நீண்ட காத்திருப்புக்கு முடிவு! கேலக்ஸி S25 பயனர்களுக்கு சாம்சங் வழங்கிய செம்ம சர்ப்ரைஸ்!

இலவச கேஸ் மற்றும் AppleCare+ சலுகையுடன் ரூ. 69,990-க்கு ஐபோன் 17 புரோ!

கிஷோர் — Wed, 16 Sep 2026 07:54:57 +0530

டாடா குழுமத்தின் பிரபல சில்லறை வர்த்தக நிறுவனமான குரோமா (Croma), ஆப்பிள் ரசிகர்களுக்கு ஒரு மிகப்பெரிய சலுகையை அறிவித்துள்ளது. புதிய ஐபோன் 18 தொடர் அறிமுகமாகவுள்ள நிலையில், பிரீமியம் மாடலான ஐபோன் 17 புரோ (256GB) போனின் எஃபெக்டிவ் விலையை ரூ. 69,990 வரை குறைத்து அதிரடி ஆஃபரை வெளியிட்டுள்ளது. வாடிக்கையாளர்கள் தங்களின் பழைய ஸ்மார்ட்போன்களை எக்ஸ்சேஞ்ச் செய்து, குறிப்பிட்ட வங்கி அட்டைகளைப் பயன்படுத்துவதன் மூலம் இந்த சலுகை விலையைப் பெற முடியும்.

விலைக் குறைப்பு எவ்வாறு செயல்படுகிறது?

இந்தச் சிறப்புச் சலுகை வெறும் நேரடி தள்ளுபடி மட்டுமல்லாமல், பல்வேறு சலுகைகளின் கூட்டமைப்பாக வழங்கப்படுகிறது. பழைய ஐபோன் 15 புரோ போன்ற முதன்மை போன்களை எக்ஸ்சேஞ்ச் செய்வதன் மூலம் அதிகபட்சமாக ரூ. 44,500 வரை மதிப்பு கிடைக்கிறது. இதனுடன், குரோமா வழங்கும் பிரத்யேக எக்ஸ்சேஞ்ச் போனஸாக ரூ. 12,000 வரை கூடுதல் சலுகை அளிக்கப்படுகிறது. மேலும், தகுதிவாய்ந்த வங்கி கடன் அட்டைகளைப் பயன்படுத்தி வாங்கும் போது ரூ. 4,000 வரை உடனடி கேஷ்பேக் சலுகையும் வாடிக்கையாளர்களுக்குக் கிடைக்கிறது.

இலவச கேஸ் மற்றும் ஆப்பிள் கேர்+ தள்ளுபடி

ஐபோன் 17 புரோ மாடலை வாங்கும் வாடிக்கையாளர்களுக்கு போன் பாதுகாப்புக்காக ரூ. 3,499 மதிப்புள்ள 'ஹைபன் கேஸ் காம்போ' (Hyphen case combo) முற்றிலும் இலவசமாக வழங்கப்படுகிறது. இத்துடன், போனுக்கான கூடுதல் பாதுகாப்பை உறுதிசெய்யும் ஆப்பிள் கேர் பிளஸ் (AppleCare+) சேவையில் பிளாட் 10 சதவீத தள்ளுபடியும் சேர்க்கப்பட்டுள்ளது. தகுதியுள்ள வாடிக்கையாளர்கள் ரூ. 4,000 கேஷ்பேக்குடன் 6 மாத வட்டி இல்லா தவணை (No-Cost EMI) முறையையும் தேர்வு செய்து கொள்ள இயலும்.

ஐபோன் 17 புரோ மேக்ஸ் மற்றும் ஆன்லைன் சலுகைகள்

இதே போன்ற எக்ஸ்சேஞ்ச் சலுகைகளை ஐபோன் 17 புரோ மேக்ஸ் மாடலுக்கும் குரோமா வழங்குகிறது. பழைய போன்களின் நிலைக்கேற்ப அதிகபட்சமாக ரூ. 53,000 வரை எக்ஸ்சேஞ்ச் மதிப்பு மற்றும் ரூ. 12,000 போனஸ் சேர்க்கப்பட்டு, இதன் 256GB மாடலை ரூ. 74,990 என்ற எஃபெக்டிவ் விலையில் பெற முடியும். நேரடி எக்ஸ்சேஞ்ச் இல்லாது ஆன்லைன் மூலம் croma.com தளத்தில் வாங்குபவர்களுக்கு, வங்கி கேஷ்பேக் சலுகையுடன் ஐபோன் 17 புரோ (256GB) ரூ. 1,26,490 விலையில் விற்பனைக்குக் கிடைக்கிறது.

புதிய ஐபோன் 18 தொடர் முன்பதிவு

ஒருபுறம் ஐபோன் 17 புரோ மாடல்களுக்கு இத்தகைய மிகப்பெரிய விலைக் குறைப்பை அறிவித்துள்ள குரோமா, மறுபுறம் புதிய ஐபோன் 18 புரோ மற்றும் 18 புரோ மேக்ஸ் மாடல்களுக்கான முன்பதிவையும் தொடங்கியுள்ளது. வாடிக்கையாளர்கள் ரூ. 5,000 செலுத்தி குரோமா கடைகளில் நேரடியாகவோ அல்லது ஆன்லைன் தளங்கள் மூலமாகவோ புதிய மாடல்களை முன்பதிவு செய்து கொள்ளலாம்.

மதுரையில் யுவன் சங்கர் ராஜா இசை நிகழ்ச்சி கோலாலகம்.. Hcl- 50வது ஆண்டு விழா கொண்டாட்டம்!

அருண் சின்னதுரை — Mon, 14 Sep 2026 12:21:52 +0530

யுவன் சங்கர் ராஜா இசை நிகழ்ச்சியுடன் ஹெச்சிஎல் குழுமத்தின் 50-வது ஆண்டு விழா கொண்டாட்டங்கள் மதுரையில் தொடர்கின்றன.

ஹெச்சிஎல் குழுமம் தனது 50 ஆண்டுகால சாதனைப் பயணம்

ஹெச்சிஎல் குழுமம் தனது 50 ஆண்டுகால சாதனைப் பயணத்தைக் குறிக்கும் வகையில், மதுரையில் பிரபல இசையமைப்பாளரும், பாடகருமான யுவன் சங்கர் ராஜாவின் சிறப்பான இசை நிகழ்ச்சியுடன் தனது பணியாளர்களுக்கான கொண்டாட்டங்களைத் தொடர்ந்து நடத்தியது. பிரபலமான தமுக்கம் மைதானத்தில் நடைபெற்ற இந்த இசை நிகழ்ச்சியில், ஹெச்சிஎல் குழுமம் மற்றும் ஷிவ் நாடார் அறக்கட்டளையைச் சேர்ந்த 3,000-க்கும் மேற்பட்ட பணியாளர்கள் கலந்துகொண்டனர். இசையின் இனிமையும், கொண்டாட்டத்தின் குதூகலமும் நிறைந்த மாலைப் பொழுதாக இது அமைந்தது. ஹெச்சிஎல் குழுமம் மற்றும் ஹெச்சிஎல்டெக் நிறுவனத்தின் தலைவரான ரோஷ்னி நாடார் மல்ஹோத்ரா இந்த இசை நிகழ்ச்சியில் கலந்துகொண்டு, குழுமத்தின் பொன்விழாவைக் கொண்டாடும் பணியாளர்களுடன் தனது மகிழ்ச்சியை பகிர்ந்து கொண்டார். மிகவும் பிரபலமான பாடல்களைப் பாடி தமுக்கம் மைதானத்தையே கொண்டாட்ட தளமாக யுவன் சங்கர் ராஜா மாற்றினார். ஹெச்சிஎல் என்ற மாபெரும் குழுமத்தின் அங்கத்தினர்களான பணியாளர்கள் தங்களது நடனத்தின் வழியாகவும், இணைந்து பாடியும், இந்நிகழ்வை என்றும் மறக்க இயலாத ஒன்றாக ஆக்கினர்.

மதுரையில் இசை நிகழ்ச்சி நடைபெற்றுள்ளது.

