ipl

ஹாப்பி பர்த்டே மாஸ்டர் மைண்ட் தினேஷ் கார்த்திக்.. மாஸ் கேப்டன் துரந்தர் படிதார்! சாம்பியன் பட்டம்தான் ட்ரீட்!

சுகுமாறன் — Mon, 1 Jun 2026 07:34:22 +0530

ஐபிஎல் கிரிக்கெட் தொடரின் 19வது சீசன் கோப்பையை ஆர்சிபி அணி கைப்பற்றியுள்ளது. இதன்மூலம் ஐபிஎல் கோப்பையை இரண்டாவது முறையாகவும், 2வது முறையாக தொடர்ச்சியாகவும் வென்று அசத்தியுள்ளனர்.

சாம்பியன் ஆர்சிபி:

ஐபிஎல் தொடரிலே மிக அதிக அளவில் ஏளனத்திற்கு ஆளான ஒரு கிரிக்கெட் அணி ஆர்சிபி. இந்த சூழலில், இன்று ஆர்சிபி ஆடவர் அணியிடம் 2 கோப்பைகளும், ஆர்சிபி மகளிர் அணியிடம் 2 கோப்பைகளும் உள்ளது. ஆர்சிபி ஆடவர் அணியின் இந்த அசுர வளர்ச்சிக்கு முக்கிய காரணம் தினேஷ் கார்த்திக்.

மாஸ்டர் மைண்ட்:

ஆர்சிபி அணிக்காக விளையாடிய ஒரு வீரராக தனது கிரிக்கெட் கேரியரை முடித்துக்கொண்ட தினேஷ் கார்த்திக், அதே அணியின் ஆலோசகராகவும், பேட்டிங் பயிற்சியாளராகவும் களமிறங்கினார். 2025 ஏலத்தில் யாரை எடுக்கலாம்? என்ன ஆர்டரில் எடுக்கலாம்? பலவீனத்தை சரி செய்வது எப்படி? பந்துவீச்சாளர்களாக அணியில் யார்? யாரை கொண்டு வர வேண்டும் என்பதில் தெளிவாக இருந்தார். ஆர்சிபி அணியின் கேப்டனாக ரஜத் படிதாரை நியமிப்பதிலும் முக்கிய பங்கு வகித்தார்.

தினேஷ் கார்த்திக் ஒரு பேட்டிங் பயிற்சியாளராக படிக்கல், படிதார், ஜிதேஷ் சர்மா ஆகியோரின் பேட்டிங் திறனை நன்றாகவே பட்டை தீட்டியுள்ளார். மேலும், மிடில் ஆர்டரையும் முறையாக வலுப்படுத்தியுள்ளார். வீரர்களின் மனநிலையிலும் மிகுந்த கவனமாக செயல்பட்டார்.

ரஜத் படிதார்:

ஆர்சிபி ரசிகர்களுக்கு மிகப்பெரிய மகிழ்ச்சியை அளித்துள்ளவர் ரஜத் படிதார். கும்ப்ளே, ராகுல் டிராவிட், வெட்டோரி, கோலி, டுப்ளிசிஸ் என யாருமே செய்ய முடியாத சாதனையை ரஜத் படிதார் படைத்துள்ளார். இவர் கேப்டனாக பொறுப்பேற்றபோது அதிகளவில் இவரை விமர்சித்தனர். ஆனால், கடந்த முறை பட்டம் வென்று விமர்சனத்தை வாயடைக்க வைத்தார். இந்த முறையும் தனது பாணியில் ஐபிஎல் பட்டத்தை வென்று ரோகித் சர்மா, தோனி சாதனையை சமன் செய்துள்ளார்.

பிறந்தநாள் பரிசு:

ஆர்சிபி அணியை மொத்தமாக உருமாற்றிய தினேஷ் கார்த்திக் மற்றும் ரஜத் படிதார் இருவருக்கும் இன்று பிறந்தநாள். இவர்களின் பிறந்த நாள் பரிசாக ஐபிஎல் கோப்பை கிடைத்துள்ளது. ரஜத் படிதாருக்கு இன்று 33வது பிறந்தநாள் ஆகும். தினேஷ் கார்த்திக்கிற்கு இன்று 40வது பிறந்தநாள் ஆகும்.

ஐபிஎல் பட்டத்தை 2வது முறையாக பெற்றுத்தந்த இவர்கள் இருவருக்கும் ரசிகர்கள் வாழ்த்து தெரிவித்து வருகின்றனர்.

IPL 2026 RCB vs GT:- ஓ கேப்டன் மை கேப்டன்.. தோனி, ரோகித்தே செய்யாததை செய்த ரஜத் படிதார்!! வரலாறு நின்னு பேசும்!

சுகுமாறன் — Mon, 1 Jun 2026 06:43:27 +0530

ஐபிஎல் கிரிக்கெட் தொடரின் 19வது சீசன் நிறைவு பெற்றுள்ளது. நடப்பு சாம்பியன் என்ற அந்தஸ்துடன் இந்த தொடரில் கால்தடம் பதித்த ஆர்சிபி அணி இறுதிப்போட்டியில் குஜராத் அணியை வீழ்த்தி இரண்டாவது முறையாக சாம்பியன் பட்டத்தை கைப்பற்றியுள்ளது.

ஆர்சிபி சாம்பியன்:

2024ம் ஆண்டு வரை ஒரு முறை கூட ஐபிஎல் பட்டம் பெற்றிராத அணி என்று பலராலும் ஏளனம் செய்யப்பட்ட ஆர்சிபி அணி கடந்தாண்டு முதன்முறையாக கோப்பையை வென்றது. இந்தாண்டும் இரண்டாவது முறையாக தொடர்ந்து கோப்பையை வென்று புதிய வரலாறு படைத்துள்ளது.

தோனி, ரோகித் செய்யாததை செய்த ரஜத் படிதார்:

19 ஆண்டுகளாக நடக்கும் ஐபிஎல் வரலாற்றிலே அடுத்தடுத்து ஐபிஎல் சாம்பியன் பட்டத்தை இதற்கு முன்பு இரண்டே, இரண்டு அணிகள்தான் வென்றுள்ளன. 2010, 2011ம் ஆண்டுகளில் சென்னை சூப்பர் கிங்ஸ் அணியும், 2019, 2020ம் ஆண்டுகளில் மும்பை இந்தியன்ஸ் அணியும் பெற்றுள்ளன. தற்போது அந்த சாதனையை ஆர்சிபி சமன் செய்துள்ளது.

சென்னை அணிக்காக தோனியும், மும்பைக்காக ரோகித் சர்மாவும் அந்த வரலாறை படைத்துள்ளனர். ஆர்சிபி அணிக்காக ரஜத் படிதார் அந்த வரலாற்றைப் படைத்துள்ளார். இந்திய அணிக்கு கேப்டனாக இருந்து பல வரலாற்றைப் படைத்துள்ள தோனி மற்றும் ரோகித் சர்மாவுடன் இந்திய அணிக்காக ஆடும் வாய்ப்பை முறையாக பெறாத ரஜத் படிதார் செய்திருப்பது மிகப்பெரிய வரலாறு ஆகும். இதைவிட கேப்டனாக பொறுப்பேற்ற தனது முதல் 2 சீசன்களிலே ஐபிஎல் கோப்பையை வென்ற முதல் நபர் ரஜத் படிதார் மட்டுமே ஆவார். இந்த சாதனையை எந்தவொரு கேப்டனும் ஐபிஎல் தொடரில் படைத்ததே இல்லை.

ஆர்சிபி மட்டுமே:

மேலும், ஆர்சிபி அணியிடம் கோப்பையே இல்லை என்று ஏளனம் செய்த நிலையில், அடுத்தடுத்து ஐபிஎல் பட்டம் வென்ற மகளிர் அணி, அடுத்தடுத்து ஐபிஎல் பட்டம் வென்ற ஆண்கள் அணி ஆர்சிபி மட்டுமே என்ற சாதனையை படைத்துள்ளனர். ஆர்சிபி-யின் வெற்றியை அந்த அணியின் ரசிகர்கள் கொண்டாடி வருகின்றனர்.

