுலாவையே பெரிதும் நம்பியுள்ளது. கோவிட்-19 பாதிப்பிற்கு பிறகு சுற்றுலாப் பயணிகளின் எண்ணிக்கை மீண்டும் அதிகரித்துள்ள போதிலும், வெளிநாட்டினரின் நீண்ட கால வருகை உள்ளூர்வாசிகளின் வாழ்வாதாரத்தைப் பாதிப்பதோடு வாழ்க்கைச் செலவையும் அதிகரித்துள்ளதாகப் புகார்கள் எழுந்துள்ளன. இருப்பினும், நாட்டின் பொருளாதாரத்தில் சுற்றுலாவின் முக்கியத்துவத்தைக் கருத்தில் கொண்டு, விசா இல்லாத பயணத்தை முற்றிலும் ரத்து செய்யும் எண்ணம் இல்லை என்று அதிகாரிகள் தெளிவுபடுத்தியுள்ளனர்.

சட்டவிரோதச் செயல்கள் மீதான கடும் நடவடிக்கை

சட்டவிரோத வெளிநாட்டு வணிகங்களுக்கு எதிராக தாய்லாந்து அரசு தனது சோதனைகளைத் தீவிரப்படுத்தியுள்ளது. சமீபத்தில் பட்டாயாவில் ராணுவத் தரம் வாய்ந்த வெடிபொருட்கள் மற்றும் ஆயுதங்களுடன் சீனத் தேசியவாதி ஒருவர் கைது செய்யப்பட்ட சம்பவம் பெரும் பரபரப்பை ஏற்படுத்தியது. அதேபோல், புக்கெட் போன்ற பகுதிகளில் விதிமீறலில் ஈடுபட்ட ரஷ்ய மற்றும் சீனப் பிரஜைகள் உட்பட 33 வெளிநாட்டினர் கைது செய்யப்பட்டுள்ளனர். பொது இடங்களை ஆக்கிரமிக்கும் மற்றும் உள்ளூர்வாசிகளை அச்சுறுத்தும் வெளிநாட்டு 'குண்டர்களை' பொறுத்துக்கொள்ள முடியாது என அரசு எச்சரித்துள்ளது.

இந்தியர்களுக்குப் பாதிப்பு உண்டா?

93 நாடுகளுக்கான விசா காலத்தைக் குறைக்கத் திட்டமிட்டிருந்தாலும், இந்த புதிய விதிகள் இந்தியாவிற்குப் பொருந்தாது என்று அதிகாரிகள் விளக்கியுள்ளனர். இந்தியப் பிரஜைகளுக்கான இ-விசா (e-Visa) முறை 2025 ஜனவரி 1 முதல் அதிகாரப்பூர்வமாகத் தொடங்கப்பட்டுள்ளது. இந்திய சுற்றுலாப் பயணிகள் https://thaievisa.go.th/ என்ற அதிகாரப்பூர்வ இணையதளம் மூலம் நேரடியாக விண்ணப்பிக்கலாம். எனவே, மற்ற நாடுகளுக்கு விதிக்கப்படும் தங்கும் காலக் குறைப்பு இந்தியப் பயணிகளைப் பாதிக்காது.