கட்டாய ராணுவ சேவையில் இருந்து விலக்கு... தென் கொரிய கால்பந்து அணிக்கு கிடைத்த பரிசு...

ஒரே போட்டியில் 4 சாதனைகள்...ஷ்ரேயாஸ் ஐயருக்கு குவியும் பாராட்டுகள்...

யோகேஷ் குமார் — Wed, 7 Oct 2026 16:23:14 +0530

இந்திய அணியின் கேப்டன் ஷ்ரேயாஸ் அய்யர் மேற்கிந்திய தீவுகள் அணிக்கு எதிரான முதலாவது டி-20 போட்டியில் 4 முக்கிய சாதனைகளை படைத்துள்ளார்.

முதல் சதம்

மேற்கிந்திய தீவுகள் அணிக்கு எதிராக லக்னோவில் நடைபெற்ற முதல் டி-20 போட்டியில் இந்திய அணி 8 விக்கெட்கள் வித்தியாசத்தில் அபார வெற்றி பெற்றது. இந்த போட்டியில் 172 ரன்கள் என்ற கடின இலக்கை இந்திய அணி வெறும் 14.4 ஓவர்களில் எட்டியது. இதற்கு முக்கிய காரணமாக அமைந்தது கேப்டன் ஷ்ரேயாஸ் ஐயரின் அதிரடி சதம் தான். ஆட்டத்தின் தொடக்கம் முதலே அதிரடி ஆட்டத்தை வெளிப்படுத்திய ஷ்ரேயாஸ் அய்யர் வெறும் 43 பந்துகளில் சதம் விளாசி அசத்தினார். இதன்மூலம் சர்வதேச டி-20 போட்டிகளில் தனது முதல் சதத்தை அவர் பதிவு செய்தார்.

முக்கிய சாதனைகள்

அதிரடி சதமடித்து இந்திய அணியை வெற்றி பெற செய்த ஷ்ரேயாஸ் ஐயர், டி-20 போட்டிகளில் சேஸிங்கின் போது அதிகப்பட்ச ரன்களை பதிவு செய்த இந்திய வீரர் என்ற கே.எல்.ராகுலின் (101 ரன்கள்) சாதனையை முறியடித்தார்.

அதேபோல், மேற்கு இந்திய தீவுகள் அணிக்கு எதிரான சர்வதேச டி20 போட்டிகளில் அதிவேக சதத்தை பூர்த்தி செய்த இந்திய வீரர் என்ற சாதனையையும் அவர் படைத்தார்.

மேலும், கேப்டனாக சர்வதேச டி-20 போட்டிகளில் சதம் விளாசிய 3-வது இந்தியர் என்ற பெருமையை அவர் அடைந்தார். அதன்படி, ரோகித் சர்மா, சூர்யகுமார் வரிசையில் ஷ்ரேயாஸ் ஐயர் இணைந்தார்.

முதல்முறை

சர்வதேச டி-20 போட்டிகளில் இலக்கை துரத்திய போது சதம் விளாசிய முதல் இந்தியர் என்ற வரலாற்று சிறப்புமிக்க சாதனையையும் ஷ்ரேயாஸ் ஐயர் தன்வசப்படுத்தினார். இவ்வாறு ஒரே போட்டியில் 4 முக்கிய சாதனைகளை அவர் நிகழ்த்தியுள்ளார்.

ஆசிய கோப்பை வெற்றி

கடந்த 2 நாட்களுக்கு முன்பு தான் ஷ்ரேயாஸ் ஐயர் தலைமையிலான இந்திய அணி ஜப்பானில் நடைபெற்ற ஆசிய விளையாட்டு இறுதிப் போட்டியில் பாகிஸ்தான் அணியை 19 ரன்கள் வித்தியாசத்தில் வீழ்த்தி தங்கப் பதக்கத்தை வென்றிருந்தது குறிப்பிடத்தக்கது.

இந்தியா முன்னிலை

இந்த வெற்றியின் மூலம் 5 போட்டிகள் கொண்ட டி-20 தொடரில் இந்திய அணி 1-0 என்ற கணக்கில் முன்னிலை வகிக்கிறது. 2-வது டி-20 போட்டி வருகிற 9ஆம் தேதி ராஞ்சியில் நடைபெறுகிறது. முன்னதாக, 3 போட்டிகள் கொண்ட ஒருநாள் தொடரை இந்திய அணி 2-1 என்ற கணக்கில் வென்றிருந்தது.

கண்ணீருடன் விடைபெற்ற ஜாம்பவான்...முடிவுக்கு வந்தது மெஸ்ஸியின் சர்வதேச பயணம்...

யோகேஷ் குமார் — Wed, 7 Oct 2026 11:05:27 +0530

உலகெங்கிலும் உள்ள கால்பந்து ரசிகர்களின் மனம் கவர்ந்த வீரர்களில் ஒருவரும், அர்ஜென்டினா அணியின் நட்சத்திர வீரருமாக திகழும் லியோனல் மெஸ்ஸி சர்வதேச கால்பந்து போட்டிகளில் இருந்து ஒய்வு பெற்றார்.

5 வயதில் கால்பந்து

1987 ஆம் ஆண்டு ஜூன் 24 தேதி அர்ஜென்டினா நாட்டில் உள்ள ரொசாரியோ நகரத்தில் ஜார்ஜ் மெஸ்ஸி - செலியா குசிட்டினி தம்பதியின் 3-வது குழந்தையாக பிறந்தார் லியோனல் மெஸ்ஸி. தனது 5 வயதில் இருந்தே கால்பந்து விளையாட தொடங்கிய மெஸ்ஸி, 12 வயதில் நியுவெல்ஸ் ஒல்ட் பாய்ஸ் அணிக்காக விளையாடி சுமார் 500 கோல்களை அடித்து அசத்தினார். தொடர்ந்து, சிறுவயதிலேயே லியோனல் மெஸ்ஸிக்கு வளர்ச்சி ஹார்மோன் குறைபாடு இருந்தது கண்டறியப்பட்டது. ஆனால், அதற்கான மருத்துவச் செலவை (மாதம் 900 டாலர்கள்) ஏற்றுக்கொள்ள அர்ஜென்டினாவில் உள்ள அவரது உள்ளூர் கிளப் முன்வரவில்லை.