பிறந்த நாள் பரிசு:

ஐபிஎல் தொடர்களிலே அதிக ரசிகர்கள் கொண்ட அணிகளில் முக்கியமானது ஆர்சிபி. இதனால், உலகெங்கும் உள்ள அந்த அணியின் ரசிகர்கள் இந்த வெற்றியை கொண்டாடி வருகின்றனர். மேலும், ஆர்சிபி கேப்டன் ரஜத் படிதாருக்கு இன்று பிறந்தநாள். இந்த பிறந்தநாளில் அவரது பிறந்த நாள் பரிசாக ஐபிஎல் கோப்பையை வென்றுள்ளார்.

குஜராத்தின் அகமதாபாத்தில் நேற்று நடந்த இறுதிப்போட்டியில் ஆர்சிபி அணி குஜராத்தை தனது பந்துவீச்சால் கட்டுப்படுத்தியது. புவனேஷ்வர், ரஷீக் சலார், ஹேசில்வுட், குருணல் பாண்ட்யா, ஜேக்கப் டஃபி சிறப்பாக வீசி 155 ரன்களுக்கு கட்டுப்படுத்தினர்.

சேஸ் மாஸ்டர் கோலி:

156 ரன்கள் என்ற இலக்குடன் களமிறங்கிய ஆர்சிபி அணிக்கு வெங்கடேஷ் அதிரடி தொடக்கம் தர, படிக்கல் மற்றும் குருணல் சொற்ப ரன்களில் அவுட்டானாலும், படிதார் மற்றும் டிம் டேவிட் ஒத்துழைப்பு அளித்தனர். இவர்களை மறுமுனையில் வைத்துக் கொண்டு சேஸ் மாஸ்டர் கோலி தனி ஆளாக ஆட்டத்தை சிக்ஸர் அடித்து முடித்துக் கொடுத்தார். இதன்மூலம் ஆர்சிபி அணி தனது நடப்பு சாம்பியன் என்ற பட்டத்தை தக்கவைத்துள்ளது.

IPL 2026 Champion: ஈ சாலா கப் மீண்டும் நமதே! ஐபிஎல் மகுடத்தை மீண்டும் சூடியது ஆர்சிபி! கோலியாண்டவர் ருத்ரதாண்டவம்!

சுகுமாறன் — Sun, 31 May 2026 23:35:28 +0530

IPL 2026 Champion: ஐபிஎல் கிரிக்கெட் தொடரின் இறுதிப்போட்டி இன்று அகமதாபாத்தில் நடந்தது. இந்த போட்டியில் குஜராத் டைட்டன்ஸ் - ஆர்சிபி அணிகள் தங்களது இரண்டாவது கோப்பையை கைப்பற்ற களமிறங்கினர்.

156 ரன்கள் டார்கெட்:

இந்த போட்டியில் டாஸ் வென்ற ஆர்சிபி கேப்டன் ரஜத் படிதார் குஜராத்தை பேட் செய்ய அழைத்தார். ஹேசில்வுட், புவனேஷ்வர், ரஷீ்க் சலார், குருணல் பாண்ட்யாவின் அபார பந்துவீச்சால் 155 ரன்கள் மட்டுமே எடுத்தனர். இதையடுத்து, 156 ரன்கள் என்ற இலக்குடன் ஆர்சிபி களமிறங்கியது.

காயத்துடன் அதிரடி காட்டிய வெங்கடேஷ்:

ஆர்சிபி அணிக்காக விராட் கோலி - வெங்கடேஷ் ஐயர் ஆட்டத்தை தொடங்கினர். இருவரும் மிகவும் அபாரமாக ஆடினர். முகமது சிராஜுன் பந்துவீச்சால் காலில் ஏற்பட்ட காயத்துடன் ஆடிய வெங்கடேஷ் ஐயர் அதிரடியாகவே ஆடினார். அவர் பவுண்டரியும், சிக்ஸரும் விளாச மறுமுனையில் விராட் கோலியும் அதிரடி காட்டினார். அவர் ரபாடா வீசிய பவுண்டரிகளும், சிக்ஸரும் விளாசினார்.

அபாரமாக ஆடிய வெங்கடேஷ் ஐயர் முகமது சிராஜ் பந்தில் அவுட்டானார். அவர் காயத்துடன் ஆடி 16 பந்துகளில் 4 பவுண்டரி 2 சிக்ஸருடன் 32 ரன்கள் விளாசி அவுட்டானார். அவர் ஆட்டமிழந்த பிறகு களமிறங்கிய தேவ்தத் படிக்கல் ரபாடா பந்தில் 1 ரன்னில் அவுட்டானார். ஆனாலும், ரன் வேகம் குறையாமலே இருந்ததால் ஆட்டம் ஆர்சிபி-யின் கட்டுக்குள்ளே இருந்தது.

அச்சுறுத்திய ரஷீத்:

அடுத்து விராட் கோலி - கேப்டன் ரஜத் படிதார் ஜோடி சேர்ந்தனர். இந்த ஜோடி பதட்டமின்றி ஆடியது. எஞ்சிய பந்துகளை காட்டிலும் தேவைப்படும் ரன்கள் குறைவாக இருக்கும் வகையிலே இந்த ஜோடி பார்த்துக் கொண்டது. ரஷீத்கான் வீசிய ஓவரில் கேப்டன் ரஜத் படிதார் அவுட்டானார். அவர் 13 பந்துகளில் 1 பவுண்டரி 1 சிக்ஸருடன் 15 ரன்களில் அவுட்டானார். அப்போது, குருணல் பாண்ட்யா - விராட் கோலியுடன் ஜோடி சேர்ந்தார். அதே ஓவரில் குருணல் பாண்ட்யாவும் 1 ரன்னில் அவுட்டானார். இதனால், ஆட்டத்தில் விறுவிறுப்பு ஏற்பட்டது.

கோலி அரைசதம்:

இதன்பின்னர், விராட் கோலியுடன் டிம் டேவிட் ஜோடி சேர்ந்தனர். நெருக்கடியான சூழலில் இணைந்த இந்த ஜோடி மிகவும் நிதானமாக ஆடியது. ரஷீத்கான் அடுத்தடுத்து 2 விக்கெட்டுகள் எடுத்ததால் அவருக்கே கேப்டன் கில் வாய்ப்பு கொடுத்தார். இதனால், அவரது பந்தை நிதானமாகவே இவர்கள் ஆடினார்கள். ஏதுவான பந்துகளை மட்டும் பவுண்டரிக்கு விளாசினார்.

மறுமுனையில் பொறுப்புடன் ஆடிய விராட் கோலி 25 பந்துகளில் அரைசதம் விளாசினார். அவருக்கு ஒத்துழைப்பு அளித்த டிம் டேவிட் சிக்ஸர், பவுண்டரி விளாசி அழுத்தம் இல்லாமல் அணியை கொண்டு சென்றார். சிறப்பாக ஆடிக்கொண்டிருந்த டிம் டேவிட் 17 பந்துகளில் 3 பவுண்டரி 1 சிக்ஸருடன் 24 ரன்களுடன் அவுட்டானார். வெற்றிக்கு கடைசி 30 பந்துகளில் 17 ரன்கள் மட்டுமே ஆபர்சிபிக்கு தேவைப்பட்டது.