ஹெச்சிஎல் குழுமத்தின் 50-வது ஆண்டைக் குறிக்கும் சிறப்பு இசை நிகழ்ச்சித் தொடரின் ஒரு பகுதியாக நொய்டா, லக்னோ, சென்னை மற்றும் விஜயவாடா ஆகிய இடங்களில் முன்பு நடைபெற்ற இதேபோன்ற கொண்டாட்டங்களைத் தொடர்ந்து மதுரையில் இந்த இசை நிகழ்ச்சி நடைபெற்றுள்ளது. ஆகஸ்ட் 11 – ம் தேதியில் தான் ஹெச்சிஎல் – ன் அதிகாரப்பூர்வ 50-வது ஆண்டு விழா நிகழ்ந்தது என்றாலும், ஐந்து தசாப்தங்களாக இந்த மாபெரும் உலகளாவிய நிறுவனத்தை உருவாக்கிய பணியாளர்களையும், அவர்களின் பகிரப்பட்ட பயணத்தையும் கொண்டாடும் வகையில் பல்வேறு நகரங்களிலும், குழுமப் பணியாளர்களை ஒன்றிணைக்கும் நிகழ்வாக இக்கொண்டாட்டங்கள் தொடர்ந்து நடைபெற்று வருகின்றன.

ஹெச்சிஎல் குழுமத்தின் 50-வது ஆண்டு விழாவை முன்னிட்டு நடைபெறும் சிறப்பு இசை நிகழ்ச்சித் தொடரில் மதுரை மாநகரில் நடைபெறும் இந்நிகழ்வு ஐந்தாவதாகும். இக்குழுமம் தனது ஐம்பது ஆண்டுகள் வெற்றிப் பயணத்தைக் கொண்டாடும் வகையில் பல்வேறு இடங்களிலும் இந்நிகழ்வுகளை தொடர்ந்து நடத்தி வருகிறது.

கேரேஜ் ஸ்டார்ட்-அப் நிறுவனங்கள்

இந்தியாவின் ஆரம்பகால ஐடி (தகவல் தொழில்நுட்பம்) கேரேஜ் ஸ்டார்ட்-அப் நிறுவனங்களில் ஒன்றாக 1976-ல் நிறுவப்பட்ட ஹெச்சிஎல் குழுமம், நவீன கணினித் துறையின் முன்னோடியாக முதன் முறையாகப் பல சாதனைகளை நிகழ்த்திய பெருமைக்குரியது. உலகளாவிய நிறுவனங்களுக்கு முன்பாகவே 1978 ஆம் ஆண்டில் 8-பிட் நுண்செயலி அடிப்படையிலான கணினியை அறிமுகப்படுத்தியதும் இந்த சாதனைகளுள் ஒன்றாகும். இப்போது தொழில்நுட்பம், சுகாதாரம் மற்றும் திறன் மேலாண்மை தீர்வுகள் என பல்வேறு துறைகளில் ஹெச்சிஎல் குழுமம் இயங்கி வருகிறது. மேலும், இது ஹெச்சிஎல் இன்ஃபோசிஸ்டம்ஸ், ஹெச்சிஎல்டெக் மற்றும் ஹெச்சிஎல் ஹெல்த்கேர் ஆகிய மூன்று நிறுவனங்களை நடத்தி வருகிறது. 60 நாடுகளில் 223,000 பணியாளர்களுடன் ஆண்டுக்கு 14.8 பில்லியன் அமெரிக்க டாலர்களுக்கும் அதிகமான வருவாயை ஈட்டும் பெருநிறுவன குழுமமாக ஹெச்சிஎல் இயங்குவது குறிப்பிடதக்கது"

Samsung Galaxy S26 வாங்க இதுதான் சரியான நேரம்! விலையை பார்த்தால் நீங்களே ஆச்சரியப்படுவீங்க!

கிஷோர் — Sun, 13 Sep 2026 11:42:11 +0530

பிரீமியம் ஸ்மார்ட்போன்களின் விலை தொடர்ந்து அதிகரித்து வரும் நிலையில், பிளாக்ஷிப் போன்களை குறைந்த விலையில் வாங்க விரும்பும் வாடிக்கையாளர்களுக்கு சாம்சங் நிறுவனம் புதிய வாய்ப்பை வழங்கியுள்ளது. அதன் அதிகாரப்பூர்வ ‘Certified Re-Newed’ திட்டத்தின் கீழ் கேலக்ஸி S26 சீரிஸ் போன்கள் விற்பனைக்கு கொண்டு வரப்பட்டுள்ளன. இதன் மூலம் புதிய போன்களை வாங்குவதை விட குறைந்த செலவில் பிளாக்ஷிப் அனுபவத்தைப் பெற முடியும்.

Certified Re-Newed என்றால் என்ன?

சாம்சங்கின் Certified Re-Newed திட்டத்தின் கீழ் விற்பனை செய்யப்படும் ஸ்மார்ட்போன்கள் சாதாரணமாக பயன்படுத்தப்பட்ட போன்கள் அல்ல. ஏற்கனவே பயன்படுத்தப்பட்ட சாதனங்கள் சாம்சங் நிறுவனத்தின் தரநிலைகளுக்கு ஏற்ப பரிசோதிக்கப்பட்டு, தேவையான பகுதிகள் மாற்றப்பட்டு, மீண்டும் விற்பனைக்கு தயார்படுத்தப்படுகின்றன.

சாதனத்தின் செயல்திறன் உள்ளிட்ட பல்வேறு அம்சங்கள் சோதனை செய்யப்பட்டு, தேவையான இடங்களில் அசல் சாம்சங் உதிரிபாகங்கள் பயன்படுத்தப்படுகின்றன. மேலும், போன்கள் முழுமையாக சுத்தம் செய்யப்பட்டு, மென்பொருள் சார்ந்த சோதனைகளும் மேற்கொள்ளப்படுகின்றன. முந்தைய பயனரின் தனிப்பட்ட தரவுகள் நீக்கப்பட்ட பின்னரே சாதனம் புதிய உரிமையாளரிடம் வழங்கப்படுகிறது.

கேலக்ஸி S26 மற்றும் S26 Ultra-வுக்கு குறைந்த விலை

இந்திய சந்தையில் அறிமுகப்படுத்தப்பட்டபோது கேலக்ஸி S26 மாடலின் ஆரம்ப விலை ரூ.87,999 ஆகவும், கேலக்ஸி S26 Ultra மாடலின் ஆரம்ப விலை ரூ.1,39,999 ஆகவும் இருந்தது. தற்போது ஆன்லைன் விற்பனைத் தளங்களில் இந்த மாடல்களின் விலை முறையே சுமார் ரூ.79,999 மற்றும் ரூ.1,30,999 என்ற அளவில் காணப்படுகிறது.

இந்நிலையில் Certified Re-Newed திட்டத்தின் மூலம் இந்த பிளாக்ஷிப் போன்களை அறிமுக விலையை விட குறைந்த விலையில் வாங்கும் வாய்ப்பு கிடைக்கிறது. சில சந்தர்ப்பங்களில் அசல் அறிமுக விலையில் சுமார் 85 சதவீதம் அளவிலான தொகையிலேயே சாதனத்தை வாங்க முடியும் என தெரிவிக்கப்பட்டுள்ளது. இருப்பினும், தேர்வு செய்யப்படும் Storage திறன், நிறம் மற்றும் அந்த நேரத்தில் கிடைக்கும் சலுகைகளைப் பொறுத்து இறுதி விலை மாறுபடலாம்.

ஒரு வருட அதிகாரப்பூர்வ உத்தரவாதம்

புதுப்பிக்கப்பட்ட ஸ்மார்ட்போன்களை வாங்கும்போது வாடிக்கையாளர்களுக்கு ஏற்படும் முக்கிய சந்தேகம் அதன் தரம் மற்றும் விற்பனைக்குப் பிந்தைய சேவை தொடர்பானதாகும். இதை சமாளிக்கும் வகையில், Certified Re-Newed போன்களுக்கு சாம்சங் நிறுவனமே ஒரு வருட அதிகாரப்பூர்வ உத்தரவாதத்தை வழங்குகிறது.

இதனால் வழக்கமான பயன்படுத்தப்பட்ட போன்களை வாங்குவதை விட, நிறுவனத்தின் அதிகாரப்பூர்வ தரப் பரிசோதனை மற்றும் உத்தரவாதத்துடன் புதுப்பிக்கப்பட்ட பிளாக்ஷிப் சாதனத்தை வாங்கும் வாய்ப்பு வாடிக்கையாளர்களுக்கு கிடைக்கிறது.