பார்சிலோனா அணியில் தஞ்சம்

மெஸ்ஸியின் திறமையை கண்ட பார்சிலோனா அணியின் அப்போதைய விளையாட்டு இயக்குனர் கார்லஸ் ரெக்சாக் அவரை அணியில் சேர்த்துக் கொள்வதோடு, அவரது மருத்துவ செலவையும் ஏற்றுக்கொள்வதாக உறுதியளித்தார். இதன் காரணமாக 2000ஆம் ஆண்டு மெஸ்ஸியும் அவரது குடும்பத்தாரும் ஸ்பெயினில் உள்ள பார்சிலோனா நகருக்கு குடிபெயர்ந்தனர். முதலில், 14 வயதுக்குட்பட்ட பார்சிலோனா அணியின் இளையோர் பிரிவில் ஆடத் தொடங்கிய மெஸ்ஸி, 2004ஆம் ஆண்டு பார்சிலோனா முதன்மை அணிக்காக அதிகாரப்பூர்வ போட்டியில் களமிறங்கினார்.

முடிவுக்கு வந்த பந்தம்

இந்த நிலையில், கடந்த 2021 ஆம் ஆண்டு பார்சிலோனா அணி கடுமையான பொருளாதார இழப்புகளைச் சந்தித்தது. இதனால், அணியின் ஒட்டுமொத்த ஊதியச் செலவைக் குறைக்க வேண்டிய கட்டாயம் ஏற்பட்டது. ஸ்பானிஷ் கால்பந்து லீக்கின் (லா லிகா) 'ஃபேர் ப்ளே' (Fair Play) நிதி வரம்பு விதிகளின்படி, கிளப்பின் வருமானத்திற்கு மீறி ஊதியம் வழங்கக் கூடாது என்ற கட்டுப்பாடு இருந்தது. இதையடுத்து, மெஸ்ஸி தனது ஊதியத்தில் 50 சதவீதத்தை குறைக்கத் தயாராக இருந்தபோதும், கிளப்பின் அப்போதைய நிதி நிலைமை மற்றும் லா லிகாவின் அனுமதிக்கப்பட்ட வரம்பிற்குள் புதிய ஒப்பந்தத்தை பதிவு செய்ய பார்சிலோனா நிர்வாகத்தால் இயலாமல் போனது. இதனால், லியோனல் மெஸ்ஸி பார்சிலோனா அணியில் இருந்து வெளியேறினார். சுமார் 17 ஆண்டுகள் பார்சிலோனா அணிக்காக பல்வேறு போட்டிகளில் விளையாடி பல கோல்களை அடித்து அசத்திய லியோனல் மெஸ்ஸி சர்வதேச கால்பந்து ஜாம்பவானாகவும் உருவெடுத்தார் என்பது குறிப்பிடத்தக்கது. பார்சிலோனா அணிக்காக அவர் நிகழ்த்திய சாதனைகள் ஏராளம்.

சர்வதேச அறிமுகம்

2005ஆம் ஆண்டு அர்ஜென்டினா அணிக்காக சர்வதேச கால்பந்து போட்டிகளில் அறிமுகமானார் லியோனல் மெஸ்ஸி. 2006ஆம் ஆண்டு குரோவாசியா அணிக்கு எதிரான நட்புரீதியான ஆட்டத்தில் மெஸ்ஸி தனது முதல் சர்வதேச கோலை பதிவு செய்தார். அதன்பின், 2014ஆம் ஆண்டு உலகக் கோப்பை மற்றும் கோபா அமெரிக்கா தொடர்களில் அடைந்த தோல்விகளால் மனவேதனை அடைந்த மெஸ்ஸி, 2016ஆம் ஆண்டு சர்வதேச போட்டிகளில் இருந்து தற்காலிகமாக விலகினார்.

மறுபிரேவசம்

2021ஆம் ஆண்டில் மீண்டும் சர்வதேச அணிக்கு திரும்பிய மெஸ்ஸிக்கு அவரது கால்பந்து வாழ்க்கையில் மிகப்பெரிய திருப்புமுனை ஆண்டாக அது அமைந்தது. அந்த ஆண்டு நடைபெற்ற கோபா கால்பந்து தொடரின் இறுதிப் போட்டியில் பிரேசில் அணியை வீழ்த்தி அர்ஜென்டினா அணிக்கு பட்டத்தை பெற்று தந்தார். அதைத் தொடர்ந்து, 2022 ஆம் ஆண்டு நடைபெற்ற பிபா உலகக் கோப்பை கால்பந்து தொடரில் அர்ஜென்டினா அணியை சாம்பியன் பட்டம் வெல்ல் வைத்து தனது பல ஆண்டுகால கனவை நிறைவேற்றிக் கொண்டார். மீண்டும், 2024ஆம் ஆண்டு நடைபெற்ற கோபா அமெரிக்கா தொடரிலும் அர்ஜென்டினா அணியை வெற்றி பெற செய்தார்.

மெஸ்ஸி நிகழ்த்திய சாதனைகள்

அர்ஜென்டினா அணிக்காக 125-க்கும் மேற்பட்ட போட்டிகளில் விளையாடியுள்ள மெஸ்ஸி 200-க்கும் மேற்பட்ட சர்வதேச கோல்களை பதிவு செய்துள்ளார். அதேபோல் லா லிகா தொடரில் பார்சிலோ அணிக்காக அதிகப்பட்சமாக 474 கோல்களை அவர் அடித்துள்ளார். அதிலும், 2011-12-வது சீசனில் பார்சிலோனா அணிக்காக 73 கோல்களை அடித்து சாதனை படைத்தார். இதன்மூலம், தனது ஒட்டுமொத்த கால்பந்து பயணத்தில் லியோனல் மெஸ்ஸி 900-க்கும் மேற்பட்ட கோல்களை பதிவு செய்துள்ளார். மேலும், பிஃபா சிறந்த வீரர் விருதை 3 முறையும், பிஃபா கோல்டன் பால் விருதை 2 முறையும் மெஸ்ஸி வென்றுள்ளார்.

ஜாம்பவான் மெஸ்ஸி

5 வயதில் கால்பந்து விளையாட தொடங்கிய மெஸ்ஸி தனது கடின உழைப்பு மற்றும் திறமையால் படிப்படியாக உயர்ந்து இன்று கால்பந்து உலகின் ஜாம்பவானாக திகழ்கிறார். தொழில்முறை மற்றும் சர்வதேச போட்டிகளில் எண்ணற்ற சாதனைகளை நிகழ்த்திய மெஸ்ஸி, உலகெங்கிலும் உள்ள கால்பந்து ரசிகர்களின் மனதில் நீங்கா இடம்பிடித்துள்ளார் என்று சொன்னால் மிகையாகாது. மெஸ்ஸி என்ற பெயரை கேட்டாலே ஒவ்வொரு கால்பந்து ரசிகரும் உற்சாகமடையும் அளவிற்கு அவர் தனது திறமையால் பலரது மனைதையும் கவர்ந்துள்ளார்.