சேஸ் மாஸ்டர்:

விராட் கோலியுடன் ஜிதேஷ் சர்மா ஜோடி சேர்ந்தார். விராட் கோலி தனது அனுபவத்தால் பதட்டமே இல்லாமல் ஆடி ஏதுவான பந்துகளை பவுண்டரிக்கு அனுப்பினார். இதனால், ஆர்சிபி பதட்டம் இல்லாமல் ஆடியது. அவருக்கு ஜிதேஷ் சர்மாவும் ஒத்துழைப்பு அளித்தார். சிறப்பாக ஆடிக்கொண்டிருந்த விராட் கோலிக்கு வெற்றிக்கு 11 ரன்கள் தேவைப்பட்ட நிலையில், சுப்மன்கில் அவருக்கு கேட்ச் பிடித்தார். ஆனால், டிவி ரீப்ளே-யில் சுப்மன்கில் பிடித்த பந்து தரையில் பட்டது தெரியவந்தது. இதனால், அது நாட் அவுட் என்று அறிவிக்கப்பட்டது.

விராட் கோலி தான் அவுட் இல்லை என்பதில் மிக உறுதியாக இருந்தார். இதனால், ரீப்ளே-யில் கேட்டு நாட் அவுட் என்று அறிவிக்கப்பட்டது. கடைசி 4 ஓவர்களில் 11 ரன்கள் தேவைப்பட்டது.

ஆர்சிபி மீண்டும் சாம்பியன்:

விராட் கோலிக்கு காலில் ஏற்பட்ட காயத்துடன் அணிக்காக உறுதியாக ஆடினார். அவருக்கு ஜிதேஷ் சர்மாவும் ஒத்துழைப்பு அளித்தார். விராட் கோலி பவுண்டரி விளாசி ஸ்கோரை சமன் செய்தார். கடைசியில் 18வது ஓவரின் முடிவில் விராட் கோலி சிக்ஸர் அடித்து ஆட்டத்தை வெற்றிகரமாக முடித்துக் கொடுத்தார்.

இதன்மூலம் ஆர்சிபி அணி இரண்டாவது முறையாகவும், தொடர்ச்சியாக 2வது முறையாகவும் ஐபிஎல் கோப்பையை வென்று அசத்தியது. 5 விக்கெட் வித்தியாசத்தில் ஆர்சிபி அணி வெற்றி பெற்று சாம்பியன் பட்டத்தை தக்கவைத்தது. விராட் கோலி கடைசி வரை அவுட்டாகாமல் 42 பந்துகளில் 9 பவுண்டரி 3 சிக்ஸருடன் 75 ரன்கள் விளாசி அவுட்டாகாமல் இருந்தார். ஜிதேஷ் சர்மா 14 பந்துகளில் 1 பவுண்டரியுடன் 11 ரன்கள் எடுத்து ஆட்டமிழக்காமல் இருந்தார்.

இந்த வெற்றியை ஆர்சிபி ரசிகர்கள் பட்டாசுகள் வெடித்தும், இனிப்புகள் வழங்கியும் கொண்டாடி வருகின்றனர்.

IPL Final 2026 RCB vs GT: 156 ரன்கள் டார்கெட்! ஐபிஎல் கோப்பையை மீண்டும் வெல்லுமா ஆர்சிபி? மிரட்டல் பவுலிங் போட்ட பெங்களூர் பாய்ஸ்!

சுகுமாறன் — Sun, 31 May 2026 21:25:24 +0530

ஐபிஎல் தொடரின் இறுதிப்போட்டி அகமதாபாத்தில் நடந்து வருகிறது. இந்த போட்டியில் குஜராத் டைட்டன்ஸ் அணியுடன் ஆர்சிபி அணி மோதி வருகிறது. இந்த போட்டியில் டாஸ் வென்ற ஆர்சிபி அணி முதலில் பந்துவீசுவதாக அறிவித்தது.

அடுத்தடுத்து அவுட்டான குஜராத் டாப்பர்ஸ்:

அகமதாபாத் மைதானம் சொந்த மைதானம் என்பதால் மிகுந்த உற்சாகத்துடன் கேப்டன் சுப்மன் கில் - சாய் சுதர்சன் களமிறங்கினர். ஆட்டத்தை தொடங்கிய சாய் சுதர்சன் ஜேக்கப் டஃபி ஓவரில் 2 பவுண்டரிகளை விளாசி முதல் ஓவரை அதிரடியாக தொடங்கினார்.

மறுமுனையில் கேப்டன் சுப்மன் கில் 2 பவுண்டரிகளை விளாசிய நிலையில், ஹேசில்வுட் பந்தில் ஆர்சிபி கேப்டன் ரஜத் படிதாரிடம் கேட்ச் கொடுத்து அவுட்டானார். அவர் 8 பந்துகளில் 2 பவுண்டரியுடன் 10 ரன்கள் எடுத்து அவுட்டானார். அவர் ஆட்டமிழந்த சில நிமிடங்களில் குஜராத்தின் முக்கிய வீரரான சாய் சுதர்சன் 12 பந்துகளில் 12 ரன்களில் புவனேஷ்வர் பந்தில் அவுட்டானார்.

குருணல் சாமர்த்தியம்:

பின்னர், அதிரடி பேட்ஸ்மேன் ஜோஸ் பட்லர் இளம் வீரர் நிஷாந்த் சிந்துவுடன் இணைந்தார். இருவரும் நிதானமாகவே ஆடினர். புவனேஷ்வர், ஹேசில்வுட், ரஷீக் சலார் சிறப்பாக பந்துவீசியதால் இவர்கள் ஓரிரு ரன்களாகவே எடுத்தனர். அதிரடிக்கு மாற முயன்ற நிஷாந்த் 3 பவுண்டரி விளாசிய நிலையில் 18 பந்துகளில் 20 ரன்கள் எடுத்து அவுட்டானார்.

பின்னர், வாஷிங்டன் சுந்தர் களமிறங்கினார். அடுத்தடுத்து 3 விக்கெட்டுகள் விழுந்ததால் இவர்கள் நிதானமாக ஆட வேண்டிய கட்டாயம் ஏற்பட்டது, குருணல் பாண்ட்யாவும் சுழலில் அச்சுறுத்த குஜராத் தடுமாறியது. ஜேக்கஃப் டஃபி பந்தில் வாஷிங்டன் சுந்தர் கொடுத்த கடினமான கேட்ச்சை ஜோர்டன் காக்ஸ் பிடித்தபோதும் அது தரையில் பட்டதால் நாட் அவுட் வழங்கப்பட்டது.

15வது ஓவரிலே 100 ரன்கள்:

இதனால், வாழ்வு பெற்ற வாஷிங்டன் சுந்தர் நிதானமாக ஆட பட்லர் அதிரடியாக ஆட முயற்சித்தார். ஆனால், அவரது முயற்சிக்கு குருணல் பாண்ட்யா முட்டுக்கட்டை போட்டார். அவர் சிக்ஸருக்கு அடிக்க இறங்கி வந்தபோது சாமர்த்தியாக பந்தை ஒயிட் போல வீசியதால் ஜிதேஷ் சர்மா ஸ்டம்பிங் செய்தார். மிக மிக முக்கியமான வீரரான பட்லர் 23 பந்துகளில் 1 பவுண்டரியுடன் 19 ரன்கள் எடுத்து அவுட்டாக 73 ரன்களுக்கு 4 விக்கெட்டுகளை குஜராத் இழந்தது.

பின்னர், ஆல் ரவுண்டர் அர்ஷத் கான் வாஷிங்டன் சுந்தருடன் இணைந்தார். அவர் அதிரடியாக ஆடினார். அவர் 2 சிக்ஸர்களை விளாசி குஜராத் அணிக்காக முதல் சிக்ஸர்களை விளாசிய நிலையில், அவரை ஹேசில்வுட் அவுட்டாக்கினார். அவர் 6 பந்துகளில் 2 பவுண்டரியுடன் 15 ரன்கள் எடுத்து அவுட்டானார். பின்னர், வாஷிங்டன் சுந்தர் - ராகுல் திவேதியா இணைந்தனர்.