எங்கு வாங்கலாம்?

இந்த திட்டத்தின் கீழ் கிடைக்கும் கேலக்ஸி S26 சீரிஸ் போன்களை வாங்க விரும்புபவர்கள் சாம்சங் நிறுவனத்தின் அதிகாரப்பூர்வ விற்பனை தளங்களை பயன்படுத்தலாம். குறிப்பாக Samsung அதிகாரப்பூர்வ இணையதளம் மற்றும் Samsung Shop செயலி மூலம் இந்த சாதனங்களைப் பெற முடியும்.

புதிய பிளாக்ஷிப் ஸ்மார்ட்போனுக்கான முழு விலையை செலுத்த விரும்பாதவர்களுக்கும், அதே நேரத்தில் தரம் மற்றும் அதிகாரப்பூர்வ உத்தரவாதத்தில் சமரசம் செய்ய விரும்பாதவர்களுக்கும் Certified Re-Newed திட்டம் ஒரு மாற்று வாய்ப்பாக அமைகிறது. ஆனால் வாங்குவதற்கு முன் குறிப்பிட்ட மாடலின் Storage, விலை, கிடைக்கும் நிறங்கள், உத்தரவாத நிபந்தனைகள் மற்றும் அன்றைய சலுகைகளை அதிகாரப்பூர்வ தளத்தில் சரிபார்ப்பது முக்கியம்.

iPhone Duo: வந்தாச்சு மடிக்கக்கூடிய ஐபோன்.. இந்தியாவில் எப்போது விற்பனை.. விலை இத்தனை லட்சமா?

பேச்சி ஆவுடையப்பன் — Thu, 10 Sep 2026 07:59:32 +0530

ஆப்பிள் நிறுவனத்தின் முதல் மடிக்கக்கூடிய ஐபோன் சந்தையில் அறிமுகம் செய்யப்பட்டுள்ளது. iPhone Duo மாடல் மொபைல் மூலம் அந்நிறுவனம் மிகப்பெரிய அளவில் புரட்சி செய்துள்ளது.

ஐபோன் டியோ எனப் பெயரிடப்பட்ட இந்த மடிக்கக்கூடிய ஐபோன் இரண்டு கலர்களில் கிடைக்கும் என தெரிவிக்கப்பட்டுள்ளது. இந்த மொபைலானது ஆப்பிள் நிறுவனத்தின் சமீபத்திய மொபைல் இயங்குதளமான A20 ப்ரோ சிப்செட் மூலம் இயங்கும் என தெரிவிக்கப்பட்டுள்ளது. இது ஐபோன் 18 மற்றும் ஐபோன் 18 ப்ரோமேக்ஸ் ஆகியவற்றிலும் பிராசசர் சாஃப்ட்வேராக செயல்படுகிறது.

இந்த மடிக்கக்கூடிய ஐபோனில் பின்பக்க கேமரா 48 மெகாபிக்சல் கொண்டதாகவும், இரண்டு கேமராக்கள் இருக்கும்படியும் வடிவமைக்கப்பட்டுள்ளது. அதேசமயம் இரண்டாக மடிக்கக்கூடிய இடத்திலும் செல்ஃபி கேமராக்கள் அமைக்கப்பட்டுள்ளது. இந்த ஐபோனானது மேக்சேஃப் வயர்லெஸ் சார்ஜிங் வசதியுடன் வந்துள்ளது.

இந்தியாவில் விலை எவ்வளவு?.. எப்போது கிடைக்கும்?

256GB சேமிப்புத்திறன் கொண்ட ஐபோன் டியோவின் அடிப்படை விலை சந்தையில் இந்திய மதிப்பில் ரூ.1.90 லட்சமாக நிர்ணயிக்கப்பட்டுள்ளது. இந்த மடிக்கக்கூடிய போனில் 2TB வரையிலான மெமரியும் கிடைக்கிறது. இந்த புதிய ஸ்மார்ட்போன் அக்டோபர் 16 முதல் முன்பதிவு செய்யப்படும் என்றும், அக்டோபர் 23 அன்று விற்பனைக்கு கொண்டு வரவும் என அந்நிறுவனம் திட்டமிடப்பட்டுள்ளது.

இந்தியாவில் 256 GB மெமரித்திறன் கொண்ட ஐபோன் டியோவின் அடிப்படை மாடலின் விலை ரூ.2,99,900-இல் இருந்து தொடங்கும் என சொல்லப்படுகிறது. அதே சமயம் 512 GB, 1 TB மற்றும் 2 TB மாடல்களின் விலை முறையே ரூ. 3,24,900, ரூ. 3,74,900 மற்றும் ரூ. 4,49,900 என நிர்ணயிக்கப்பட்டு உள்ளது. ஐபோன் டியோ ஸ்டார் ஒயிட் மற்றும் நைட் ஸ்கை ஆகிய கலர்களில் கிடைக்கும் என அறிவிக்கப்பட்டுள்ளது.

என்னென்ன சிறப்புகள் உள்ளது?

ஐபோன் டியோ மாடலானது உலகளவில் eSIM அமைப்புடன் விற்பனைக்கு வரவுள்ளது. அதேசமயம் 7.6-அங்குல சூப்பர் ரெட்டினா XDR மடிக்கக்கூடிய திரை உருவாக்கப்பட்டுள்ளது. இதற்கு முன்னாள் வெளியான ஆப்பிள் ஐபோன் 18 ப்ரோ மாடல் திரை 6.3 அங்குலம் மட்டுமே இருந்தது. அதைவிட 80 சதவிகிதம் பெரிய திரை இந்த டியோ மாடலில் இடம்பெறுகிறது. பிரத்யேக நானோ டெக்ஸ்சர் பூச்சு கொடுக்கப்பட்டு நடுவில் தெரியும் மடிப்புகளை குறைத்து காட்டும்படி வடிவமைக்கப்பட்டிருக்கிறது. இந்த ஃபோனால் 4K/120 fps வரை வீடியோக்களைப் பதிவு செய்ய முடியும் என கூறப்பட்டுள்ளது. ஒருங்கிணைந்த திரை பயன்பாட்டுடன் 22 மணிநேர பேட்டரி பேக்கப்பை வழங்கும் வகையில் இந்த மாடல் இருக்கும் எனவும், 5 நிமிட சார்ஜ் செய்வதன் மூலம் 5 மணி நேரம் வரை வீடியோ பார்க்க முடியும் என உறுதியளிக்கப்பட்டுள்ளது. iOS 27 ஓஎஸ் இயங்குதளம் இடம்பெற்றூள்ளது. இதன்மூலம் ஸ்ப்ளிட் வியூ, செயலிகளை இணைத்து ஸ்வைப் செய்வது, பகுதியளவு மடித்துப் பயன்படுத்தும் வசதி, மற்றும் ஃபோன் சார்ஜ் இல்லாதபோதும் ஸ்டாண்ட்பை பயன்முறையில் நுழைவது போன்றவை செய்ய முடியும் என கூறப்பட்டுள்ளது.

சாம்சங் Galaxy S26 FE அறிமுகம்: 7 ஆண்டுகள் அப்டேட், AI வசதிகள், 45W சார்ஜிங்... விலை என்ன?

கிஷோர் — Wed, 9 Sep 2026 12:43:00 +0530

Samsung Galaxy S26 FE: பிரீமியம் ஸ்மார்ட்போன் சந்தையில் தனது நிலையை மேலும் வலுப்படுத்தும் வகையில், சாம்சங் நிறுவனம் புதிய Galaxy S26 FE ஸ்மார்ட்போனை அறிமுகப்படுத்தியுள்ளது. சாம்சங்கின் ‘Fan Edition’ வரிசையில் இடம்பெறும் இந்த புதிய மாடல், ஃபிளாக்ஷிப் S தொடர் ஸ்மார்ட்போன்களில் காணப்படும் பல முக்கிய அம்சங்களை ஒப்பீட்டளவில் எளிதாக பயனர்கள் பெறும் வகையில் வடிவமைக்கப்பட்டுள்ளது. நைஜீரியாவின் லாகோஸில் நடைபெற்ற ஊடகவியலாளர் சந்திப்பில் Galaxy S26 FE-யின் முக்கிய சிறப்பம்சங்கள் மற்றும் தொழில்நுட்ப வசதிகள் அறிமுகப்படுத்தப்பட்டன.