சர்வதேச போட்டிகளில் ஓய்வு

நடப்பாண்டு பிஃபா உலகக் கோப்பை தொடரின் இறுதிப் போட்டியில் ஸ்பெயின் அணியிடம் அர்ஜென்டினா தோல்வியடைந்த நிலையில், ”நான் அனைத்தையும் கொடுத்துவிட்டேன். இனி கொடுக்க என்னிடம் எதுவும் இல்லை” என்ற உணர்வுபூர்வமான வார்த்தகளுடன் மெஸ்ஸி தனது சர்வதேச ஓய்வு தொடர்பான அறிவிப்பை வெளியிட்டார். அதன்படி, நேற்று (அக்.6) பெனின் அணியுடன் நடைபெற்ற நட்புரீதியிலான போட்டியுடன் சர்வதேச கால்பந்து போட்டிகளில் இருந்து ஓய்வு பெற்றார் லியோனல் மெஸ்ஸி.

உண்ர்ச்சிப்பூர்வமான தருணம்

தனது கடைசி போட்டியில் விளையாடிய லியோனல் மெஸ்ஸிக்கு பியூனஸ் அயர்ஸில் உள்ள மானுமென்டல் மைதானத்தில் பிரம்மாண்டமான பிரியாவிடை அளிக்கப்பட்டது. தனது 3 மகன்களுடன் மைதானத்திற்குள் நுழைந்த மெஸ்ஸி, ரசிகர்களின் ஆரவாரத்தை கண்டு உணர்ச்சிவசப்பட்டார். மேலும், தேசிய கீதம் இசைக்கப்பட்ட போது அவரது கண்களில் கண்ணீர் பெருகியது. அப்போது, மெஸ்ஸியின் 10-ஆம் எண் ஜெர்சியை குறிக்கும் வகையில் 10-வது நிமிடத்தில் ஆட்டம் சில நொடிகள் நிறுத்தப்பட்ட நிலையில், 85,000-க்கும் மேற்பட்ட ரசிகர்கள் நீண்ட நேரம் கைதட்டி மெஸ்ஸிக்கு தங்களது மரியாதையை செலுத்தினர். 21 ஆண்டுகாலம் சர்வதேச கால்பந்து உலகின் ஜாம்பவானாக திகழ்ந்த லியோனல் மெஸ்ஸியின் பயணம் ரசிகர்களின் ஆரவார உற்சாகம் மற்றும் உணர்ச்சிகரமான தருணங்களுடன் முடிவுக்கு வந்தது.

இனி எங்கு பார்க்கலாம்?

சர்வதேச கால்பந்து உலகில் இருந்து மெஸ்ஸி ஒய்வு பெற்றாலும், மேஜர் லீக் சாக்கர் தொடரில் அவர் இண்டர் மியாமி அணிக்காக தொடர்ந்து விளையாடுவார் என அறிவிக்கப்பட்டுள்ளது. என்னதான் சர்வதேச போட்டிகளில் அவரை காண முடியாமல் போனாலும், தொழில்முறை போட்டிகளில் பார்க்கலாம் என்ற நம்பிக்கையால் ரசிகர்கள் சற்று மகிழ்ச்சி அடைந்துள்ளனர்.

Bhuvneshwar Kumar: சர்ப்ரைஸ்..! அகர்கர் போனதும் புவனேஷ்வர் குமார் கம்பேக், 4 ஆண்டுகளுக்குப் பின்.. IND Vs NZ T20

குலசேகரன் முனிரத்தினம் — Wed, 7 Oct 2026 07:06:50 +0530

Bhuvneshwar Kumar IND Vs NZ: தேர்வுக்குழு தலைவர் அஜித் அகர்களின் பணிக்காலம் முடிந்த உடனே, புவனேஷ்வர் குமார் அணிக்கு திரும்பி இருப்பது கவனத்தை ஈர்த்துள்ளது.

4 ஆண்டுகளுக்குப் பின் புவனேஷ்வர் குமார் கம்பேக்

இந்தியா - நியூசிலாந்து அணிகளுக்கு இடையேயான 5 போட்டிகள் கொண்ட டி20 தொடர் வரும் அக்டோபர் 22ம் தேதி தொடங்க உள்ளது. இதற்கான ஸ்ரேயாஸ் அய்யர் தலைமையிலான 15 வீரர்கள் அடங்கிய பட்டியலை பிசிசிஐ வெளியிட்டுள்ளது. இதில் மிகப்பெரிய அளவில் மாற்றம் இல்லாவிட்டாலும், ஆச்சரியத்தை ஏற்படுத்தும் விதமாக சுமார் நான்கு ஆண்டுகளுக்குப் பிறகு, நட்சத்திர வேகப்பந்து வீச்சாளரான புவனேஷ்வர்குமார் தேர்வு செய்யப்பட்டுள்ளார். கடைசியாக இவர் கடந்த 2022ம் ஆண்டு டி20 உலகக் கோப்பை அரையிறுதி போட்டியில், இங்கிலாந்து அணிக்கு எதிரான தோல்வியின் போது இந்திய அணிக்காக விளையாடி இருந்தது குறிப்பிடத்தக்கது.

கவனத்தை ஈர்த்து சம்பவம் செய்த புவனேஷ்வர் குமார்..!

கடந்த இரண்டு ஆண்டுகளாக ஐபிஎல் தொடரில் பெங்களூரு அணிக்காக விளையாடி வரும் புவனேஷ்வர் குமார், அந்த அணி அடுத்தடுத்து இரண்டு கோப்பைகளை வெல்ல மிக முக்கிய பங்கு வகித்துள்ளார். இரண்டு சீசன்களிலும் சேர்த்து 45 விக்கெட்டுகளை குவித்துள்ளார். அண்மையில் ஹாங்காங் சிக்சஸ் தொடருக்கான இந்திய அணிக்கு இவர் கேப்டனாகவும் நியமிக்கப்பட்ட நிலையில், தற்போது டி20 தொடரில் இணைக்கப்பட்டுள்ளதால், அந்த தொடரை புவனேஷ்குமார் தவறவிடுவார். 36 வயதான புவனேஷ்வரின் வருகையை தொடர்ந்து, நியூசிலாந்து தொடரில் பும்ராவிற்கு ஓய்வளிக்கப்பட்டுள்ளது. அபாரமான ஸ்விங் மற்றும் ஸ்லோ பால் போன்ற பல்வேறு வேரியேஷன்களை கொண்டுள்ள புவனேஷ்வரை களத்தில் காண ரசிகர்கல் ஆவலுடன் காத்திருக்கின்றனர்.

