பாரீஸ் ஒலிம்பிக் 2024:
கடந்த ஜூலை 26 ஆம் தேதி தொடங்கிய பாரீஸ் ஒலிம்பிக் தொடர் நாளையுடன் முடிவடைகிறது. முன்னதாக மகளிர் குத்துச்சண்டை 66 கிலோ எடைப்பிரிவில் சீனா வீராங்கனை யாங் லியூவை 5-0 என்ற புள்ளிகள் கணக்கில் வீழ்த்தி அல்ஜீரியாவைச் சேர்ந்த இமான் கலீஃப் தங்கப் பதக்கத்தை கைப்பற்றினார். அல்ஜீரியாவைச் சேர்ந்த இமான் கலீஃப் ஒரு பெண்ணே அல்ல, அவர் ஒரு ஆண் என்று இத்தாலி வீராங்கனை ஏஞ்சலா கரிணி குற்றம் சாட்டியிருந்தார்.
இது சமூக வலைதளங்களில் மிகப்பெரிய விவாதத்தை ஏற்படுத்தியது. இமான் கலீஃப்பிற்கு ஆதரவாகவும், எதிராகவும் கருத்துகள் பதிவிடப்பட்டன. ஆனால் தன் பாலினம் குறித்து எந்த ஒரு கருத்தும் தெரிவிக்காத இமான் தற்போது அது தொடர்பாக பேசியுள்ளார். அதில், "கடந்த 8 ஆண்டுகளாக ஒலிம்பிக் பதக்கத்தை வெல்வது மட்டுமே எனது கனவாக இருந்தது. இப்போது நானும் ஒலிம்பிக் சாம்பியன். தங்கப் பதக்கம் வென்றுள்ளேன் என்பது மகிழ்ச்சியாக உள்ளது. எனக்கு ஆதரவாக பாரீஸ் உள்ள அனைத்து அல்ஜீரியா மக்களுக்கும் நன்றி சொல்ல கடமைப்பட்டுள்ளேன். இந்த வெற்றியை அல்ஜீரியா மக்களுக்கும், என் குழுவினருக்கும் அர்ப்பணிக்கிறேன்.
பெண்ணாகவே பிறந்தேன்.. பெண்ணாகவே வளர்ந்தேன்:
எனது வெற்றியால் அல்ஜீரியாவில் மகிழ்ச்சி அடைவார்கள் என்று நம்புகிறேன். நாம் அனைவரும் ஒலிம்பிக்கில் பங்கேற்றபதே விளையாட்டு வீரர்களாக திறமையை வெளிப்படுத்துவதற்கு தான். மீண்டும் இதுபோன்ற தாக்குதல்கள் யாருக்கும் நடக்காமல் இருக்க வேண்டும். இந்த ஒலிம்பிக் தொடரில் பங்கேற்க நான் முறையாக தகுதிபெற்றுள்ளேன்.
மற்ற பெண்களை போல் நானும் ஒரு பெண் தான். ஒரு பெண்ணாகவே பிறந்தேன். பெண்ணாகவே வளர்ந்தேன். பெண்ணாக தான் பதக்கம் வென்றுள்ளேன். என்னை எதிரியாக நினைக்கும் சிலரால் இந்த வெற்றியை ஜீரணிக்க முடியவில்லை. இந்த வெற்றிக்காக 8 ஆண்டுகளாக கடினமாக உழைத்துள்ளேன். 8 ஆண்டுகளாக தூக்கம் இழந்து பயிற்சி செய்திருக்கிறேன்" என்று கூறியிருக்கிறார் இமான் கலீஃப்.