( IPL 2023 GTvsKKR ) ஐபிஎல் தொடரில் கொல்கத்தா நைட் ரைடர்ஸ் அணிக்கு எதிரான போட்டியில் டாஸ் வென்ற குஜராத் டைட்டன்ஸ் அணி முதலில் பந்துவீச்சை தேர்வு செய்துள்ளது. நடப்பு தொடரில் ரிங்கு சிங்கின் அதிரடி ஆட்டத்தால் கொல்கத்தாவிடம் தோல்வியை சந்தித்த, குஜராத் அணி அதற்கு பழிவாங்கும் நோக்கில் இன்றைய போட்டியில் களமிறங்கி உள்ளது.


ஐபிஎல் 16வது சீசன்:


ஐபிஎல் தொடரின் 16வது சீசனின் கடந்த மார்ச் மாதம் 31ஆம் தேதி தொடங்கி விறுவிறுப்பாக நடைபெற்று வருகிறது. இந்த சீசனில் களமிறங்கியுள்ள 10 அணிகள் அனைத்தும் புள்ளிப் பட்டியலில்  முதல் நான்கு இடங்களுக்குள் இடம் பெற மும்மரமாக விளையாடி வருகின்றன. இதில் ஏற்கனவே டெல்லி மற்றும் ஹைதராபாத் அணிகள் தொடர் தோல்வியால் தொடரில் இருந்து வெளியேறும் நிலையில் உள்ளது.


குஜராத் கொல்கத்தா மோதல்:


மற்ற 8 அணிகளில் 4 அணிகள் ப்ளேஆஃப் சுற்றுக்கு முன்னேற வாய்ப்புகள் உள்ளன. அவற்றில் பந்து வீச்சு மற்றும் பேட்டிங் என அனைத்திலும் சிறந்து விளங்கும் அணிகளாக இருக்கும் கொல்கத்தா நைட் ரைடர்ஸ் அணியும் நடப்புச் சாம்பியனும் பலமான அணியுமான குஜராத் டைட்டன்ஸ் அணிகள் மோதுகின்றன. இதில் டாஸ் வென்ற குஜராத் அணி முதலில் பந்துவீச்சை தேர்வு செய்துள்ளது.


இதுவரை கொல்கத்தா நைட் ரைடர்ஸ் 


நடப்பு தொடரில் இதுவரை 8 போட்டிகளில் விளையாடியுள்ள கொல்கத்தா அணி அதில் மூன்றி மட்டுமே வெற்றி பெற்று ஆறு புள்ளிகளுடன் புள்ளிப்பட்டியலில் 7வது இடத்தில் உள்ளது. இந்த சீசன் கொல்கத்தா அணிக்கு ஏமாற்றத்துடன் தொடங்கியது எனலாம். பஞ்சாப் அணியுடனான மோதலில் மழை காரணமாக டக்வெர்த் - லீவிஸ்  முறைப்படி  தோல்வியை தழுவியது. இந்த தொடரில் கொல்கத்தா பெற்ற வெற்றி என்றால் அது பெங்களூரு அணிக்கு எதிரான 2 போட்டிகளும், குஜராத் அணிக்கு எதிரான ஒரு போட்டியும் தான்.


குஜராத் அணியை அதன் சொந்த மைதானத்தில் வீழ்த்தியது கொல்கத்தா அணிக்கு பலமான விசயமாக உள்ளது. இன்றைய போட்டி கொல்கத்தாவின் ஈடன் கார்டன் மைதானத்தில் நடைபெறுவதால் கொல்கத்தா அணி வெற்றி பெற முனைப்பு காட்டி வருகிறது. பெங்களூரு அணிக்கு எதிரான வெற்றிக்குப் பின்னர் கொல்கத்தா அணி இன்று கூடுதல் நம்பிக்கையுடன் களமிறங்கியுள்ளது.


இதுவரை குஜராத் டைட்டன்ஸ் 


கடந்த ஆண்டு களமிறங்கி கோப்பையை தன்வசமாக்கிய குஜராத் அணி இந்த ஆண்டும் வீறுநடைபோட்டு புள்ளிப்பட்டியலில் ஏற்றத்துடன் இருக்க முனைப்பு காட்டும். இதுவரை 7 போட்டிகளில் விளையாடியுள்ள குஜராத் அணி இரண்டு போட்டிகளில் மட்டும் தோல்வியைச் சந்தித்துள்ளது. ஐந்து போட்டிகளில் வெற்றி பெற்று புள்ளிப்பட்டியலில் மூன்றாவது இடத்தில் உள்ள குஜராத் அணி இந்த போட்டியில் வெற்றி பெற்றால் புள்ளிப்பட்டியலில் முதல் இடத்துக்குச் செல்லும். மேலும் தனது சொந்த மைதானத்தில் கொல்கத்தாவிடம் தோல்வியைச் சந்தித்த குஜராத் அணி அதற்கு பதிலடி வழங்கும் நோக்கில் சிறப்பாக செயல்படும் எனலாம்.