அகர்கள் வெளியே..! புவனேஷ்வர் உள்ளே..!

சிறப்பான ஆட்டத்திறன் இருந்தபோதிலும் மூத்த வீரர்களையே நம்பி இருப்பதை, முன்னாள் தேர்வுக்குழு தலைவரான அஜித் அகர்கர் விரும்பவில்லை. இதன் காரணமாகவே புவனேஷ்வருக்கு வாய்ப்புகள் மறுக்கப்பட்டு வந்தன. அவரை அணியில் சேர்ப்பது தொடர்பாக மத்திய மண்டல தேர்வாளர் ருத்ர பிரதாப் சிங் கடுமையாக முயன்றும் எந்த பலனும் இல்லை. ஆனால் தற்போது அஜித் அகர்கர் ஓய்வு பெற்ற பிறகு, இடைக்கால தலைவரான பிரக்யான் ஓஜாவிற்கு புவனேஷ்வரின் முக்கியத்துவத்தை எடுத்துரைத்து அவர் மீண்டும் அணியில் இடம்பெற ருத்ர பிரதாப் வழிவகை செய்துள்ளார். இதுவரை 87 சர்வதேச டி20 போட்டிகளில் விளையாடி 90 விக்கெட்டுகளை சாய்த்துள்ளார். தனது அனுபவத்தைக் கொண்டு, ஆஸ்திரேலியாவில் நடைபெறவிருக்கும் 2028 டி20 உலகக் கோப்பைக்கான சாத்தியமான வீரர்களாக கருதப்படும் மயங்க் யாதவ் மற்றும் பிரின்ஸ் யாதவ் போன்றவர்களுக்கும் அவரால் வழிகாட்ட முடியும்.

இதையும் படியுங்கள்: TN Weather News: தமிழ்நாட்டில் இன்று எந்தெந்த மாவட்டங்களுக்கு கனமழை வார்னிங் - சென்னை? வானிலை அறிக்கை

இந்திய அணி விவரம்:

ஸ்ரேயாஸ் அய்யர் தலைமையிலான இந்திய அணியில் அபிஷேக் ஷர்மா, சஞ்சு சாம்சன் (விக்கெட் கீப்பர்), வைபவ் சூரியவன்ஷி, இஷான் கிஷன் (விக்கெட் கீப்பர்), திலக் வர்மா (துணை கேப்டன்), அக்சர் படேல், ஷிவம் துபே, நிதிஷ் குமார் ரெட்டி, நமன் திர், ப்ரின்ஸ் யாதவ், மயங்க் யாதவ், அர்ஷ்தீப் சிங், புவனேஷ்வர் குமார், வருண் சக்ரவர்த்தி, குல்தீப் யாதவ் ஆகியோர் இடம்பெற்றுள்ளனர்.

IND vs WI: கொழுத்திய ஹோப்.. ரூட் எடுத்து செட்டிங் செய்த ரூதர்ஃபோர்ட்! 172 ரன்களை எட்டுமா இந்தியா?

சுகுமாறன் — Tue, 6 Oct 2026 20:56:31 +0530

இந்தியா - வெஸ்ட் இண்டீஸ் அணிகள் மோதும் முதல் டி20 போட்டி இன்று லக்னோ மைதானத்தில் நடந்து வருகிறது. இரு அணிகளும் மோதும் இந்த போட்டியில் இந்தியா டாஸ் வென்று முதலில் பந்துவீச்சைத் தேர்வு செய்தது.

ஹோப் - ரூதர்ஃபோர்ட்:

இதையடுத்து, ஆட்டத்தை தொடங்கிய வெஸ்ட் இண்டீஸ் அணிக்காக ஷாய் ஹோப் - கமீல் பூரண் அதிரடியாக ஆட்டத்தை தொடங்கினர். ஹோப் பவுண்டரிகளும், சிக்ஸரும் விளாச அவருக்கு ஒத்துழைப்பு அளித்த கமீல் பூரண் 11 பந்துகளில் 2 பவுண்டரியுடன் 12 ரன்கள் அடித்து அவுட்டானார்.

அடுத்து வந்த ஹெட்மயர் 5 ரன்னில் ரன் அவுட்டாக, அதே ஓவரில் ரோவ்மென் பவெல் டக் அவுட்டானார். 44 ரன்களுக்கு 3 விக்கெட்டுகளை இழந்து தடுமாற ஷாய் ஹோப் - ரூதர்ஃபோர்ட் ஜோடி சேர்ந்தது. இருவரும் இணைந்து அபாரமாக ஆடினர்.

இறுதிகட்ட அதிரடி:

ஷாய் ஹோப் பவுண்டரியும், சிக்ஸரும் விளாசி அணி 100 ரன்களை கடக்க உதவினார். அவர் அபாரமாக ஆடி 6 பவுண்டரி 2 சிக்ஸருடன் 37 பந்துகளில் 52 ரன்கள் எடுத்து அவுட்டானார். அவர் ஆட்டமிழந்த பிறகு அடுத்து வந்த சேஸ் 5 ரன்னிலும், அபாயகரமான பேட்ஸ்மேன் ஷெப்பர்ட் 7 ரன்னிலும் அவுட்டாக ரூதர்ஃபோர்ட் இந்திய பந்துவீச்சை வெளுத்து வாங்கத் தொடங்கினார்.

172 ரன்கள் அவுட்:

அர்ஷ்தீப், மயங்க் ஆகியோரது பந்துவீச்சை அவர் விளாச வெஸ்ட் இண்டீஸ் ரன் மளமளவென எகிறியது. அபாரமாக ஆடிய அவர் வெஸ்ட் இண்டீஸ் அணியை 150 ரன்களை கடக்க வைத்தார். சிறப்பாக ஆடி அரைசதம் விளாசிய அவர் வெஸ்ட் இண்டீஸ் அணி 171 ரன்களை எட்டியபோது அவுட்டானார்.

அவர் 34 பந்துகளில் 56 ரன்கள் எடுத்து அவுட்டாக, அவர் ஆட்டமிழந்த அடுத்த ஓவரில் அதாவது கடைசி ஓவரின் முதல் பந்திலே அகில் ஹொசைனும் 15 ரன்னில் அவுட்டாக வெஸ்ட் இண்டீஸ் அணி 171 ரன்களுக்கு 19.1 ஓவர்களில் ஆல் அவுட்டானது.