6.7 இன்ச் AMOLED டிஸ்ப்ளே மற்றும் சக்திவாய்ந்த செயலி

Galaxy S26 FE ஸ்மார்ட்போனில் 6.7 இன்ச் Dynamic AMOLED 2X டிஸ்ப்ளே வழங்கப்பட்டுள்ளது. Full HD+ ரெசல்யூஷனுடன் கூடிய இந்த திரை, அதிகபட்சமாக 120Hz Adaptive Refresh Rate-ஐ ஆதரிக்கிறது. இதனால் ஸ்க்ரோலிங், வீடியோ பார்ப்பது மற்றும் கேமிங் போன்ற செயல்பாடுகளில் மென்மையான காட்சி அனுபவத்தை வழங்கும் என எதிர்பார்க்கப்படுகிறது.

செயல்திறனைப் பொறுத்தவரை, இந்த ஸ்மார்ட்போனில் சாம்சங்கின் Exynos 2500 சிப்செட் பயன்படுத்தப்பட்டுள்ளது. 8GB RAM மற்றும் 128GB இன்டர்னல் ஸ்டோரேஜ் கொண்ட இந்த மாடலில் 4,000mAh பேட்டரி வழங்கப்பட்டுள்ளது. மேலும், 45W Fast Charging மற்றும் 15W Wireless Charging ஆகிய வசதிகளும் இடம்பெற்றுள்ளன.

மேம்படுத்தப்பட்ட கேமரா மற்றும் AI புகைப்பட வசதிகள்

புகைப்படம் மற்றும் வீடியோ அனுபவத்திலும் Galaxy S26 FE-யில் பல்வேறு மேம்பாடுகள் செய்யப்பட்டுள்ளன. பின்புறத்தில் Wide, Ultra-Wide மற்றும் 3x Optical Zoom Telephoto கேமரா கொண்ட மல்டி-கேமரா அமைப்பு வழங்கப்பட்டுள்ளது.

முன்பக்கத்தில் 85 டிகிரி Field of View கொண்ட செல்ஃபி கேமரா இடம்பெற்றுள்ளது. இதில் பலர் இணைந்து செல்ஃபி எடுக்கும்போது காட்சிக்கு ஏற்ப கேமரா தானாகவே சரிசெய்யும் வசதி வழங்கப்பட்டுள்ளது. மேலும், AI அடிப்படையிலான Photo Assist அம்சம் மூலம் புகைப்படங்களில் தேவையில்லாத பொருட்களை நீக்குவது மட்டுமின்றி, புதிய ஸ்டிக்கர்களை உருவாக்குவது போன்ற செயல்பாடுகளையும் மேற்கொள்ள முடியும்.

வீடியோ பதிவுக்கு பிரத்யேக அம்சங்கள்

வீடியோ பதிவை விரும்பும் பயனர்களுக்காக Fan Cam மற்றும் Super Steady Video போன்ற வசதிகளும் இதில் வழங்கப்பட்டுள்ளன. குறிப்பாக அசைவுகளின்போது வீடியோ பதிவை சீராக வைத்திருக்க Super Steady Video உதவும். சமூக வலைத்தளங்களில் பகிர்வதற்கு ஏற்ற வகையில் வீடியோ காட்சிகளை மாற்றியமைக்கவும் Fan Cam உள்ளிட்ட அம்சங்கள் பயன்படும்.

பல்வேறு AI வசதிகளுடன் Galaxy S26 FE

Galaxy S26 FE-யின் முக்கிய கவனம் செயற்கை நுண்ணறிவு வசதிகளிலும் உள்ளது. Live Call Translation மூலம் தொலைபேசி அழைப்புகளின்போது மொழிபெயர்ப்பு செய்ய முடியும். அதேபோல், Interpreter, Call Screening மற்றும் Transcript Assist போன்ற AI வசதிகளும் இதில் இடம்பெற்றுள்ளன.

அறிமுகம் செய்யப்படாத அல்லது தெரியாத எண்களில் இருந்து வரும் அழைப்புகளை கையாள Call Screening உதவுகிறது. உரையாடல்களை எழுத்து வடிவில் மாற்ற Transcript Assist பயன்படுகிறது. மேலும், வீடியோக்களில் பதிவாகும் தேவையற்ற பின்னணி சத்தங்களைக் குறைக்க Audio Eraser வசதியும் வழங்கப்பட்டுள்ளது.

7 ஆண்டுகள் பாதுகாப்பு அப்டேட்

பாதுகாப்பு அம்சங்களிலும் சாம்சங் கூடுதல் கவனம் செலுத்தியுள்ளது. நிறுவனத்தின் Knox பாதுகாப்பு தளத்துடன் வரும் Galaxy S26 FE-க்கு 7 ஆண்டுகள் வரை பாதுகாப்பு புதுப்பிப்புகள் வழங்கப்படும் என தெரிவிக்கப்பட்டுள்ளது. இதன் மூலம் நீண்ட காலத்திற்கு சாதனத்தை பாதுகாப்பாக பயன்படுத்தும் வாய்ப்பு பயனர்களுக்கு கிடைக்கும்.

Google AI Pro சந்தா மற்றும் Quick Share வசதி

Galaxy S26 FE-யை வாங்கும் தகுதியுள்ள வாடிக்கையாளர்களுக்கு 6 மாத Google AI Pro சந்தா இலவசமாக வழங்கப்படும் என தெரிவிக்கப்பட்டுள்ளது. இதனுடன் Samsung மற்றும் Apple சாதனங்களுக்கு இடையே கோப்புகளை எளிதாகப் பகிரும் வகையில் மேம்படுத்தப்பட்ட Quick Share வசதியும் இடம்பெற்றுள்ளது. பழைய ஸ்மார்ட்போனில் இருந்து புதிய Galaxy S26 FE-க்கு தரவுகளை மாற்றுவதற்காக Smart Switch வசதியும் வழங்கப்பட்டுள்ளது. இதில் eSIM தகவல்களையும் எளிதாக மாற்றிக்கொள்ள முடியும்.

மூன்று வண்ணங்களில் கிடைக்கும்

வடிவமைப்பிலும் Galaxy S26 FE கவனம் ஈர்க்கும் வகையில் உருவாக்கப்பட்டுள்ளது. இந்த ஸ்மார்ட்போன் Blueberry, Graphite மற்றும் Pistachio ஆகிய மூன்று வண்ணங்களில் கிடைக்கும் என தெரிவிக்கப்பட்டுள்ளது. பிரீமியம் வடிவமைப்பு, AMOLED டிஸ்ப்ளே, மேம்படுத்தப்பட்ட கேமரா, AI வசதிகள் மற்றும் நீண்டகால பாதுகாப்பு அப்டேட்கள் ஆகியவற்றை ஒரே சாதனத்தில் வழங்கும் வகையில் Galaxy S26 FE உருவாக்கப்பட்டுள்ளது.

iPhone-க்கு செக் வைக்கும் விவோ! 4K 240fps கேமராவுடன் X500 சீரிஸ் – செப்டம்பர் 21ல் அறிமுகம்!

கிஷோர் — Tue, 8 Sep 2026 20:46:46 +0530

ஸ்மார்ட்போன் கேமரா தொழில்நுட்பத்தில் தொடர்ந்து புதிய முயற்சிகளை மேற்கொண்டு வரும் விவோ நிறுவனம், தனது அடுத்த தலைமுறை X500 சீரிஸ் ஸ்மார்ட்போன்களை வரும் செப்டம்பர் 21, 2026 அன்று சீனாவில் அறிமுகம் செய்ய உள்ளது. புகைப்படம் மற்றும் வீடியோ பதிவில் அதிக கவனம் செலுத்தும் வகையில் உருவாக்கப்பட்டுள்ள இந்த புதிய தொடரில், vivo X500, vivo X500 Pro மற்றும் vivo X500 Pro Max ஆகிய மூன்று மாடல்கள் இடம்பெறும் என எதிர்பார்க்கப்படுகிறது. அறிமுகத்திற்கு முன்னதாக நடைபெற்ற ‘Creator Gala’ நிகழ்வில், X500 சீரிஸில் இடம்பெறவுள்ள புதிய இமேஜிங் தொழில்நுட்பங்கள் மற்றும் வீடியோ திறன்கள் குறித்த முக்கிய தகவல்களை விவோ நிறுவனம் வெளியிட்டுள்ளது.

