IPL Schedule: ஐபிஎல் திருவிழா..! எப்போது தொடங்குகிறது? முதல் போட்டி RCB Vs CSK? முழு அட்டவணை விவரங்கள்

IPL 2026 Schedule: ஐபிஎல் கிரிக்கெட் போட்டிக்கான அட்டவணை எப்போது வெளியாகும்? என்பது தொடர்பான தகவல்கள் வெளியாகியுள்ளன.

ஐபிஎல் 2026

Source : Social Media

IPL  2026 Schedule: நடப்பாண்டு ஐபிஎல் கிரிக்கெட்டில் முதல் போட்டி யாருக்கு? எப்போது? நடைபெறும் என்பது தொடர்பான விவரங்களை இந்த தொகுப்பில் அறியலாம்.

ஐபிஎல் 2026 -கிரிக்கெட் திருவிழா..

ஐசிசியின் டி20 உலகக் கோப்பை இறுதிகட்டத்தை எட்டியுள்ள நிலையில், கோடைகால கிரிக்கெட் திருவிழாவான ஐபிஎல் போட்டிகள் எப்போது தொடங்கும் என்பது ரசிகர்களின் மிகப்பெரிய எதிர்பார்ப்பாக உள்ளது. மார்ச் மாத இறுதியில் இந்த போட்டி தொடங்கும் என கூறப்படும் நிலையில், அதற்கான அட்டவணை விவரங்களை இந்திய கிரிக்கெட் வாரியம் தற்போது வரை வெளியிடவில்லை.  இந்நிலையில் அறிவிப்பிற்காக நீண்ட நாள் காத்திருக்க வேண்டியதில்லை எனவும், அடுத்த இரண்டு - மூன்று தினங்களில் போட்டிக்கான அட்டவணை விவரங்கள் வெளியாகும் என்றும், பிசிசிஐ செயலாளர் தேவஜித் சைகியா தெரிவித்துள்ளார்.

எப்போது அறிவிப்பு? பிசிசிஐ சொல்வது என்ன?

தனியார் செய்தி நிறுவனத்திற்கு அளித்த பேட்டியில், ஐபிஎல் போட்டிக்கான அட்டவணைக்காக 2 -3 தினங்கள் காத்திருங்கள். தாமதமாகிக் கொண்டிருக்கிறது என எங்களுக்கு தெரியும். ஆனால், தமிழ்நாடு, மேற்குவங்க உள்ளிட்ட 5 மாநிலங்கள் சட்டமன்ற தேர்தல் நடைபெற உள்ளது.  அதற்கான தேதிகளை தேர்தல் ஆணையம் உறுதி செய்வதற்காக காத்திருக்கிறோம். இரண்டு மூன்று தினங்களில் நாங்கள் முடிவெடுக்கும் சூழல் உள்ளது. அதன் பிறகு ஐபிஎல் போட்டிக்கான அட்டவணை தொடர்பாக அறிவிப்போம்” பிசிசிஐ செயலாளர் தெரிவித்துள்ளார்.

முதல் போட்டி யாருக்கு? எங்கே?

நடப்பாண்டிற்கான முதல் போட்டி எந்த இரண்டு அணிகளுக்கு இடையே திட்டமிடப்பட்டுள்ளது என்ற விவரங்களை பிசிசிஐ செயலாளர் வெளியிட மறுத்துவிட்டார். ஆனால், நீண்டகாலமாக பின்பற்றப்பட்டு பரும் பாரம்பரியத்தின்படி, நடப்பு சாம்பியனான ராயல் சேலஞ்சர்ஸ் பெங்களூரு அணி தொடக்க போட்டியில் களமிறங்கும் என எதிர்பார்க்கப்படுகிறது. தொடக்கப் போட்டி மூலம் நடப்பாண்டு ஐபிஎல் தொடரை பிரமாண்டமானதாக வடிவமைக்கும் வகையில், சென்னை சூப்பர் கிங்ஸ் அல்லது கடந்த ஆண்டு இரண்டாவது இடம் பிடித்த பஞ்சாப் கிங்ஸ் அணியை, ஆர்சிபிக்கு எதிராக களமிறக்க பிசிசிஐ திட்டமிட்டுள்ளதாம். 

சின்னசாமி மைதானத்தில் போட்டியா?

கடந்த ஆண்டு ஆர்சிபி அணி கோப்பையை வென்ற பிறகு நடத்தப்பட்ட பேரணியில் சிக்கி, பொதுமக்கள் பலர் உயிரிழந்த சம்பவம் அதிர்ச்சியை ஏற்படுத்தியடு. இதையடுத்து பெங்களூரு சின்னசாமி மைதானத்தில் போட்டிகளை நடத்த தடை விதிக்கப்பட்டது. நீண்டகால பேச்சுவார்த்தைகளுக்குப் பிறகு நடப்பாண்டு ஐபிஎல் போட்டிகளை அங்கு நடத்த மாநில அரசு அனுமதி அளித்ததாக கூறப்படுகிறது. எனவே, நடப்பாண்டு ஐபிஎல் தொடரில் பெங்களூரு அணிக்காக சொந்த மைதானமாக சின்னசாமி மைதானம் தேர்வாகுமா? அங்கு அதிகப்படியான போட்டிகள் நடத்தப்படுமா? என்பதை பொறுத்து இருந்து தான் பார்க்க வேண்டும்.