இந்திய அணிக்காக நமன் தீர் 4 ஓவர்களில் 31 ரன்களை விட்டுக்கொடுத்து 3 விக்கெட்டுகளை வீழ்த்தினார். குல்தீப் யாதவ் 2 விக்கெட்டுகளையும், அர்ஷ்தீப், மயங்க் மற்றும் அக்ஷர் படேல் தலா 1 விக்கெட்டையும் வீழ்த்தினர். மயங்க் யாதவ் 4 ஓவர்களில் 40 ரன்களையும், அர்ஷ்தீப்சிங் 4 ஓவர்களில் 34 ரன்களையும் வாரி வழங்கினர்.

இந்திய அணி 172 ரன்கள் என்ற இலக்குடன் களமிறங்கி ஆடி வருகிறது. சேசிங்கின்போது பனிப்பொழிவு அதிகம் இருக்கும் என்பதால் இந்திய அணிக்கு அது பக்கபலமாக இருக்கும் என்று கருதப்படுகிறது. வெஸ்ட் இண்டீஸ் அணியில் ஷமர் ஜோசப், அகில் ஹொசைன், ஸ்ப்ரிங்கர், ஃபோர்ட், ஷெப்பர்ட், சேஸ் ஆகியோரே பந்துவீச்சில் பிரதானமாக உள்ளனர். இந்த போட்டியில் வெற்றி பெற்று தொடரை வெற்றியுடன் தொடங்க இந்தியா முனைப்புடன் உள்ளது.

Harmanpreet Kaur: "என்றைக்கும் நீ தலைவிதான்.." ஹர்மன்ப்ரீத் கேப்டன்சியில் இந்திய கிரிக்கெட் படைத்த சாதனைகள் இத்தனையா?

சுகுமாறன் — Tue, 6 Oct 2026 17:38:44 +0530

இந்திய ஆடவர் கிரிக்கெட் அணிக்கு எதிராக இந்திய மகளிர் கிரிக்கெட் அணியும் பல்வேறு சாதனைகளை படைத்து வருகிறது. குறிப்பாக, சமீபகாலமாக இந்திய மகளிர் அணி படைத்த சாதனைகள் என்பது மிகப்பெரிய அளவிலானது ஆகும்.

கேப்டன்சியை ராஜினாமா செய்த ஹர்மன்ப்ரீத் கவுர்:

இந்திய மகளிர் கிரிக்கெட்டின் இந்த மிகப்பெரிய வளர்ச்சிக்கு காரணம் கேப்டன் ஹர்மன்ப்ரீத் கவுர் ஆவார். இந்திய அணிக்காக நீண்ட காலமாக கேப்டன்சியை வகித்து வந்த அவர் தனது கேப்டன்சி பதவியில் இருந்து விலகுவதாக அறிவித்துள்ளார். இது ரசிகர்களுக்கு மிகப்பெரிய அதிர்ச்சியை அளித்தாலும், வீராங்கனையாக தனது கிரிக்கெட் பயணம் தொடரும் என்று பதிவிட்டுள்ளார்.

அதிரடி வீராங்கனை:

37 வயதான ஹர்மன்ப்ரீத் கவுர் பஞ்சாப்பைச் சேர்ந்தவர். 2007ம் ஆண்டு பாகிஸ்தான் அணிக்கு எதிரான போட்டி மூலமாக இந்திய அணிக்காக அறிமுகமானார். டெஸ்ட் போட்டியில் 2013ம் ஆண்டும், டி20 போட்டியில் 2011ம் ஆண்டு அறிமுகமானார். சிறந்த அதிரடி பேட்டிங் வீராங்கனையான ஹர்மன்ப்ரீத் கவுர் 164 ஒருநாள் போட்டிகளில் ஆடி 4 ஆயிரத்து 541 ரன்கள் எடுத்துள்ளார்.

அதிகபட்சமாக 171 ரன்கள் எடுத்துள்ளார். இதில் 7 சதம், 24 அரைசதங்கள் எடுத்துள்ளார். 57 சிக்ஸர்கள் விளாசியுள்ளார். 44 முறை நாட் அவுட்டாக ஆடியுள்ளார். 210 டி20 போட்டிகளில் ஆடி 4 ஆயிரத்து 346 ரன்கள் எடுத்துள்ளார். ஒரு சதம், 18 அரைசதங்கள் விளாசியுள்ளார். 8 டெஸ்ட் போட்டிகளில் ஆடி 2 அரைசதங்களுடன் 304 ரன்கள் எடுத்துள்ளார்.

கேப்டனாக சாதித்தது என்ன?

கேப்டனாக ஹர்மன்ப்ரீத் கவுர் இந்தியாவை 5 டெஸ்ட் போட்டிகள், 51 ஒருநாள் போட்டிகள், 155 டி20 போட்டிகளில் ஆடியுள்ளார். 2023 மற்றும் 2026 ஆசிய விளையாட்டுப் போட்டிகளில் தங்கப்பதக்கத்தை இந்திய அணி இவரது தலைமையில் வென்றது.

இந்திய மகளிர் அணி முதன்முறையாக ஒருநாள் உலகக்கோப்பையை கடந்தாண்டு வென்றது ஹர்மன்ப்ரீத் கவுர் தலைமையிலே ஆகும். இந்தியாவிற்காக கபில்தேவ், தோனிக்கு பிறகு 50 ஓவர் உலகக்கோப்பையை வென்றவரும் ஹர்மன்ப்ரீத் கவுரே ஆவார்.

2022ம் ஆண்டு காமன்வெல்த் தொடரில் இந்திய அணி வெள்ளிப்பதக்கம் வென்றபோதும் அணியை வழிநடத்திய பெருமை இவருக்கேச் சேரும். கேப்டனாக 150 டி20 போட்டிகளில் அணியை வழிநடத்திய முதல் இந்தியர் இவரே ஆவார். ஆடவர் போட்டிகளில் இந்த சாதனையை இதுவரை யாரும் செய்தது இல்லை.

மகளிர் ப்ரீமியர் லீக்கிலும் அசத்தல்:

ஹர்மன்ப்ரீத் கவுருக்கு பிறகு இந்திய அணியின் கேப்டன் பொறுப்பை ஸ்மிரிதி மந்தனா ஏற்பார் என்று கருதப்படுகிறது. தற்போது 37 வயதான ஸ்மிரிதி மந்தனா மகளிர் ப்ரீமியர் லீக் தொடரிலும் மும்பைக்காக இரு முறை கோப்பையை வென்று தந்தவர் என்பது குறிப்பிடத்தக்கது.

இந்திய கிரிக்கெட் அணியை மிகப்பெரிய அளவில் வளர்ச்சிப் பாதைக்கு அழைத்துச் சென்ற ஹர்மன்ப்ரீத் கவுரை ஒரு வடிவத்தில் மட்டும் கேப்டன்சியை கவனிக்குமாறு பிசிசிஐ கோரியபோதும் அவர் அணியின் எதிர்காலத்திற்காக மறுப்பு தெரிவித்துவிட்டதாக கூறப்படுகிறது.