மேம்பட்ட கேமரா அமைப்பு

X500 சீரிஸின் முக்கிய சிறப்பம்சமாக அதன் கேமரா அமைப்பு பார்க்கப்படுகிறது. குறிப்பாக, vivo X500 மாடலில் 50MP Sony LYTIA 828 முதன்மை கேமரா பயன்படுத்தப்பட உள்ளது. இது 1/1.28-இன்ச் அளவிலான சென்சாருடன் வருவதாக கூறப்படுகிறது. இதனுடன் 50MP அல்ட்ராவைடு கேமரா மற்றும் Sony LYTIA 610 சென்சார் கொண்ட 64MP பெரிஸ்கோப் டெலிபோட்டோ கேமரா வழங்கப்பட உள்ளது. இதன் மூலம் சாதாரண புகைப்படங்கள் மட்டுமின்றி, தொலைதூரக் காட்சிகள் மற்றும் பல்வேறு சூழல்களில் உயர்தர புகைப்படங்களை எடுக்க முடியும் என எதிர்பார்க்கப்படுகிறது.

புகைப்படம் மற்றும் வீடியோவில் நிறங்களின் துல்லியத்தையும் ஒரே மாதிரியான தோற்றத்தையும் மேம்படுத்தும் வகையில், விவோ புதிய Cinematic Colour System தொழில்நுட்பத்தை அறிமுகப்படுத்தியுள்ளது. இதன் நோக்கம் வெவ்வேறு கேமராக்களை பயன்படுத்தி எடுக்கப்படும் காட்சிகளிலும் நிறங்கள் இயல்பாகவும் சீராகவும் இருப்பதை உறுதி செய்வதாகும். மேலும், ZEISS இமேஜிங் அமைப்பு, T coating மற்றும் APO Super-Telephoto* போன்ற தொழில்நுட்பங்களும் X500 சீரிஸின் கேமரா அனுபவத்தை மேம்படுத்தும் வகையில் இடம்பெற உள்ளன.

வீடியோ கிரியேட்டர்களை குறிவைக்கும் 4K 240fps

வீடியோ கிரியேட்டர்கள் மற்றும் தொழில்முறை உள்ளடக்க தயாரிப்பாளர்களை மனதில் வைத்து X500 சீரிஸில் பல முக்கிய வீடியோ அம்சங்கள் சேர்க்கப்பட்டுள்ளன. குறிப்பாக 4K 240fps ஸ்லோ-மோஷன் வீடியோ பதிவு வசதி இதில் இடம்பெறுவது முக்கியமான சிறப்பம்சமாகும். அதிக பிரேம் ரேட்டில் வீடியோ பதிவு செய்வதன் மூலம் வேகமான இயக்கங்களையும் மெதுவாக்கப்பட்ட காட்சிகளையும் அதிக விவரங்களுடன் பதிவு செய்ய முடியும்.

விவோ X500 சீரிஸில் 17-ஸ்டாப் டைனமிக் ரேஞ்ச் கொண்ட TCG-HDR தொழில்நுட்பம் இடம்பெற உள்ளது. பிரகாசமான பகுதிகளிலும் இருண்ட பகுதிகளிலும் உள்ள விவரங்களை சிறப்பாகப் பதிவு செய்வதில் அதிக டைனமிக் ரேஞ்ச் முக்கிய பங்கு வகிக்கிறது. இதன் மூலம் அதிக வெளிச்சம் மற்றும் குறைந்த வெளிச்சம் கொண்ட பகுதிகள் ஒரே காட்சியில் இருக்கும் நேரங்களிலும் வீடியோ தரத்தை மேம்படுத்த முடியும் என எதிர்பார்க்கப்படுகிறது.

4K 120fps HDR மற்றும் 10-bit Log பதிவு

தொழில்முறை வீடியோ பணிகளுக்காக 4K 120fps HDR மற்றும் ஹார்டுவேர் அளவில் 4K 120fps 10-bit Log வீடியோ பதிவு ஆகிய வசதிகளும் வழங்கப்பட உள்ளன. இதனுடன் 10-bit 4:2:2 encoding மற்றும் ACES colour system ஆதரவு வழங்கப்படுவதால், பின்னர் எடிட்டிங் மற்றும் கலர் கிரேடிங் செய்யும் வீடியோ கிரியேட்டர்களுக்கு கூடுதல் கட்டுப்பாடு கிடைக்கும்.

X500 சீரிஸின் வீடியோ திறன்களுக்கு பின்னணியில் புதிய பிரத்யேக இமேஜிங் சிப் முக்கிய பங்கு வகிக்க உள்ளது. விவோ மற்றும் MediaTek இணைந்து உருவாக்கியுள்ள புதிய 2nm இமேஜிங் சிப், குறிப்பாக தொழில்முறை Log வீடியோ பதிவின் செயல்திறனை மேம்படுத்தும் வகையில் பயன்படுத்தப்பட உள்ளது. இதனுடன் BlueImage Light Control 900 சென்சார், VCS 4.0 மற்றும் மேம்படுத்தப்பட்ட Image Stabilisation தொழில்நுட்பங்களும் இடம்பெற உள்ளன.

கேமரா போன்கள் பிரிவில் புதிய போட்டி

ஒட்டுமொத்தமாக பார்க்கும்போது, அதிக மெகாபிக்சல் கேமரா மட்டுமின்றி, 4K 240fps, 17-ஸ்டாப் டைனமிக் ரேஞ்ச், 4K 120fps HDR, 10-bit Log, 10-bit 4:2:2 encoding மற்றும் ACES ஆதரவு போன்ற தொழில்முறை வீடியோ அம்சங்களில் விவோ கவனம் செலுத்தியுள்ளது. இதனால் செப்டம்பர் 21-ம் தேதி சீனாவில் அறிமுகமாகும் X500 சீரிஸ், புகைப்படம் மற்றும் வீடியோ கிரியேட்டர்களை குறிவைக்கும் முக்கியமான கேமரா ஸ்மார்ட்போன் தொடராக மாறும் என எதிர்பார்க்கப்படுகிறது.

ஆப்பிள் ரசிகர்களுக்கு சர்ப்ரைஸ்! மடிக்கக்கூடிய ஐபோன் முதல் வாட்ச் வரை! என்னென்ன வரப்போகிறது?

கிஷோர் — Tue, 8 Sep 2026 13:30:20 +0530

Iphone 18 Launch Date in India: ஆப்பிள் நிறுவனத்தின் அடுத்த தலைமுறை தயாரிப்புகள் குறித்த எதிர்பார்ப்பை அதிகரிக்கும் வகையில், கியூபர்டினோவில் உள்ள ஸ்டீவ் ஜாப்ஸ் திரையரங்கில் செப்டம்பர் 9ஆம் தேதி “சர்ப்ரைஸ் அண்ட் ஷைன்” என்ற சிறப்பு வெளியீட்டு நிகழ்வு நடைபெற உள்ளது. டிம் குக்கிடமிருந்து செப்டம்பர் 1ஆம் தேதி தலைமை நிர்வாக அதிகாரி பொறுப்பை ஏற்றுக்கொண்ட ஜான் டெர்னஸ் தலைமையில் நடைபெறும் முதல் முக்கிய தயாரிப்பு அறிமுக நிகழ்வு என்பதால், தொழில்நுட்ப உலகின் கவனம் முழுவதும் ஆப்பிள் மீது திரும்பியுள்ளது.

மடிக்கக்கூடிய ஐபோன் வெளியாகுமா?

இந்த நிகழ்வின் மிகப்பெரிய எதிர்பார்ப்பாக ஆப்பிளின் முதல் மடிக்கக்கூடிய ஐபோன் உள்ளது. இந்த புதிய சாதனம் “ஐபோன் அல்ட்ரா” என்ற பெயரில் அறிமுகமாகலாம் என தகவல்கள் வெளியாகியுள்ளன. 2017ஆம் ஆண்டு ஐபோன் X மூலம் ஹோம் பட்டனை நீக்கியது போன்றே, மடிக்கக்கூடிய ஐபோனின் அறிமுகமும் நிறுவனத்தின் ஸ்மார்ட்போன் வரலாற்றில் மிகப்பெரிய வடிவமைப்பு மாற்றங்களில் ஒன்றாக அமையும் என எதிர்பார்க்கப்படுகிறது.

