Just In
Neeraj Chopra Himani: வாவ்! தங்கமகன் நீரஜ் சோப்ராவின் செல்ல மனைவி ஹிமானிக்கு இப்படி ஒரு பின்னணியா?
Neeraj Chopra Himani Marriage: ஒலிம்பிக் நாயகன் நீரஜ் சோப்ராவின் மனைவி ஹிமானி கல்லூரி மாணவி, விளையாட்டு வீராங்கனை என பன்முகம் கொண்டவர்.
உலக விளையாட்டு அரங்கில் இந்தியாவிற்கு பெருமை சேர்த்தவர் நீரஜ் சோப்ரா. ஈட்டி எறிதல் பிரிவில் ஒலிம்பிக்கில் இந்தியாவிற்கு தங்கம் வாங்கி பெருமை பெற்றுத் தந்தவர். இவரது திருமண புகைப்படம் நேற்று வெளியானது. திடீரென நீரஜ் சோப்ரா மிக எளிமையாக திருமணம் செய்து கொண்டது ரசிகர்களுக்கு அதிர்ச்சியாக இருந்தாலும், அவருக்கு ரசிகர்கள் வாழ்த்து தெரிவித்து வருகின்றனர்.
நீரஜ் சோப்ரா மனைவி யார்?
நீரஜ் சோப்ரா ஹிமானி மோர் என்ற இளம்பெண்ணைத் திருமணம் செய்துள்ளார். ஹிமானி மோருக்கு தற்போது 25 வயதாகிறது. அவர் ஹரியானா மாநிலத்தில் உள்ள சோனிபட்டைச் சேர்ந்தவர். ஹிமானி சோனிபட்டில் உள்ள லிட்டில் ஏஞ்சல்ஸ் பள்ளியில் தனது பள்ளிப்படிப்பை முடித்துள்ளார்.
பள்ளி காலத்திலே படிப்பு மட்டுமின்றி விளையாட்டிலும் ஆர்வத்துடன் இருந்து வந்துள்ளார். நீரஜ் சோப்ரா ஈட்டி எறிதல் வீரராக இருப்பது போல, ஹிமானி டென்னிஸ் வீராங்கனை ஆவார். தற்போது விளையாட்டு மேலாண்மைப் படிப்பை அமெரிக்காவின் நியூ ஹாம்ப்ஷையரில் உள்ள ஃப்ராங்க்ளின் பியர்ஸ் பல்கலைக்கழகத்தில் படித்து வருகிறார். முன்னதாக பள்ளிப்படிப்பை முடித்த பிறகு, டெல்லியில் உள்ள கல்லூரியில் அரசியல் அறிவியல் மற்றும் உடற்கல்வி பிரிவில் பட்டப்படிப்பை முடித்துள்ளார்.
டென்னிஸ் வீராங்கனை:
சிறு வயது முதலே டென்னிஸ் போட்டிகளில் ஆர்வத்துடன் பங்கேற்று வரும் ஹிமானி பல போட்டிகளில் பங்கேற்றுள்ளார். தேசிய அளவில் பல டென்னிஸ் போட்டிகளில் ஆடியுள்ள ஹிமானி இந்திய டென்னிஸ் தரவரிசையில் மகளிர் ஒற்றையர் பிரிவில் 42வது இடத்திலும், இரட்டையர் பிரிவில் 27வது இடத்திலும் உள்ளார்.
ஹரியானா மாநிலத்தின் சிறந்த டென்னிஸ் வீராங்கனைகளில் ஒருவரான ஹிமானி இந்திய அளவில் சிறந்த டென்னிஸ் வீராங்கனைகளுக்கான இரட்டையர் பிரிவு தரவரிசைப் பட்டியலில் 30வது இடத்திற்குள் 14 வாரங்களுக்கு மேல் இடம்பிடித்து சாதனைப் படைத்துள்ளார். மேலும், அமெரிக்காவின் மசாசெட்ஸில் உள்ள ஆம்ஹெர்ஸ்ட் கல்லூரியில் டென்னிஸ் உதவி பயிற்சியாளராகவும் பணியாற்றி வருகிறார்.
பன்முகத் திறன் கொண்ட ஹிமானி நீரஜ் சோப்ராவைத் திருமணம் செய்து கொண்டதற்கு பலரும் வாழ்த்துகளைத் தெரிவித்து வருகின்றனர். ஈட்டி எறிதலில் இந்தியாவிற்கு பெருமை சேர்த்த நீரஜ் சோப்ரா டோக்கியோ ஒலிம்பிக்கில் தங்கப்பதக்கமும், கடந்த ஒலிம்பிக்கில் வெள்ளியும் வென்றிருந்தார். மேலும், ஈட்டி எறிதலுக்கான பல பிரபலமான தொடர்களில் வெற்றி பெற்றும் இந்தியாவிற்கு பெருமை சேர்த்துள்ளார். இதுதவிர, இந்தியாவிற்காக ஒலிம்பிக்கில் தனிநபர் பிரிவில் அபினவ் பிந்த்ராவிற்கு பிறகு தங்கம் வென்ற இரண்டாவது இந்தியர் நீரஜ் சோப்ரா என்பது குறிப்பிடத்தக்கது.