IND vs WI: ரன்மழையைப் பார்க்க ரெடியா? இந்தியா - வெ.இண்டீஸ் இன்று முதல் டி20! வெற்றியுடன் தொடங்கப்போவது யார்?

சுகுமாறன் — Tue, 6 Oct 2026 15:58:26 +0530

வெஸ்ட் இண்டீஸ் அணி இந்தியாவிற்கு சுற்றுப்பயணம் மேற்கொண்டு கிரிக்கெட் தொடரில் ஆடி வருகிறது. 3 ஒருநாள் போட்டிகள் மற்றும் 5 டி20 ஒருநாள் கிரிக்கெட் தொடரில் ஆடி வருகிறது. இதில் இரு அணிகளும் மோதிய ஒருநாள் போட்டித் தொடரில் இந்தியா 2-1 என்ற கணக்கில் வென்றது.

இந்த நிலையில், வெஸ்ட் இண்டீஸ் மற்றும் இந்தியா மோதும் முதல் டி20 போட்டி இன்று நடக்கிறது. இந்திய அணி சமீபத்தில் ஆசிய விளையாட்டுப் போட்டியில் தங்கப்பதக்கம் வென்று அசத்தியிருந்தது. அதே வேகத்தில் தற்போது இந்த டி20 தொடரில் களமிறங்குகிறது. ஒருநாள் தொடரில் கடைசி போட்டியில் வெற்றி பெற்ற உத்வேகத்தில் வெஸ்ட் இண்டீஸ் களமிறங்குகிறது.

பேட்டிங் பலம்:

இரு அணிகளும் பலம் வாய்ந்த அணிகள் என்பதால் இந்த போட்டி மிகவும் விறுவிறுப்பாக இருக்கும் என்று கருதப்படுகிறது. இந்திய அணியைப் பொறுத்தமட்டில் பேட்டிங்கில் சாம்சன், சூர்யவன்ஷி, கேப்டன் ஸ்ரேயாஸ் ஐயர், அபிஷேக் சர்மா, திலக் வர்மா, இஷன் கிஷன், ஷிவம் துபே ஆகியோர் பேட்டிங்கில் பலமாக உள்ளனர்.

வெஸ்ட் இண்டீஸ் அணியைப் பொறுத்தமட்டில் கேப்டன் ஷாய் ஹோப், கமீல் பூரண், ஹெட்மயர், ரூதர்ஃபோர்ட், ரோமன் பவெல் ஆகியோர் உள்ளனர்.

பந்துவீச்சு எப்படி?

டி20 போட்டியைப் பொறுத்தமட்டில் பந்துவீச்சு என்பது மிக மிக அவசியமானது ஆகும். இந்திய அணியின் பந்துவீச்சைப் பொறுத்தமட்டில் மயங்க் யாதவ், ப்ரின்ஸ் யாதவ், குல்தீப் யாதவ், அர்ஷ்தீப் சிங் ஆகியோர் உள்ளனர். சுழலும், வேகமும் கலந்த கலவையாக இந்திய அணி அணி பந்துவீச்சில் களமிறங்கும் என்று கருதப்படுகிறது.

வெஸ்ட் இண்டீஸ் அணியைப் பொறுத்தமட்டில் பந்துவீச்சில் ஃபோர்ட், கீமோ பால், அமீர் ஜாங்கோ, ஷமர் ஜோசப், அகீல் ஹொசைன் ஆகியோர் களமிறங்குவார்கள் என்று கருதப்படுகிறது. இந்திய அணியின் பேட்டிங்கிற்கு இவர்கள் சவால் அளித்தால் வெஸ்ட் இண்டீஸ் அணி வெற்றி எளிதாகும்.

ஆல்ரவுண்டர்கள்:

இரு அணியைப் பொறுத்தமட்டில் ஆல்ரவுண்டர்கள் மிகவும் முக்கிய பங்கு வகிப்பார்கள் என்று கருதப்படுகிறது. இந்திய அணியின் அக்ஷர் படேல், ஷிவம் துபே ஆகியோர் களமிறங்க உள்ளனர். வெஸ்ட் இண்டீஸ் அணியைப் பொறுத்தமட்டில் ஷெப்பர்ட், ரூதர்ஃபோர்ட் உள்ளனர்.

இந்த போட்டி இன்று இரவு 7 மணிக்கு லக்னோவில் நடக்கிறது. லக்னோ மைதானம் பேட்டிங்கிற்கு ஒத்துழைக்கும் என்பதால் இரு அணியிலும் பேட்டிங்கில் ரன் மழை பொழிய ஆர்வம் காட்டுவார்கள் என்று எதிர்பார்க்கலாம். மொத்தம் 5 போட்டிகள் கொண்டதாக இந்த டி20 தொடர் நடக்கிறது.

நாடு திரும்பிய வித்யா ராம்ராஜ்” பசங்களை ட்ரைனிங் பண்ணுங்க”அமைச்சர் விக்னேஷ் REQUEST

ABP NADU — Mon, 5 Oct 2026 17:50:52 +0530

நாடு திரும்பிய வித்யா ராம்ராஜ்” பசங்களை ட்ரைனிங் பண்ணுங்க”அமைச்சர் விக்னேஷ் REQUEST

வெஸ்ட் இண்டீஸ் தொடர் நிறைவு...கோலி, ரோஹித்தை மீண்டும் எப்போது பார்க்கலாம்?...

யோகேஷ் குமார் — Mon, 5 Oct 2026 16:36:22 +0530

வெஸ்ட் இண்டீஸ் அணிக்கு எதிரான ஒருநாள் தொடர் நிறைவடைந்துவிட்ட சூழலில், இந்திய அணியின் சீனியர் வீரர்களான விராட் கோலி மற்றும் ரோகித் சர்மா ஆகிய இருவரும் அடுத்ததாக எந்த தொடரில் விளையாடுவார்கள் என்ற எதிர்ப்பார்ப்பு ரசிகர்கள் மத்தியில் எழுந்துள்ளது.

ஒருநாள் போட்டிகளில் மட்டும் பங்கேற்பு

இந்தியாவின் முன்னாள் அணி தலைவர்களான விராட் கோலியும், ரோகித் ஷர்மாவும் கடந்த 2024 ஆம் ஆண்டு நடைபெற்ற டி-20 உலகக் கோப்பை தொடருக்கு பின் டி-20 போட்டிகளில் இருந்து ஓய்வை அறிவித்தனர். டெஸ்ட் போட்டிகளில் இருந்தும் இருவரும் ஓய்வு பெற்றுவிட்டதால், ஒருநாள் தொடர்களில் மட்டுமே அவர்களை இந்திய ஜெர்சியில் தற்போது ரசிகர்களால் பார்க்க முடிகிறது.