மடிக்கக்கூடிய திரையை மட்டும் மையமாகக் கொண்ட சாதனமாக இல்லாமல், அதன் உட்புற அமைப்புகளையும் மிகவும் நேர்த்தியாக ஒருங்கிணைக்க ஆப்பிள் முயற்சி செய்துள்ளதாக கூறப்படுகிறது. குறிப்பாக சிப் மற்றும் மதர்போர்டு உள்ளிட்ட முக்கிய வன்பொருள் பாகங்களை ஒருங்கிணைக்கும் வகையில் புதிய பொறியியல் அணுகுமுறை பயன்படுத்தப்பட்டிருக்கலாம். இதன் மூலம் மடிக்கப்பட்ட நிலையில் குறைந்த தடிமனுடனும், திறந்த நிலையில் பெரிய திரை அனுபவத்துடனும் சாதனம் உருவாக்கப்படலாம் என்ற எதிர்பார்ப்பு நிலவுகிறது.

ஐபோன் 18 புரோ மற்றும் புரோ மேக்ஸ்

மடிக்கக்கூடிய ஐபோனுடன், வழக்கமான பிரீமியம் வரிசையில் ஐபோன் 18 புரோ மற்றும் ஐபோன் 18 புரோ மேக்ஸ் மாடல்களும் அறிமுகமாகும் என எதிர்பார்க்கப்படுகிறது. இந்த மாடல்களில் முந்தைய தலைமுறையை ஒப்பிடும்போது மிகப்பெரிய வெளிப்புற வடிவமைப்பு மாற்றங்கள் இருக்காது என்றாலும், திரை மற்றும் முன்பக்க கேமரா அமைப்பில் சில மாற்றங்கள் இடம்பெற வாய்ப்புள்ளது.

குறிப்பாக டைனமிக் ஐலண்ட் பகுதியை மேலும் சிறியதாக மாற்றுவதற்கான முயற்சிகள் மேற்கொள்ளப்பட்டிருக்கலாம் என தகவல்கள் தெரிவிக்கின்றன. இதனால் திரையின் பயன்பாட்டுப் பகுதி அதிகரிப்பதுடன், ஐபோனின் முன்பக்க தோற்றமும் மேலும் நேர்த்தியாக மாறக்கூடும்.

ஐபோன் வெளியீட்டு முறையிலும் புதிய மாற்றம்

இந்த ஆண்டு ஆப்பிள் தனது ஐபோன் வெளியீட்டு திட்டத்திலும் முக்கிய மாற்றத்தை மேற்கொள்ளும் என கூறப்படுகிறது. இதுவரை ஒரே காலகட்டத்தில் பல்வேறு ஐபோன் மாடல்களை அறிமுகப்படுத்திய நிறுவனம், இனி பிரீமியம் மற்றும் அடிப்படை மாடல்களை வெவ்வேறு காலகட்டங்களில் வெளியிடும் முறைக்கு மாறக்கூடும்.

அதன்படி, ஐபோன் 18 புரோ மற்றும் ஐபோன் 18 புரோ மேக்ஸ் போன்ற உயர்நிலை மாடல்கள் செப்டம்பர் மாதத்திலேயே அறிமுகமாகலாம். அதே நேரத்தில், அடிப்படை ஐபோன் 18 மற்றும் அடுத்த தலைமுறை ஐபோன் ஏர் ஆகியவை 2027ஆம் ஆண்டு வசந்த காலத்தில் அறிமுகமாகலாம் என எதிர்பார்க்கப்படுகிறது. இந்த மாற்றம் ஆப்பிளின் தயாரிப்பு விற்பனை மற்றும் சந்தைப்படுத்தல் உத்தியில் புதிய அத்தியாயத்தை உருவாக்கக்கூடும்.

புதிய ஆப்பிள் வாட்ச் மற்றும் ஏர்பாட்ஸ்

ஐபோன்களைத் தாண்டி அணியக்கூடிய சாதனங்களிலும் புதிய அறிவிப்புகள் வெளியாகும் வாய்ப்பு உள்ளது. ஆப்பிள் வாட்ச் சீரிஸ் 12 மற்றும் ஆப்பிள் வாட்ச் அல்ட்ரா 4 ஆகிய புதிய மாடல்கள் நிகழ்வில் அறிமுகமாகலாம் என எதிர்பார்க்கப்படுகிறது. இவற்றில் செயல்திறன், பேட்டரி பயன்பாடு மற்றும் சுகாதாரக் கண்காணிப்பு உள்ளிட்ட அம்சங்களில் மேம்பாடுகள் இடம்பெறக்கூடும். இதனுடன் புதிய தலைமுறை ஏர்பாட்ஸ் சாதனங்களும் வெளியாகலாம். ஆப்பிளின் அணியக்கூடிய சாதனங்களுக்கான சந்தையை மேலும் விரிவுபடுத்தும் நோக்கில், ஏர்பாட்ஸ் வரிசையிலும் புதிய அம்சங்கள் அறிமுகப்படுத்தப்படலாம் என எதிர்பார்க்கப்படுகிறது.

ஆப்பிள் இன்டலிஜென்ஸ் மற்றும் சிரி குறித்து என்ன?

இந்த நிகழ்வு பெரும்பாலும் புதிய வன்பொருள் சாதனங்களை மையமாகக் கொண்டதாக இருப்பதால், ஆப்பிள் இன்டலிஜென்ஸ் மற்றும் சிரி தொடர்பாக மிகப்பெரிய அறிவிப்புகள் வெளியாகும் வாய்ப்பு குறைவாகவே பார்க்கப்படுகிறது. அதற்கு பதிலாக iOS 27, iPadOS 27 மற்றும் macOS உள்ளிட்ட புதிய இயக்க முறைமைகளின் அதிகாரப்பூர்வ வெளியீட்டு தேதிகள் குறித்த தகவல்கள் இடம்பெறலாம்.

இருப்பினும், புதிய ஐபோன் மற்றும் பிற சாதனங்களுடன் மென்பொருள் ஒருங்கிணைப்பு எவ்வாறு இருக்கும் என்பது நிகழ்வின் முக்கிய அம்சங்களில் ஒன்றாக இருக்கலாம். குறிப்பாக ஆப்பிளின் வன்பொருள் மற்றும் மென்பொருள் ஒருங்கிணைப்பு அதன் போட்டி நிறுவனங்களிலிருந்து தனித்துவமாக இருக்கும் நிலையில், புதிய தலைமுறை சாதனங்களில் இதற்கு கூடுதல் முக்கியத்துவம் வழங்கப்படலாம்.

உலகம் எதிர்பார்க்கும் ஆப்பிள் நிகழ்வு

மடிக்கக்கூடிய ஐபோன், ஐபோன் 18 புரோ வரிசை, புதிய ஆப்பிள் வாட்ச் மாடல்கள், ஏர்பாட்ஸ் மற்றும் ஸ்மார்ட் ஹோம் சாதனங்கள் என பல்வேறு தயாரிப்புகள் குறித்த எதிர்பார்ப்புகள் இந்த நிகழ்வை மேலும் முக்கியத்துவம் வாய்ந்ததாக மாற்றியுள்ளன. குறிப்பாக ஜான் டெர்னஸ் தலைமையில் நடைபெறும் முதல் முக்கிய தயாரிப்பு அறிமுக விழா என்பதால், வெளியாகும் சாதனங்களை மட்டுமின்றி ஆப்பிளின் அடுத்தகட்ட தயாரிப்பு உத்தி எப்படியிருக்கும் என்பதையும் தொழில்நுட்ப உலகம் உன்னிப்பாக கவனிக்கிறது.

Morse Code என்றால் என்ன? புள்ளி, கோடு மூலம் செய்தி அனுப்பும் சுவாரஸ்யமான தகவல் தொடர்பு முறை!