அதிரடி காட்டிய வாஷிங்டன் சுந்தர்:

குஜராத் அணி 15வது ஓவரிலே 100 ரன்களை எட்டியது. அதிரடி காட்ட வேண்டிய சூழல் ஏற்பட்டதால் ராகுல் திவேதியா சிக்ஸர் அடிக்க முயற்சிக்க அதை படிதார் கேட்ச் பிடித்து அவுட்டாக்கினார். இதனால், ராகுல் திவேதியா 7 ரன்களில் அவுட்டானார். வாஷிங்டன் சுந்தர் ஒரு புறம் ஓரிரு ரன்களாக எடுத்தார். அவருடன் இணைந்த ஹோல்டரும் விக்கெட் விழுவதை தடுப்பதற்காக ஓரிரு ரன்களாகவே எடுத்தார்.

அதிரடியாக ஆட வேண்டிய கட்டாயம் ஏற்பட்ட காரணத்தால் வாஷிங்டன் சுந்தர் அதிரடிக்கு மாறினார். அவர் ஹேசில்வுட் ஓவரில் 2 பவுண்டரிகளை விளாசினார். மறுமுனையில் வாஷிங்டனுக்கு ஒத்துழைப்பு அளிக்க அதிரடி காட்ட முயற்சித்த ஹோல்டர் புவனேஸ்வர் பந்தில் ஹேசில்வுட்டிடம் கேட்ச் கொடுத்து அவுட்டானார்.

வாஷிங்டன் அரைசதம்:

8வது விக்கெட்டிற்கு உள்ளே வந்த ரஷீத்கான் சிக்ஸர் விளாச கடைசி ஓவரில் குஜராத் 150 ரன்களை எட்டியது. ஆனால், அடுத்த பந்திலே அவர் அவுட்டாக குஜராத் அணிக்காக தனி ஆளாக போராடிய வாஷிங்டன் சுந்தர் 37 பந்துகளில் 50 ரன்களை விளாசினார்.

156 ரன்கள் எடுத்தால் ஐபிஎல் மகுடம்:

இறுதியில் குஜராத் அணி 20 ஓவர்களில் 8 விக்கெட் இழப்பி்ற்கு 155 ரன்களை எட்டியது. வாஷிங்டன் சுந்தர் கடைசி வரை அவுட்டாகாமல் 37 பந்துகளில் 5 பவுண்டரியுடன் 50 ரன்கள் எடுத்திருந்தார், ரபாடா 3 பந்துகளில் 3 ரன்கள் எடுத்திருந்தார்.

ஆர்சிபி அணிக்காக இளம் வீரர் ரஷீக் சலார் அபாரமாக பந்துவீசி 3 விக்கெட்டுகளை வீழ்த்தினார். அவர் 4 ஓவர்களில் 27 ரன்கள் மட்டுமே விட்டுக்கொடுத்தார், ஹேசில்வுட், புவனேஷ்வர் தலா 2 விக்கெட்டுகளையும், குருணல் பாண்ட்யா 4 ஓவர்களில் 23 ரன்கள் மட்டுமே விட்டுக்கொடுத்து 1 விக்கெட்டையும் கைப்பற்றினர், ஜேக்கப் டஃபி 4 ஓவர்களில் 38 ரன்கள் அளித்தார். 156 ரன்கள் எடுத்தால் இரண்டாவது முறையாக ஐபிஎல் கோப்பையை ஆர்சிபி அணி வெல்லும்.

Virat Kohli VS Siraj: அண்ணன் கோலியும்.. தம்பி சிராஜும்..! கோப்பைக்காக நேருக்கு நேர் மோதல்!

சுகுமாறன் — Sun, 31 May 2026 17:57:38 +0530

ஐபிஎல் தொடரின் இறுதிப்போட்டி இன்னும் சற்று நேரத்தில் நடைபெற உள்ளது. இந்த போட்டியில் ஆர்சிபி - குஜராத் அணிகள் மோதுகின்றனர். நடப்பு சாம்பியன் என்ற பட்டத்தை மீண்டும் தக்க வைக்கும் நோக்கத்தில் ஆர்சிபி அணியும், 2வது முறையாக பட்டம் பெறும் நோக்கத்துடன் குஜராத் அணியும் களமிறங்குகின்றனர்.

விராட் கோலி - முகமது சிராஜ்:

இந்த போட்டியைப் பொறுத்தமட்டில் பல்வேறு உணர்வுப்பூர்மான போட்டியாகவே அமைய உள்ளது. அந்த வகையில் இந்த போட்டியில் மிகவும் உணர்வுப்பூர்வமான தருணமாக விராட் கோலி - முகமது சிராஜ் ஆட்டம் இருக்கும் என்று எதிர்பார்க்கலாம்.

முகமது சிராஜின் கிரிக்கெட் வாழ்க்கை இன்று உயர்ந்திருப்பதற்கு விராட் கோலி ஒரு முக்கிய காரணம் ஆவார். சன்ரைசர்ஸ் அணிக்காக ஐபிஎல் கிரிக்கெட்டில் அறிமுகமான முகமது சிராஜ் பின்னர் ஆர்சிபி அணிக்காக வாங்கப்பட்டு தவிர்க்கவே முடியாத வீரராக உலா வந்தார். வெற்றி, தோல்விக்கு அப்பாற்பட்டு ஆர்சிபி-யின் பந்துவீச்சு அடையாளமாக திகழ்ந்தவர் முகமது சிராஜ்.

அண்ணன் - தம்பி:

குறிப்பாக, விராட் கோலியை தனது சொந்த சகோதரன் போலவே சிராஜ் தற்போது வரை கருதி வருகிறார். இந்திய அணியிலும் விராட் கோலி கேப்டன்சியின் கீழ் அறிமுகமான சிராஜ் நட்சத்திர பந்துவீச்சாளராக ஜொலித்து வருகிறார். இந்த சூழலில், கடந்தாண்டு நடந்த மெகா ஏலத்தில் ஆர்சிபி அணியில் இருந்து விடுவிக்கப்பட்ட அவரை குஜராத் வாங்கியது.

கடந்தாண்டு நடந்த குஜராத் - ஆர்சிபி போட்டியில் விராட் கோலிக்கு எதிராக ஐபிஎல் போட்டியில் பந்துவீச வந்த முகமது சிராஜ் ஒரு நிமிடம் தடுமாறியது அனைவரையும் நெகிழ வைத்தது. இன்று நடக்கும் இறுதிப்போட்டியில் கோப்பைக்காக இவர்கள் இருவரும் எதிரெதிர் துருவங்களாக களமிறங்க உள்ளது எப்படி இருக்கப்போகிறது? என்ற எதிர்பார்ப்பை உருவாக்கியுள்ளது.

மிகுந்த எதிர்பார்ப்பு:

குஜராத்தின் பிரதான பந்துவீச்சாளராக முகமது சிராஜும், ஆர்சிபியின் ஆணி வேராக விராட் கோலியும் களத்தில் எப்படி விளையாடப்போகிறார்கள்? என்ற எதிர்பார்ப்பு மிகவும் உணர்வுப்பூர்வமாகவும் சுவாரஸ்யமாக இருக்கும் என்றே கூறலாம்.

இந்த போட்டியைப் பொறுத்தமட்டில் இரு அணிகளும் பலமான அணியாகவே திகழ்கிறது. குஜராத் அணிக்கு இது சொந்த மைதானம் என்றாலும் ஆர்சிபி வீரர்களுக்கும் இங்கு ஏராளமான போட்டிகளில் விளையாடிய அனுபவம் உள்ளது.