வெஸ்ட் இண்டீஸ் தொடர்

வெஸ்ட் இண்டீஸ் அணிக்கு எதிரான ஒருநாள் தொடரை இந்திய 2-1 என்ற கணக்கில் கைப்பற்றி உள்ள நிலையில், இந்திய ரசிகர்கள் அனைவருக்குமே இந்த ஒருநாள் தொடர் மறக்க முடியாத ஒன்றாக அமைந்துள்ளது. காரணம், சீனியர் வீரர்களான ரோகித் சர்மா மற்றும் விராட் கோலி இருவரும் இந்த தொடரில் அபாரமான ஆட்டத்தை வெளிப்படுத்தினர்.

இந்த ஒருநாள் தொடரில் விராட் கோலி ஒரு சதமும், ரோகித் சர்மா ஒரு சதம் மற்றும் அரைசதமும் விளாசினர். குறிப்பாக, ரோகித் சர்மா மற்றும் விராட் கோலியின் ஆட்டம் 2027 உலகக்கோப்பைக்கு தயாராகும் வகையில் அமைந்துள்ளது. இருவருமே ஒவ்வொரு ஒருநாள் தொடரிலும் ஒரு சதத்தை விளாசி தங்களின் ஃபார்மை நிரூபித்து கொண்டே இருக்கின்றனர்.

மீண்டும் எப்போது?

தற்போது வெஸ்ட் இண்டீஸ் அணிக்கு எதிரான தொடர் நிறைவடைந்துவிட்ட சூழலில், அடுத்ததாக எந்த தொடரில் இருவரையும் களத்தில் காண முடியும் என்ற ஏக்கத்தில் ரசிகர்கள் காத்துக்கிடக்கின்றனர். அதன்படி நம்பவர் 4ஆம் தேதி தொடங்க உள்ள நியூசிலாந்து அணிக்கு எதிரான ஒருநாள் தொடரில் விராட் கோலி மற்றும் ரோகித் ஷர்மா இருவரும் மீண்டும் களமிறங்குவார்கள் என எதிர்ப்பார்க்கப்படுகிறது. 5 போட்டிகள் கொண்ட இந்த தொடருக்கு ஸ்ரேயஸ் ஐய்யர் ஐய்யர் தலைமை தாங்குவார் எனவும் தகவல் வெளியாகியுள்ளது.

கடைசி ஆட்டம்

2027 ஆம் ஆண்டு நடைபெறவுள்ள ஒருநாள் உலகக் கோப்பை தொடருடன் இருவரும் சர்வதேச போட்டிகளில் இருந்து ஓய்வு பெறவுள்ளதாக கூறப்படும் நிலையில், அதற்கு இடையில் அவர்கள் விளையாடும் ஒவ்வொரு தொடரும் மிகுந்த கவனம் பெற்றுள்ளது. சுமார் 15 ஆண்டுகளுக்கும் மேலாக இந்திய அணிக்காக விளையாடி வரும் இருவரும் ஒரே சமயத்தில் ஓய்வை அறிவிக்கவுள்ளது ரசிகர்களை பெரும் சோகத்தில் ஆழ்த்தியுள்ளது. இருப்பினும், அதுவரை அவர்கள் விளையாடும் ஒவ்வொரு போட்டியையும் தவறாமல் பார்த்துவிட வேண்டும் என்ற ஆர்வத்தில் ரசிகர்கள் உள்ளனர்.

கோலாகலமாக நிறைவடைந்த ஆசிய விளையாட்டுகள்...இந்தியா படைத்த அற்புத சாதனைகள் என்ன?

யோகேஷ் குமார் — Sun, 4 Oct 2026 17:53:54 +0530

ஆசிய விளையாட்டு தொடரின் நிறைவு விழாவில் இந்திய வீராங்கனை நீரு தாண்டா தேசியக் கொடி ஏந்தி வலம் வந்தார்.

20-வது ஆசிய விளையாட்டு

ஜப்பானின் அய்ச்சி நகரில் கடந்த செப்டம்பர் 19ஆம் தேதி தொடங்கிய 20-வது ஆசிய விளையாட்டு தொடரில் இந்தியா, சீனா, ஜப்பான், தென் கொரியா, மலேசியா, பாகிஸ்தான் உள்ளிட்ட 45 நாடுகளை சேர்ந்த 11 ஆயிரம் வீரர், வீராங்கனைகள் பங்கேற்றனர். 16 நாட்கள் நடைபெற்ற இந்த விளையாட்டு தொடரில் பல்வேறு சாதனைகள் நிகழ்த்தப்பட்டுள்ளன.

இந்தியா படைத்த முக்கிய சாதனைகள்

நடப்பு ஆசிய விளையாட்டு தொடரில் இந்திய வீரர், வீராங்கனைகள் பல்வேறு வரலாற்று சாதனைகளை படைத்துள்ளனர். இந்திய ஆடவர் மற்றும் மகளிர் ஹாக்கி அணிகள் ஒரே தொடரில் தங்கம் வெல்வது இதுவே முதல்முறை. மேலும், 2028ஆம் ஆண்டு நடைபெறவுள்ள ஒலிம்பிக்ஸ் போட்டிக்கு இரு அணிகளும் நேரடியாக தகுதிப் பெற்றன.

வில்வித்தை போட்டியில் தனிநபர் ரீகர்வ் பிரிவில் தங்கம் வென்ற குங்குமம் மோஹோத் ஆசிய விளையாட்டில் தங்கம் வென்ற முதல் இந்திய பெண் என்ற வரலாற்று சாதனையை படைத்தார்.

தனிநபர் கோல்ஃப் பிரிவில் பிரணவி அர்ஸ் இந்தியாவிற்காக முதல் தங்கப் பதக்கத்தை கைப்பற்றினார்.

400 மீட்டர் தடை தாண்டும் ஓட்டப் பந்தயத்தில் வெண்கலம் வென்ற தமிழக வீராங்கனை வித்யா ராம்ராஜ், பந்தய தூரத்தை 54.75 வினாடிகளில் கடந்து பி.டி.உஷாவின் 42 ஆண்டுகால சாதனையை முறியடித்தார். அதேவேளையில், தங்கம், வெள்ளி, வெண்கலம் என 3 பதக்கங்களையும் அவர் இந்த தொடரில் கைப்பற்றினார்.