ராகேஷ் தாரா — Mon, 7 Sep 2026 18:05:53 +0530

தகவல் தொடர்பு இன்று ஸ்மார்ட்போன், இணையம், சமூக வலைதளம் என பல்வேறு தொழில்நுட்பங்களைக் கடந்து வளர்ந்துவிட்டது. ஆனால், பல ஆண்டுகளுக்கு முன்பு தொலைதூரத்தில் இருக்கும் ஒருவருக்கு செய்தி அனுப்புவது அவ்வளவு எளிதானதாக இல்லை. அப்போது தொலைத்தொடர்பு துறையில் மிகப்பெரிய மாற்றத்தை ஏற்படுத்திய கண்டுபிடிப்புகளில் ஒன்றுதான் Morse Code.

மோர்ஸ் கோட் என்றால் என்ன ?

Morse Code என்பது ஆங்கில எழுத்துக்கள், எண்கள் மற்றும் சில குறியீடுகளை புள்ளி (.) மற்றும் கோடு (-) ஆகிய இரண்டு அடையாளங்களின் மூலம் வெளிப்படுத்தும் தகவல் தொடர்பு முறை. ஒவ்வொரு எழுத்துக்கும் தனித்தனி புள்ளி, கோடு அமைப்பு இருக்கும். உதாரணமாக, ‘A’ என்ற எழுத்துக்கு .-, ‘B’ என்ற எழுத்துக்கு -... என குறியீடுகள் அமைக்கப்பட்டுள்ளன. அதில் மிகவும் பிரபலமான குறியீடு ... --- ... ஆகும். இது SOS என்ற அவசர உதவிக்கான சர்வதேச குறியீட்டை குறிக்கிறது.

கண்டுபிடித்தவர்

Morse Code முறையை அமெரிக்க கலைஞரும் கண்டுபிடிப்பாளருமான சாமுவேல் மோர்ஸ் மற்றும் அவரது குழுவினர் உருவாக்கினர். 19ஆம் நூற்றாண்டில் தொலைத்தொடர்பு வளர்ச்சியடைந்தபோது, மின்சார சிக்னல்களின் மூலம் தகவல்களை தொலைதூரத்திற்கு அனுப்புவதற்கு இந்த முறை பயன்படுத்தப்பட்டது. Telegraph கருவியின் உதவியுடன் அனுப்பப்படும் குறுகிய சிக்னல் புள்ளியாகவும், நீண்ட சிக்னல் கோடாகவும் புரிந்துகொள்ளப்பட்டது.

பயண்பாடு

இந்த முறையின் முக்கிய சிறப்பு, சிக்கலான தகவல்களையும் எளிய சிக்னல்களாக மாற்றி அனுப்ப முடிந்ததுதான். கம்பி வழியாக மட்டுமின்றி ஒளி, ஒலி மற்றும் ரேடியோ சிக்னல்கள் மூலமாகவும் Morse Code தகவல்களை அனுப்ப முடிந்தது. இதனால் கடல் பயணம், ராணுவத் தகவல் தொடர்பு மற்றும் அவசரகால தகவல் பரிமாற்றம் போன்றவற்றிலும் இது முக்கியப் பங்கு வகித்தது.

காலப்போக்கில் தொலைபேசி, ரேடியோ, செயற்கைக்கோள் தொடர்பு மற்றும் இணையம் போன்ற நவீன தொழில்நுட்பங்கள் வளர்ந்ததால் Morse Code-ன் அன்றாட பயன்பாடு குறைந்துவிட்டது. இருந்தாலும், அதன் எளிமை காரணமாக இன்றும் வரலாற்று முக்கியத்துவம் கொண்ட தகவல் தொடர்பு முறையாக அது பார்க்கப்படுகிறது.

புள்ளியும் கோடும் மட்டுமே பயன்படுத்தி ஒரு முழு செய்தியையே அனுப்ப முடியும் என்பதுதான் Morse Code-ன் மிகப்பெரிய சுவாரஸ்யம். தொழில்நுட்பம் எவ்வளவு வளர்ந்தாலும், தகவல் தொடர்பு வரலாற்றில் Morse Code ஏற்படுத்திய தாக்கம் தனித்துவமானதாகவே உள்ளது.

Coimbatore Pump Industry: ‘ஆசியாவின் பம்ப் நகரம்’ கோவை... இனி உலக சந்தையிலும் கொடிகட்டிப் பறக்கப் போகும் தமிழகம்!

கிஷோர் — Mon, 7 Sep 2026 13:39:31 +0530

கோவை என்றாலே பொறியியல் தொழில், மோட்டார் மற்றும் பம்ப் உற்பத்தி துறைக்கு முக்கியத்துவம் பெற்ற நகரம் என்ற அடையாளம் உள்ளது. இந்தியாவில் பம்ப் செட் உற்பத்திக்கு மிகப்பெரிய வரலாற்றைக் கொண்ட கோவை, தற்போது உள்நாட்டு தேவையை பூர்த்தி செய்வதோடு மட்டுமல்லாமல், சர்வதேச சந்தையிலும் தனது தடத்தை வலுப்படுத்தும் நோக்கில் வேகமாக முன்னேறி வருகிறது. விவசாயம் மற்றும் குடிநீர் தேவைகளுக்கான சாதாரண பம்புகளில் இருந்து தொழிற்சாலைகள், சுரங்கங்கள், அனல்மின் நிலையங்கள் மற்றும் கழிவுநீர் மேலாண்மை போன்ற பல்வேறு துறைகளுக்கான நவீன பம்புகள் வரை கோவை உற்பத்தியாளர்கள் தங்களது தயாரிப்பு திறனை விரிவுபடுத்தி வருகின்றனர்.

பம்ப் தொழில் வரலாறு

இந்தியாவில் முதன்முறையாக 1926-ஆம் ஆண்டில் பம்ப் செட் தயாரிப்பில் கோவை தடம் பதித்ததாகக் கூறப்படுகிறது. அதன்பிறகு சுமார் ஒரு நூற்றாண்டு காலமாக பம்ப் மற்றும் மோட்டார் உற்பத்தியில் கோவை முக்கிய மையமாக உருவெடுத்துள்ளது. குறிப்பாக விவசாயப் பயன்பாட்டுக்கான பம்புகள் மற்றும் மோட்டார்கள் மூலம் நாட்டின் பல்வேறு பகுதிகளிலும் கோவையின் உற்பத்தித் துறை வலுவான இடத்தைப் பெற்றது.

காலப்போக்கில் தொழில்நுட்ப வளர்ச்சிக்கு ஏற்ப கோவை பம்ப் நிறுவனங்களும் தங்களது உற்பத்தி முறைகளில் மாற்றங்களை கொண்டு வந்துள்ளன. இதன் காரணமாகவே கோவை தற்போது இந்திய அளவில் மட்டுமின்றி சர்வதேச அளவிலும் ‘ஆசியாவின் பம்ப் நகரம்’ என்ற அடையாளத்துடன் பார்க்கப்படுகிறது.

இறக்குமதிக்கு மாற்றாக உருவாகும் உள்நாட்டு தொழில்நுட்பம்

பம்ப் தொழிலில் கோவை எதிர்கொள்ளும் முக்கியமான மாற்றங்களில் ஒன்று, முன்பு வெளிநாடுகளில் இருந்து இறக்குமதி செய்யப்பட்ட நவீன பம்புகளை தற்போது உள்நாட்டிலேயே வடிவமைத்து உற்பத்தி செய்யும் திறன் அதிகரித்திருப்பதாகும்.

தென்னிந்திய பொறியியல் உற்பத்தியாளர்கள் சங்கமான SIEMA உள்ளிட்ட தொழில் அமைப்புகள் இணைந்து உருவாக்கிய ஆராய்ச்சி மையங்கள் இந்த மாற்றத்திற்கு முக்கிய பங்களிப்பை வழங்கி வருகின்றன. இதன் மூலம் வெளிநாட்டு தொழில்நுட்பத்தை சார்ந்திருந்த சில வகை பம்புகளுக்கு உள்நாட்டு மாற்றுகள் உருவாக்கப்பட்டுள்ளன.

குறிப்பாக, சுரங்கங்கள் மற்றும் அனல்மின் நிலையங்களில் பயன்படுத்தப்படும் ‘ஸ்லரி பம்புகள்’ போன்ற நவீன பம்புகள் முன்பு வெளிநாடுகளில் இருந்து பெறப்பட்ட நிலையில், தற்போது கோவையிலேயே உற்பத்தி செய்யப்படுகின்றன. மத்திய அரசின் கனரக தொழில் அமைச்சகத்தின் ரூ.13 கோடி நிதியுதவியுடன் நவீன கட்டுப்படுத்தி வசதிகளைக் கொண்ட பம்புகளை உருவாக்கும் முயற்சிகளும் மேற்கொள்ளப்பட்டுள்ளன.