குஜராத் அணியில் பேட்டிங்கில் சுப்மன்கில், சாய் சுதர்சன், பட்லர், ஹோல்டர், ராகுல் திவேதியா, ரஷீத், வாஷிங்டன் உள்ளனர். குறிப்பாக முதல் 3 பேரை நம்பியே அந்த அணி உள்ளது என்பது உண்மை. ஆர்சிபி அணியில் வெங்கடேஷ், விராட் கோலி, படிக்கல், ரஜத் படிதார், ஜிதேஷ் சர்மா, குருணல் பாண்ட்யா, டிம் டேவிட், ஷெப்பர்ட் உள்ளனர்.

பந்துவீச்சிலும் குஜராத்தில் சிராஜ், ரபாடா, ஹோல்டர், ரஷீத்கான், வாஷிங்டன் சுந்தர் உள்ளனர். ஆர்சிபியில் ஹேசில்வுட், புவனேஷ்வர், ரஷீக்சலார், டஃபி, சுயாஷ்சர்மா, குருணல் பாண்ட்யா, ஷெப்பர்ட் உள்ளனர் என்பதும் குறிப்பிடத்தக்கது.

IPL 2026 Final RCB vs GT: ஐபிஎல் பட்டம் யாருக்கு? கோப்பையை எடுத்து வைக்கச் சொல்லும் ஆர்சிபி - குஜராத்! இன்னும் சற்று நேரத்தில் குஸ்தி!

சுகுமாறன் — Sun, 31 May 2026 16:22:08 +0530

ஐபிஎல் கிரிக்கெட் தொடரின் 19வது சீசன் இன்றுடன் முடிவுக்கு வருகிறது. மொத்தம் 10 அணிகள் பங்கேற்ற இந்த போட்டியில் ப்ளே ஆஃப் சுற்றில் குவாலிஃபயர் 1 போட்டியில் வெற்றி பெற்ற ஆர்சிபி அணியும், குவாலிஃபயர் 2 போட்டியில் வெற்றி பெற்ற குஜராத் அணியும் மோதுகின்றனர்.

இன்று இறுதிப்போட்டி:

இந்த தொடர் முழுவதும் இரு அணிகளும் சிறப்பான ஆட்டத்தையே வெளிப்படுத்தி வந்தனர். இன்றைய போட்டியில் சிறப்பாக ஆடும் அணி்யே 2026ம் ஆண்டின் புதிய சாம்பியன் ஆகும். அகமதாபாத் மைதானத்தைப் பொறுத்தமட்டில் குஜராத் அணிக்கு அது சொந்த மைதானம் என்பது சிறப்பம்சாகும். பெங்களூர் அணிக்கு நடப்பு சாம்பியன் என்ற அந்தஸ்துடன் களமிறங்குகிறது.

இந்த மைதானத்தைப் பொறுத்தமட்டில் பேட்டிங் மற்றும் பந்துவீச்சு என இரண்டிற்கும் ஏற்றதாக அமையும் என்று கருதப்படுகிறது. இந்த மைதானத்தில் இதுவரை 51 ஐபிஎல் போட்டிகள் நடத்தப்பட்டுள்ளது. இதில் முதலில் பேட் செய்த அணி 26 போட்டியிலும், 2வது பேட் செய்த அணி 25 போட்டிகளிலும் வெற்றி பெற்றுள்ளது. இதனால், இன்றைய போட்டியில் முதல் பேட்டிங் மற்றும் 2வது பேட்டிங் என இருவருக்கும் வாய்ப்புகள் பிரகாசமாக உள்ளது.

பேட்டிங் தூண்கள்:

இந்த மைதானத்தில் அதிகபட்சமாக பஞ்சாப் அணி 243 ரன்கள் வரை விளாசியுள்ளனர். அதிகபட்சமாக குஜராத் 204 ரன்களை எட்டிப்பிடித்துள்ளது. இதனால், இன்றைய போட்டியில் ரன்மழை இருக்கும் என்று எதிர்பார்க்கலாம். ஆர்சிபி அணியைப் பொறுத்தமட்டில் வெங்கடேஷ் ஐயர், விராட் கோலி, படிக்கல், ரஜத் படிதார், டிம் டேவிட், க்ருணல் பாண்ட்யா, ஜிதேஷ் சர்மா, ரொமாரியோ ஷெப்பர்ட் ஆகியோர் உள்ளனர்.

குஜராத் அணியிலும் சுப்மன்கில், சாய் சுதர்சன், பட்லர் அந்த அணிக்கு தூண்களாக உள்ளனர். மிடில் ஆர்டரில் வாஷிங்டன் சுந்தர், நிஷாந்த், ஹோல்டர் உள்ளனர். இம்பேக்ட் வீரராக கடந்த போட்டிகளில் அசத்திய ராகுல் திவேதியாக சிறப்பான ஆட்டத்தை வெளிப்படுத்த ஆர்வம் காட்டுவார். இரு அணியிலும் பேட்டிங் பட்டாளம் வலுவாக இருப்பதால் ரன்மழைக்கு வாய்ப்பு பிரகாசமாக உள்ளது.

ஓங்குமா பந்துவீச்சாளர்கள் கை?

ஐபிஎல் போட்டிகளைப் பொறுத்தமட்டில் பந்துவீச்சாளர்களின் கையிலே ஒரு அணியின் வெற்றி உள்ளது. சமீபகாலமாக, பேட்ஸ்மேன்களுக்கு சாதகமாகவே மைதானம் வடிவமைக்கப்படும் சூழலில், பந்துவீச்சாளர்கள் பந்துவீசுவது சவாலாக மாறியுள்ளது.

ஆர்சிபி அணிக்கு பந்துவீச்சு தூணாக புவனேஷ்வர்குமார், ஹேசில்வுட், ரஷீக் சலார், ஜேக்கப் டஃபி உள்ளனர். இவர்களது வேகத்தில் துல்லியமும், லைன் மற்றும் லென்த் இணைந்தால் குஜராத்திற்கு சவாலாக மாறும். சுழலில் க்ருணல் பாண்ட்யா, சுயாஷ் சர்மா உள்ளனர். பகுதிநேர பந்துவீச்சாளராக ஷெப்பர்டும் முக்கிய பங்காற்றுகிறார்.

குஜராத் அணிக்கு பந்துவீச்சில் முன்னாள் ஆர்சிபி வீரர் முகமது சிராஜ் பலமாக உள்ளார். அவருடன் ரபாடா அச்சுறுத்தலாக உள்ளார். இவர்களுடன் ஹோல்டர் உள்ளார். இவர்கள் வேகத்தில் அசத்தினால் குஜராத் வலுபெறும். சுழலில் ரஷீத்கான், வாஷிங்டன் சுந்தர் உள்ளனர்.

இந்த மைதானத்தில் சன்ரைசர்ஸ் ஹைதரபாத் அணி இந்தாண்டு 86 ரன்களுக்கு சுருண்டது. இதனால், எந்த அணியின் பந்துவீச்சாளர்களின் கை ஓங்குகிறதோ அவர்களுக்கு வெற்றி வாய்ப்பு மிக பிரகாசம் ஆகும். இதுபோன்ற இறுதிப்போட்டியில் ஒரு வித அழுத்தம் வீரர்களுக்கும் இருக்கும்.

இன்னும் சற்று நேரத்தில்:

இரு அணியிலும் அனுபவம் மற்றும் திறமையான வீரர்கள் இருப்பதால் அவர்கள் அதை திறமையாக கையாள்வார்கள் என்றும் கருதப்படுகிறது. இதனால், இன்றைய போட்டி ரசிகர்களுக்கு ஒரு விருந்தாக இருக்கும் என்பதில் சந்தேகம் இல்லை. இந்த போட்டி இன்று இரவு 7.30 மணிக்கு தொடங்குகிறது. ஸ்டார் ஸ்போர்ட்ஸ் தொலைக்காட்சியில் இந்த போட்டியை காணலாம்.

IPL 2026: இன்று ஐபிஎல் ஃபைனல்: ஆர்சிபி vs குஜராத் மோதலுக்கு நடுவே புகுந்த மழை... போட்டி ரத்தானால் கோப்பை யாருக்கு?