பெண்கள் ட்ராப் ஷூட்டிங் தனிநபர் பிரிவில் இந்தியாவின் நீரு தண்டா தங்கம் வென்று வரலாற்றுச் சாதனை படைத்துள்ளார். 48 ஆண்டுகால காத்திருப்புக்குப் பிறகு இந்தப் பிரிவில் இந்தியா தங்கம் வெல்வது இதுவே முதன்முறையாகும்.

4-வது இடத்தில் இந்தியா

21 தங்கம், 27 வெள்ளி, 37 வெண்கலம் என மொத்தம் 85 பதக்கங்களை கைப்பற்றிய இந்தியா, புள்ளிப்பட்டியலில் 4-வது இடத்தை பிடித்தது. 341 பதக்கங்களை குவித்த சீனா புள்ளிப்பட்டியலி முதல் இடத்தை பிடித்த நிலையில், ஜப்பான் மற்றும் தென் கொரியா அணிகள் முறையே 2 மற்றும் 3ஆம் இடங்களை பிடித்தது.

நிறைவு விழா

16 நாட்கள் விறுவிறுப்பாக நடைபெற்ற ஆசிய விளையாட்டு தொடர் இன்று (அக்.4) பிரம்மாண்டமாக நிறைவடைந்தது. நிறைவு விழாவில் துப்பாக்கி சூடுதல் வீராங்கனை நீரு தாண்டா இந்தியா சார்பில் தேசியக் கொடியை ஏந்தி வலம் சென்றார்.

அடுத்த தொடர் எப்போது?

21-வது ஆசிய விளையாட்டு தொடர் வருகிற 2030ஆம் ஆண்டு கத்தாரில் நடைபெறவுள்ள நிலையில், ஆசிய விளையாட்டு தொடரை நடத்துவதற்கான ஒலிம்பிக் கொடி கத்தாரிடம் ஒப்படைக்கப்பட்டது.

கட்டாய ராணுவ சேவையில் இருந்து விலக்கு... தென் கொரிய கால்பந்து அணிக்கு கிடைத்த பரிசு...

யோகேஷ் குமார் — Sun, 4 Oct 2026 11:30:35 +0530

ஆசிய விளையாட்டு : ஆடவர் கால்பந்து இறுதிப் போட்டியில் ஜப்பான் அணியை வீழ்த்தி தென் கொரியா அணி தங்கப் பதக்கத்தை வென்றது.

மோசமான உலகக் கோப்பை

ஜூன் மாதம் நடைபெற்ற 22-வது பிபா உலகக் கோப்பை கால்பந்து தொடர் தென் கொரியா அணிக்கு மிகவும் மோசமான ஒரு தொடராகவே அமைந்தது. மிகுந்த எதிர்ப்பார்ப்புக்கு மத்தியில் களமிறங்கிய அந்த அணி தென் ஆப்பிரிக்காவிடம் பெற்ற தோல்வியின் காரணமாக லீக் சுற்றிலேயே தொடரில் இருந்து வெளியேறியது. இந்த மோசமான செயல்பாடுகள் காரணமாக தென் கொரியா அணி மீது அந்நாட்டு ரசிகர்கள் மிகுந்த அதிருப்தியடைந்ததோடு, பல்வேறு விமர்சனங்களையும் முன்வைத்தார்.

சர்ச்சைகளை சந்தித்த தென் கொரிய அணி

உலகக் கோப்பை தொடரில் அடைந்த படுதோல்வி காரணமாக தென் கொரியா அணியும் அதன் பயிற்சியாளரான ஹாங் மியுங்-போ-வும் மிகுந்த விமர்சனங்களுக்கு ஆளாகினர். இதையடுத்து அவர் தனது பயிற்சியாளர் பதவியை ராஜினாமா செய்தார். தொடர்ந்து, அவர் சர்வதேச பெண் நடுவர்களுக்கு பாலியல் தொல்லை அளித்ததாக மீது பல்வேறு சர்ச்சைகளும் எழுந்தன. இதன் காரணமாக, தென்கொரியா கால்பந்து ஃபெடரேஷனின் தலைமை அலுவலகத்தில் காவல்துறையினர் சோதனையும் மேற்கொண்டானர். தொடர்ந்து, பயிற்சியாளர் ஹாங் மியுங்-போ மீதான குற்றச்சாட்டுகளுக்கு தென்கொரியா கால்பந்து ஃபெடரேன் மன்னிப்பு கோரியது.

மகிழ்ச்சி தந்த தங்கப் பதக்கம்

இத்தகைய சூழல்களை கடந்து ஜப்பானில் நடைபெற்ற ஆசிய விளையாட்டு தொடரில் தென் கொரியா அணி ஒரு புதிய உத்வேகத்துடன் களமிறங்கியது. தொடரின் தொடக்கத்தில் சிறப்பான ஆட்டத்தை வெளிப்படுத்திய அந்த அணி இறுதிப் போட்டிக்கு தகுதிப் பெற்றது. டோயோடா ஸ்டேயத்தில் நடைபெற்ற இறுதி போட்டியில் 1-0 என்ற கோல் கணக்கில் தொடரை நடத்தும் ஜப்பான் அணியை வீழ்த்தி நான்காவது முறையாக ஆசிய விளையாட்டில் தென் கொரியா கால்பந்து அணி தங்கப் பதக்கத்தை வென்றது. இதன்மூலம், உலகக் கோப்பைக்கு பிறகு துவண்டுக் கிடந்த ஒவ்வொரு தென் கொரியா கால்பந்து ரசிகர்கள் முகத்திலும் மகிழ்ச்சி திரும்பியுள்ளது.

ராணுவ சேவையில் இருந்து விலக்கு

தென் கொரியாவில் 18 வயதை கடந்த நல்ல உடல் தகுதிப் பெற்ற ஒவ்வொரு ஆணும் அந்நாட்டி ராணுவத்தில் கொஞ்சக் காலம் பணியாற்ற வேண்டும் என்பது சட்டம். ஆனால் ஆசிய கோப்பைகளில் பதக்கங்கள் வென்றால் அந்த கட்டாய பணியமர்த்தலில் இருந்து விலக்கு அளிக்கப்படும். அதன்படி தென் கொரியா கால்பந்து அணி ஆசிய விளையாட்டில் தங்கம் வென்றுள்ளதால் அந்த அணியில் இடம் பிடித்த அனைத்து வீரர்களுக்கும் கட்டாய ராணுவ சேவையில் இருந்து அந்நாட்டு அரசு விலக்கு அளித்து உத்தரவிட்டுள்ளது.