50 வாட் முதல் 500 கிலோவாட் வரை சோதனை செய்யும் வசதி

பம்ப் மற்றும் மோட்டார் உற்பத்தியில் தரம் என்பது சர்வதேச சந்தையில் போட்டியிடுவதற்கான முக்கிய அம்சமாக உள்ளது. இதை கருத்தில் கொண்டு கோவையில் சர்வதேச தரத்துக்கு இணையான மோட்டார் பரிசோதனை வசதிகளும் உருவாக்கப்பட்டுள்ளன.

50 வாட் திறன் கொண்ட சிறிய மோட்டார்கள் முதல் 500 கிலோவாட் திறன் கொண்ட பெரிய மோட்டார்கள் வரை பரிசோதிக்கக்கூடிய தானியங்கி சோதனை மையம் அமைக்கப்பட்டுள்ளது. இதுபோன்ற தொழில்நுட்ப கட்டமைப்புகள் கோவை நிறுவனங்கள் சர்வதேச தரநிலைகளை பின்பற்றி தயாரிப்புகளை உருவாக்குவதற்கும், ஏற்றுமதி சந்தையில் நம்பிக்கையை அதிகரிப்பதற்கும் உதவும் என எதிர்பார்க்கப்படுகிறது.

ரூ.35 ஆயிரம் கோடி சந்தை... ரூ.50 ஆயிரம் கோடியாக உயர்த்த இலக்கு

இந்தியாவின் பம்ப் சந்தையும் தொடர்ந்து வளர்ச்சி அடைந்து வருகிறது. தற்போது சுமார் ரூ.35,000 கோடி மதிப்புடையதாகக் கருதப்படும் இந்திய பம்ப் சந்தையை, 2031-ஆம் ஆண்டிற்குள் ரூ.50,000 கோடியாக உயர்த்த இலக்கு நிர்ணயிக்கப்பட்டுள்ளது.

உலகளாவிய பம்ப் சந்தையின் மதிப்பு சுமார் 60.9 பில்லியன் அமெரிக்க டாலராக இருக்கும் நிலையில், உயர்மதிப்பு கொண்ட நவீன பம்புகளுக்கான சர்வதேச சந்தையில் இந்தியாவின் பங்களிப்பு தற்போது வெறும் 1 முதல் 2 சதவீதம் அளவிலேயே இருப்பதாக தொழில்துறை தரப்பில் தெரிவிக்கப்படுகிறது. இதனால், இந்திய உற்பத்தியாளர்களுக்கு சர்வதேச சந்தையில் இன்னும் மிகப்பெரிய வாய்ப்பு இருப்பதாக பார்க்கப்படுகிறது.

தொழிற்துறை பம்புகளில் தன்னிறைவை நோக்கி இந்தியா

ஒரு காலத்தில் தொழிற்துறைக்கு தேவையான பல்வேறு நவீன பம்புகளுக்காக இந்தியா இறக்குமதியை அதிகமாக நம்பியிருந்தது. ஆனால் தற்போது அந்த நிலை படிப்படியாக மாறி வருகிறது. இந்திய உற்பத்தியாளர்கள் உள்நாட்டுத் தேவையில் சுமார் 60 முதல் 70 சதவீதத்தை பூர்த்தி செய்யும் அளவுக்கு வளர்ந்துள்ளதாக தொழில்துறை தரப்பில் கூறப்படுகிறது.

இதில் கோவை நிறுவனங்களின் பங்களிப்பும் முக்கியமானதாக உள்ளது. விவசாய பம்புகளைத் தாண்டி தொழிற்சாலை பயன்பாடு, கழிவுநீர் அகற்றுதல், சுரங்கம், மின்சாரம் உள்ளிட்ட துறைகளுக்கான உயர் தொழில்நுட்ப பம்புகளை உருவாக்குவதில் கவனம் செலுத்தப்படுகிறது.

சோலார் பம்புகளில் புதிய தொழில்நுட்பத்துக்கு அதிகரிக்கும் தேவை

புதுப்பிக்கத்தக்க எரிசக்தியின் பயன்பாடு அதிகரித்து வரும் நிலையில், சோலார் பம்புகளுக்கான சந்தையும் விரிவடைந்து வருகிறது. குறிப்பாக குறைந்த மின்சார நுகர்வு மற்றும் அதிக செயல்திறன் கொண்ட BLDC மோட்டார்களுக்கான தேவை அதிகரித்து வருகிறது.

சோலார் மின்சாரத்தை பயன்படுத்தி நீர்ப்பாசனம் மற்றும் நீர் இறைக்கும் பணிகளை மேற்கொள்ளும் பம்ப் அமைப்புகளில் BLDC தொழில்நுட்பம் முக்கிய பங்கு வகிக்கிறது. இதனால் எதிர்காலத்தில் சோலார் பம்புகள் மற்றும் அதனுடன் தொடர்புடைய நவீன மோட்டார் தொழில்நுட்பங்கள் கோவை உற்பத்தியாளர்களுக்கு புதிய சந்தை வாய்ப்புகளை உருவாக்கும் என எதிர்பார்க்கப்படுகிறது.

நீண்ட காத்திருப்புக்கு முடிவு! கேலக்ஸி S25 பயனர்களுக்கு சாம்சங் வழங்கிய செம்ம சர்ப்ரைஸ்!

கிஷோர் — Sat, 5 Sep 2026 12:42:26 +0530

சாம்சங் நிறுவனம் தனது கேலக்ஸி S26 ஸ்மார்ட்போன்களில் கடந்த சில மாதங்களாக One UI 9 பீட்டா பதிப்பை சோதனை செய்து வந்த நிலையில், தற்போது இந்த பீட்டா திட்டத்தை கேலக்ஸி S25 சீரிஸ் போன்களுக்கும் அதிகாரப்பூர்வமாக விரிவுபடுத்தியுள்ளது. கேலக்ஸி S25, S25 பிளஸ், S25 அல்ட்ரா மற்றும் S25 FE ஆகிய மாடல்களை வைத்திருக்கும் பயனர்கள் அனைவரும் இந்த புதிய ஆண்ட்ராய்டு 17 அடிப்படையிலான மென்பொருள் சோதனையில் இணைந்து கொள்ள முடியும்.

பீட்டா பதிப்பின் முக்கிய அம்சங்கள் மற்றும் கிடைக்கும் பகுதிகள்

தற்போது முதற்கட்டமாக இந்தியா, தென்கொரியா மற்றும் இங்கிலாந்து ஆகிய நாடுகளில் உள்ள பயனர்களுக்கு இந்த பீட்டா சோதனை வெளிவந்துள்ளது. இந்த புதுப்பிப்பு சுமார் 3.8GB அளவில் (ZZHL ஃபார்ம்வேர்) ஆகஸ்ட் 2026 செக்யூரிட்டி பேட்ச் உடன் வழங்கப்படுகிறது. இதில் கூடுதல் விருப்பங்களுடன் கூடிய விரைவு அமைப்புகள் (Quick Settings), மேம்படுத்தப்பட்ட DeX வசதி மற்றும் பல்வேறு புதிய அணுகல் அம்சங்கள் (Accessibility features) சேர்க்கப்பட்டுள்ளன.

பொதுப் பதிப்பு வெளியீடு மற்றும் பதிவிறக்கம் செய்யும் முறை

கேலக்ஸி S26 சீரிஸிற்கான நிலையான (Stable) One UI 9 அப்டேட் அடுத்த சில வாரங்களில் வெளியாகவுள்ள நிலையில், S25 சீரிஸிற்கான நிலையான பதிப்பும் விரைவில் பயன்பாட்டிற்கு வரும் என எதிர்பார்க்கப்படுகிறது. விருப்பமுள்ள கேலக்ஸி S25 பயனர்கள் தங்கள் போனில் உள்ள 'Samsung Members' செயலியில் 'Notices' பகுதிக்குச் சென்று பீட்டா திட்டத்தில் பதிவு செய்து, ஓவர்-தி-ஏர் (OTA) முறையில் இந்த புதிய அப்டேட்டைப் பதிவிறக்கம் செய்து அனுபவிக்கலாம்.