ஜேம்ஸ் — Sun, 31 May 2026 15:28:17 +0530

ஐபிஎல் இறுதிப்போட்டி நடைப்பெறும் அகமதாபாத் மைதானத்தில் இன்று மஞ்சள் எச்சரிக்கை விடுக்கப்பட்டுள்ளதால் திட்டமிட்டப்படி ஆர்சிபி மற்றும் குஜராத் டைடன்ஸ் அணிகளுக்கு இடையேயான மோதல் நடைப்பெறுமா என்கிற கேள்வி எழுந்துள்ளது

ஐபிஎல் 2026:

ஐபிஎல் தொடரின் ராயல் சேலஞ்சர்ஸ் பெங்களூரு மற்றும் குஜராத் டைட்டன்ஸ் அணிகள் மோதுகின்றன. அகமதாபாத்தில் உள்ள நரேந்திர மோடி கிரிக்கெட் மைதானத்தில் இந்திய நேரப்படி இரவு 7:30 மணிக்கு இறுதிப் போட்டி தொடங்கும். இறுதிப் போட்டி முதலில் ஆர்சிபியின் சொந்த மைதானமான எம்.சின்னசாமி மைதானத்தில் நடைபெற திட்டமிடப்பட்டிருந்தது. இருப்பினும், விஐபி பாஸ்களுக்கான கோரிக்கை தொடர்பாக எழுந்த சர்ச்சையைத் தொடர்ந்து, பிசிசிஐ போட்டி நடைபெறும் இடத்தை ஜிடி-யின் சொந்த மைதானமான நரேந்திர மோடி மைதானத்திற்கு மாற்றியது. இந்த சீசனில் அகமதாபாத்தில் ஏழு போட்டிகள் நடைபெற்றுள்ளன. அங்கு நடைபெற்ற முதல் மூன்று போட்டிகளில் குஜராத் அணியால் வெற்றி பெற முடியவில்லை, ஆனால் அதன் பிறகு நடைபெற்ற நான்கு போட்டிகளிலும் வெற்றி பெற்றுள்ளது. இதுவரை நடைபெற்ற 14 இன்னிங்ஸ்களில் மூன்றில் மட்டுமே ஸ்கோர் 200-ஐத் தாண்டியுள்ளது.

வானிலை எப்படி?

அகமதாபாத்தின் பல பகுதிகளில் மழைக்கான மஞ்சள் எச்சரிக்கை விடுக்கப்பட்டுள்ளது. போட்டியின் போது மழை பலத்த காற்றும் வீசும் என எதிர்பார்க்கப்படுகிறது. இங்கு கடந்த சில நாட்களாகவே வெப்பம் அதிகமாக இருந்து வருகிறது, சனிக்கிழமையன்று வெப்பநிலை 43 டிகிரி செல்சியஸைத் தாண்டியது. இருப்பினும், இன்று, ஞாயிறு மற்றும் திங்கட்கிழமைகளில் மழை பெய்யும் என எதிர்பார்க்கப்படுகிறது.

இறுதிப் போட்டி ரத்து செய்யப்பட்டால் யாருக்கு கோப்பை

ராயல் சேலஞ்சர்ஸ் பெங்களூரு மற்றும் குஜராத் டைட்டன்ஸ் அணிகளுக்கு இடையேயான இறுதிப் போட்டிக்கான மாற்று நாள் ஜூன் 1 ஆம் தேதி என நிர்ணயிக்கப்பட்டுள்ளது. இருப்பினும், திங்கட்கிழமை அகமதாபாத்தில் மழை பெய்ய அதிக வாய்ப்புள்ளது. ஒரு போட்டியின் முடிவைத் தீர்மானிக்க குறைந்தபட்சம் 5 ஓவர்கள் ஆட்டம் தேவை. மழையின் காரணமாக ஒரு போட்டி கைவிடப்படுவது சாத்தியமில்லை என்றாலும், அவ்வாறு நடந்தால், புள்ளிப் பட்டியலில் முன்னணியில் இருக்கும் அணி சாம்பியனாக அறிவிக்கப்படும். இந்த நிலையில், ஆர்சிபி அணி வெற்றியாளராக அறிவிக்கப்படும்.

IPL 2026 Final: 2வது ஐபிஎல் பட்டத்தை வெல்லப்போவது யார்? குஜராத்தை வீழ்த்தி CSK, மும்பை சாதனையை ஈடு செய்யுமா RCB?

குலசேகரன் முனிரத்தினம் — Sun, 31 May 2026 08:26:57 +0530

IPL 2026 Final RCB Vs GT: ஐபிஎல் வரலாற்றில் ராயல் சேலஞ்சர்ஸ் பெங்களூரு மற்றும் குஜராத் டைட்டன்ஸ் ஆகிய இரு அணிகளுமே தலா ஒரு முறை மட்டுமே சாம்பியன் பட்டம் வென்றுள்ளன.

2வது IPL பட்டத்தை வெல்லப்போவது யார்?

நடப்பாண்டிற்கான ஐபிஎல் தொடர் அதன் இறுதிநாளை எட்டியுள்ளது. அதன்படி இன்று நடைபெற உள்ள இறுதிப்போட்டியில் நடப்பு சாம்பியனான ராயல் சேலஞ்சர்ஸ் பெங்களூரு மற்றும் முன்னாள் சாம்பியனான குஜராத் டைட்டன்ஸ் ஆகிய அணிகள் மோதியுள்ளன. கடந்த 19 ஆண்டுகளாக ஐபிஎல் போட்டிகளில் விளையாடி வரும் பெங்களூரு அணிக்கு இது ஐந்தாவது இறுதிப்போட்டியாகும். அதேநேரம், கடந்த ஐந்து ஆண்டுகளாக மட்டுமே விளையாடி வரும் குஜராத் அணிக்கு இது மூன்றாவது இறுதிப்போட்டியாகும். ஆனாலும், இரு அணிகளும் இதுவரை தலா ஒருமுறை மட்டுமே சாம்பியன் பட்டத்தை வென்றுள்ளன. அதனால், இன்றைய போட்டியில் வென்று இரண்டாவது முறையாக சாம்பியன் பட்டத்தை வெல்லப்போவது யார்? என எதிர்பார்ப்பு எகிறியுள்ளது.

RCB Vs GT பலப்பரீட்சை

பெங்களூரு மற்றும் குஜராத் அணி மோத உள்ள இறுதிப்போட்டி, அகமதாபாத்தில் உள்ள நரேந்திர மோடி மைதானத்தில் இரவு 7.30 மணிக்கு தொடங்க உள்ளது. இதன் நேரலையை தொலைக்காட்சியில் ஸ்டார் ஸ்போர்ட்ஸ் அலைவரிசையிலும், ஒடிடியில் ஜியோ ஹாட்ஸ்டார் செயலியிலும் ரசிகர்கள் கண்டுகளிக்கலாம். லீக் சுற்றின் முடிவில் புள்ளிப்பட்டியலில் முதல் இரண்டு இடங்களை பிடித்த அணிகளே, ப்ளே-ஆஃப் சுற்றின் முடிவில் இறுதிப்போட்டிக்கும் முன்னேறியுள்ளன என்பது குறிப்பிடத்தக்கது.

CSK, மும்பை சாதனையை ஈடு செய்யுமா RCB?

ஐபிஎல் வரலாற்றில் தலா ஐந்து முறை சாம்பியன் பட்டம் வென்ற மும்பை மற்றும் சென்னை அணிகள் மட்டுமே, அடுத்தடுத்து இரண்டு முறை சாம்பியன் பட்டம் வென்றுள்ளன. அதன்படி, ரோகித் சர்மா தலைமையிலான மும்பை அணி 2019ம் ஆண்டிலும், 2020ம் ஆண்டிலும் தொடர்ந்து சாம்பியன் பட்டத்தை வென்றது. முன்னதாக தோனி தலைமையிலான சென்னை அணி 2010 மற்றும் 2011 ஆகிய ஆண்டுகளில் அடுத்தடுத்து சாம்பியன் பட்டம் வென்றது. 2022ம் ஆண்டு ஹர்திக் பாண்ட்யா தலைமையில் சாம்பியன் பட்டம் வென்ற அணி, 2023ம் ஆண்டிலும் இறுதிப்போட்டிக்கு முன்னேறினாலும் வெற்றி வாய்ப்பை பாற்கொடுத்தது. இந்நிலையில் தான் கடந்த 2025ம் ஆண்டு ரஜத் படிதார் தலைமயிலான பெங்களூரு அணி தனது முதல் சாம்பியன் பட்டம் வென்ற நிலையில், தற்போது மீண்டும் இறுதிப்போட்டிக்கு முன்னேறியுள்ளது. இதன் மூலம் தோனி மற்றும் ரோகித்தின் சாதனையை ரஜத் படிதார் ஈடுசெய்வாரா? என ரசிகர்கள் எதிர்பார்க்கின்றனர்.

RCB Vs GT - நேருக்கு நேர்

ஐபிஎல் வரலாற்றில் இரு அணிகளும் இதுவரை 9 முறை நேருக்கு நேர் மோதியுள்ளன. அதில் பெங்களூரு அணி 5 முறையும், குஜராத் அணி 4 முறையும் வெற்றி பெற்றுள்ளது. கடைசியாக இரு அணிகளும் மோதிய குவாலிஃபயர் போட்டியில் குஜராத் அணியை பெங்களூரு பந்தாடியது. குறிப்பாக கேப்டன் ரஜத் படிதார் 33 பந்துகளில் 93 ரன்களை விளாசியது குறிப்பிடத்தக்கது.

இதையும் படியுங்கள்: CM Vijay Trisha: சிஎம் விஜயுடன் த்ரிஷா..! துக்க வீட்டிலும் அரசியலா? இணையத்தில் மல்லுக்கட்டும் திமுக - தவெக

அகமதாபாத் மைதானம் எப்படி?

அகமதாபாத் மைதானம் வழக்கம்போல் பேட்டிங்கிற்கு சாதகமாக இருக்கும் என எதிர்பார்க்கப்படுகிறது. இங்கு சேஸ் செய்யும் அணிக்கே வெற்றி வாய்ப்பு பிரகாசமாக உள்ளது. கடைசியாக நடைபெற்ற 6 ஐபிஎல் இறுதிப்போட்டிகளில் நான்கில் சேஸ் செய்த அணியே வெற்றி பெற்றது குறிப்பிடத்தக்கது. அதன் காரணமாக இன்று டாஸ் வெல்லும் அணியும் சேஸ் செய்யவே அதிக வாய்ப்புள்ளது. போட்டியின் போது மழைக்கு வாய்ப்பு ஏதும் இல்லை எனவும் வானிலை மையம் தெரிவித்துள்ளது.

RCB Vs GT -உத்தேச ப்ளேயிங் லெவன்

பெங்களூரு: விராட் கோலி, வெங்கடேஷ் ஐயர்/பில் சால்ட், தேவ்தத் படிக்கல், ரஜத் படிதார் (கேப்டன்), க்ருனால் பாண்டியா, டிம் டேவிட், ஜிதேஷ் ஷர்மா (வி.கே.), ரொமாரியோ ஷெப்பர்ட், சலீம் குமார், புவனேஷ்வர், புவனேஷ்வர், ஜேக்கப் டஃபி/சுயாஷ் சர்மா

குஜராத்: சுப்மன் கில் (கேப்டன்), சாய் சுதர்சன், ஜோஸ் பட்லர், வாஷிங்டன் சுந்தர், நிஷாந்த் சிந்து, ஜேசன் ஹோல்டர், ராகுல் திவேதியா, ரஷித் கான், சாய் கிஷோர், பிரசித் கிருஷ்ணா, ககிசோ ரபாடா, முகமது சிராஜ்

திட்டிய ரியான் பராக்... கண்ணீர் விட்டு அழுத சூர்யவன்ஷி; ரசிகர்கள் கொதிப்பு -நடந்தது என்ன?

ராஜேஷ். எஸ் — Sat, 30 May 2026 16:53:14 +0530

2026 ஐபிஎல் தொடரில் இரண்டாவது குவாலிஃபையர் ஆட்டத்தில் ராஜஸ்தான் ராயல்ஸ் - குஜராத் டைட்டன்ஸ் அணிகளுக்கு இடையே முல்லன்பூரில் நடந்த போட்டியில் குஜராத் வெற்றி பெற்று இறுதிப் போட்டிக்குச் சென்றது. இதனை குஜராத் வீரர்கள் கொண்டாட, ஒரு பக்கம் ராஜஸ்தான் கேப்டன் ரியான் பராக், வைபவ் சூர்யவன்ஷி ஏதோ திட்டுவது போன்ற வீடியோ சமூகவலைதளங்களில் வைரலாகி வருகிறது.

இந்தப் போட்டியில் இளம் வயது வீரர் சூர்யவன்ஷி தனது வாழ்நாளில் சிறந்த இன்னிங்ஸை ஆடினார். உலகத்தரம் வாய்ந்த குஜராத் பந்துவீச்சுக்கு எதிராக 47 பந்துகளில் 96 ரன்கள் எடுத்து அசத்தினார்.

இருப்பினும், 18வது ஓவரில் அவர் ஆட்டமிழந்தது ஒரு பெரிய விவாதத்தை ஏற்படுத்தியது. பராக் உணர்ச்சிவசப்பட்டு சைகை செய்து, சோகத்தில் இருந்த சூர்யவன்ஷியிடம் பேசிய காட்சிகள் சமூக வலைதளங்களில் உடனடியாகப் பரவியது. இது கடுமையான கண்டனமா அல்லது ஒரு முக்கியமான கேப்டனின் பாடமா என ரசிகர்கள் விவாதித்தனர்.

வீடியோவைப் பார்க்கவும்

Riyan Parag ड्रेसिंग रूम में Vaibhav Sooryavanshi को पूरे एटीट्यूड के साथ ज्ञान दे रहा है, लेकिन मैदान के अन्दर जाते ही खुद इसकी हवा निकल जाती है।#iplseason2026 pic.twitter.com/IdR1iixUo1
— Kᴀᴘɪʟ Gᴏᴜʀ (@GaurBulandshahr) May 29, 2026

VAIBHAV SURYAVANSHI CRYING AFTER MATCH LOSS 🤯

- Feel for Vaibhav, He did everything to win for his team but God have different plans 💔 pic.twitter.com/cpjiOM4gN8
— Sam (@cricsam02) May 30, 2026

சதத்தை தவறவிடும் சூர்யவன்ஷி

நடப்பு ஐபிஎல் தொடரில் நான்கு இன்னிங்ஸ்களில் மூன்றாவது முறையாக தொண்ணூறுகளில் அவர் அவுட்டானார். எலிமினேட்டரில், சூர்யவன்ஷி சன்ரைசர்ஸ் ஹைதராபாத்துக்கு எதிராக 29 பந்துகளில் 97 ரன்கள் எடுத்து சாதனை படைத்தார். குஜராத்துக்கு எதிராக, மூத்த தொடக்க ஆட்டக்காரர்கள் சொற்ப ரன்களில் வெளியேறிய நிலையில், 15 வயது வீரர் நம்பமுடியாத முதிர்ச்சியைக் காட்டினார். முகமது சிராஜ் மற்றும் ககிசோ ரபாடா ஆகியோரின் பந்துவீச்சை முதலில் கணித்து பிறகு மிருகத்தனமான ஆட்டத்தை தொடங்கினார். தனது அடுத்த 15 பந்துகளில் 46 ரன்கள் எடுத்து 96 ரன்களை எட்டினார். அப்போது, 440 பந்துகளில் 1,000 ஐபிஎல் ரன்களை எடுத்த அதிவேக வீரர் என்ற பெருமையை அவர் பெற்றார்.

முதல் பிளேஆஃப் சதத்தை எடுக்கும் நிலையில், சூர்யவன்ஷி ககிசோ ரபாடா வீசிய பந்தை மூன்றாவது வீரரிடம் அடித்து, 96 ரன்களில் ஆட்டமிழந்தார், இன்னிங்ஸில் 16 பந்துகள் மீதமிருந்தன.

ஏன் ரியான் பராக் உணர்ச்சிவசப்பட்டார்?

சமூக வலைதளங்களில் வைரலான வீடியோவில், பெஞ்சில் கண்ணீருடன் அமர்ந்திருந்த சூர்யவன்ஷியை, பராக் திட்டுவது போல் இருந்தது. இதனால், பராக்கை பலரும் விமர்சித்திருந்தனர். ஆனால், போட்டியின் சூழல் மிகவும் வேறமாதிரி இருந்தது.

ராஜஸ்தான் அணி இறுதியில் 214/6 என்ற பிரம்மாண்டமான ஸ்கோரை எடுத்தபோதிலும், கடைசி ஓவர்களுக்குச் சற்று முன்பு சூர்யவன்ஷி ஆட்டமிழந்ததால், 235-க்கும் மேற்பட்ட ரன்கள் எடுக்கும் வாய்ப்பு கைநழுவிப் போனது. ஆட்டத்தை வெல்லும் 104 ரன்களை அடித்த ஷுப்மன் கில் ஓயாமல் ஆடியதால், குஜராத் டைட்டன்ஸ் அணிக்கு எதிராக, அந்த கூடுதல் 15-20 ரன்களே இறுதி வித்தியாசத்தை ஏற்படுத்தின.

போட்டிக்குப் பிறகு, பராக் வதந்திகளுக்கு முற்றுப்புள்ளி வைத்தார். அதற்கு பதிலாக இளம் வீரரைப் புகழ்ந்து, அணிக்கு முக்கியத்துவம் அளித்தார். "நான் அதை வார்த்தைகளில் சொல்ல முடியாது. நீங்கள் ரன்களை குவிக்க ஒரு வழி இருக்கிறது, ஆனால் அவர் (வைபவ்) அதைச் செய்யவில்லை. அவர் கணக்கிட்டு, மிகுந்த முதிர்ச்சியுடன் தனது ஷாட்களை விளையாடுகிறார். அவர் தனது வாழ்க்கையில் சிறப்பாக செயல்பட வேண்டும், ராஜஸ்தான் ராயல்ஸுக்காக சிறப்பாக செயல்பட வேண்டும், இறுதியில் எங்கள் இரண்டாவது பட்டத்தை வெல்ல உதவ வேண்டும் என்று நான் விரும்புகிறேன்” என்று கூறினார்.

GT vs RR: கில்லின் அசால்ட் சதம்.. ராஜஸ்தானை வீழ்த்தி இறுதிப்போட்டிக்குள் நுழைந்த குஜராத் டைடன்ஸ்

ஜேம்ஸ் — Fri, 29 May 2026 23:57:02 +0530

ஐபிஎல் 2026 தொடரின் விறுவிறுப்பான இரண்டாவது தகுதிச் சுற்று (Qualifier 2) ஆட்டத்தில், ராஜஸ்தான் ராயல்ஸ் அணியை 7 விக்கெட் வித்தியாசத்தில் துவம்சம் செய்து இறுதிப்போட்டிக்கு தகுதி பெற்றுள்ளது சுப்மன் கில் தலைமையிலான குஜராத் டைட்டன்ஸ். வரும் ஞாயிற்றுக்கிழமை அகமதாபாத்தில் நடைபெறவிருக்கும் இறுதிப்போட்டியில் ராயல் சேலஞ்சர்ஸ் பெங்களூரு (RCB) அணியுடன் குஜராத் மோதவுள்ளது.

டாஸ் வென்ற ராஜஸ்தான் பேட்டிங் தேர்வு

சண்டிகர் முல்லன்பூர் மைதானத்தில் நடைபெற்ற இந்த வாழ்வா-சாவா போட்டியில் டாஸ் வென்ற ராஜஸ்தான் ராயல்ஸ் அணியின் கேப்டன் ரியான் பராக் முதலில் பேட்டிங் செய்வதாக அறிவித்தார். கடந்த போட்டியில் 97 ரன்கள் குவித்து மிரட்டிய இளம் புயல் வைபவ் சூர்யவன்ஷி மீது ரசிகர்களின் பலத்த எதிர்பார்ப்பு இருந்தது.

ராஜஸ்தான் ராயல்ஸ் திணறல்

முதலில் பேட்டிங் செய்த ராஜஸ்தான் அணிக்கு குஜராத் டைட்டன்ஸ் அணியின் பந்துவீச்சாளர்கள் ஆரம்பம் முதலே அச்சுறுத்தலாக இருந்தனர். முகமது சிராஜ், ககிசோ ரபாடா மற்றும் ரஷீத் கான் ஆகியோரின் துல்லியமான பந்துவீச்சை எதிர்கொள்ள முடியாமல் ராஜஸ்தான் பேட்டர்கள் அடுத்தடுத்து விக்கெட்டுகளை இழந்தனர்.துருவ் ஜூரெல் மற்றும் கேப்டன் ரியான் பராக் ஆகியோர் ஓரளவுக்கு தாக்குப்பிடித்து அணியின் ஸ்கோரை உயர்த்த போராடினர். எனினும், நிர்ணயிக்கப்பட்ட 20 ஓவர்களில் ராஜஸ்தான் ராயல்ஸ் அணியால் சவாலான ஸ்கோரை எட்டியது

அசால்ட்டாக அடித்த குஜராத்!

இதனைத் தொடர்ந்து, எளிய இலக்கை நோக்கி களம் இறங்கிய குஜராத் டைட்டன்ஸ் அணிக்கு தொடக்க வீரர்களான கேப்டன் சுப்மன் கில் மற்றும் தமிழக சிங்கம் சாய் சுதர்சன் ஜோடி அதிரடியான தொடக்கத்தைக் கொடுத்தனர்.

ராஜஸ்தான் பந்துவீச்சை நாலாபுறமும் சிதறடித்த குஜராத் பேட்டர்கள், ஆட்டத்தின் தன்மையை உணர்ந்து விக்கெட்டுகளை வீணாக்காமல் இலக்கை நோக்கி நகர்ந்தனர். இறுதியில், குஜராத் டைட்டன்ஸ் அணி 3 விக்கெட்டுகளை மட்டுமே இழந்து, 7 விக்கெட் வித்தியாசத்தில் அபார வெற்றி பெற்று இறுதிப்போட்டிக்கு தகுதி பெற்றது. கேப்டன் சுப்மன் கில் சதமடித்து 103 ரன்களுக்கு ஆட்டமிழந்தார்

ஆர்சிபி உடன் பலப்பரீட்சை!

இந்த அதிரடி வெற்றியின் மூலம், மே 31 அன்று அகமதாபாத் நரேந்திர மோடி மைதானத்தில் நடைபெறவிருக்கும் மெகா இறுதிப்போட்டியில் விராட் கோலியின் ராயல் சேலஞ்சர்ஸ் பெங்களூரு (RCB) அணியை எதிர்கொள்ள தயாராகிவிட்டது குஜராத் டைட்டன்ஸ். கோப்பையை வெல்லப்போவது 'கிங்' கோலியா அல்லது 'பிரின்ஸ்' கில்லா என்பதை காண ஒட்டுமொத்த கிரிக்கெட் உலகமே ஆவலுடன் காத்திருக்கிறது!