Ruturaj Gaikwad: மோசமான ஃபார்மில் சிஎஸ்கே கேப்டன்! காயம் காரணமாக விலகிய பராக்... கூப்பிட்ட பிசிசிஐ வாய்பை பயன்படுத்துவாரா ருதுராஜ்

Ruturaj Gaikwad: இலங்கையில் நடைபெறும் முத்தரப்புத் தொடருக்கான இந்திய 'ஏ' அணியில் ருதுராஜ் கெய்க்வாட் துணைக்கேப்டனாக நியமிக்கப்பட்டுள்ளார்

ருதுராஜ் கெய்க்வாட்

Source : PTI

இலங்கையில் நடைபெறவுள்ள முத்தரப்பு கிரிக்கெட் தொடருக்கான இந்திய 'ஏ' அணியில் ஒரு முக்கிய மாற்றத்தை இந்திய ஆண்கள் கிரிக்கெட் தேர்வுக் குழு அறிவித்துள்ளது. அணியின் நட்சத்திர வீரர் ரியான் பராக்கிற்கு ஏற்பட்ட காயம் காரணமாக, அவருக்குப் பதிலாக அனுபவ வீரர் ருதுராஜ் கெய்க்வாட் அணியில் சேர்க்கப்பட்டுள்ளார்.

காயம் காரணமாக விலகிய ரியான் பராக்

முதலில் அறிவிக்கப்பட்டிருந்த இந்திய 'ஏ' அணியில் ரியான் பராக் துணை கேப்டனாக நியமிக்கப்பட்டிருந்தார். ஆனால், துரதிர்ஷ்டவசமாக அவருக்கு ஏற்பட்ட தொடை தசைநார் காயம் காரணமாக, இந்த முத்தரப்புத் தொடர் முழுவதிலிருந்தும் அவர் விலகியுள்ளார் என்பதை தேர்வுக் குழு உறுதிப்படுத்தியுள்ளது.

அவர் கடைசியாக, ஐபிஎல் 2026-இன் தகுதிச்சுற்று 2 பிளேஆஃப் போட்டியில் குஜராத் டைட்டன்ஸ் அணிக்கு எதிராக ராஜஸ்தான் ராயல்ஸ் அணிக்காக விளையாடினார். சஞ்சு சாம்சன் சென்னை சூப்பர் கிங்ஸ் அணிக்கு மாறியதைத் தொடர்ந்து, ராஜஸ்தான் அணியின் முழுநேர கேப்டனாக நியமிக்கப்பட்ட பராக், 2022-க்குப் பிறகு தனது அணியை பிளேஆஃப் சுற்றுக்கு வழிநடத்தினார் என்பது குறிப்பிடத்தக்கது.

துணை கேப்டனாக ருதுராஜ் கெய்க்வாட்!

ரியான் பராக் விலகியதை அடுத்து, மகாராஷ்டிரா மற்றும் சிஎஸ்கே அணியின் முன்னணி பேட்ஸ்மேனான ருதுராஜ் கெய்க்வாட்டிற்கு இந்திய 'ஏ' அணியில் இடம் கிடைத்துள்ளது. அணியில் இணைந்தது மட்டுமன்றி, இந்தத் தொடருக்கான துணை கேப்டன் பொறுப்பையும் அவர் ஏற்பார்.

நடப்பு ஐபிஎல் சீசனில் சிஎஸ்கே கேப்டனான கெய்க்வாட்டிற்கு ஆரம்ப கட்டப் போட்டிகள் சற்று ஏமாற்றமளித்தாலும், தொடரின் இறுதிப் பகுதியில் சில முக்கியமான இன்னிங்ஸ்களை விளையாடி ஃபார்முக்கு திரும்பியுள்ளார். அவரது சர்வதேச மற்றும் உள்நாட்டுப் போட்டி அனுபவம், தொடரின் போது கேப்டன் திலக் வர்மாவுக்கு பெரும் பக்கபலமாக இருக்கும்.

இதையும் படிங்க: அண்ணன் கோலியும்.. தம்பி சிராஜும்..! கோப்பைக்காக நேருக்கு நேர் மோதல்!

 இளம் நட்சத்திரங்களின் பட்டாளம்

திலக் வர்மா தலைமையிலான இந்த இந்திய 'ஏ' அணியில் உள்நாட்டு கிரிக்கெட் மற்றும் ஐபிஎல் தொடர்களில் அசத்திய பல இளம் திறமைகள் இடம் பெற்றுள்ளனர். குறிப்பாக வைபவ் சூர்யவன்ஷி, பிரியான்ஷ் ஆர்யா மற்றும் ஆயுஷ் படோனி போன்ற வளர்ந்து வரும் இளம் நட்சத்திரங்கள் இந்த இலங்கை மற்றும் ஆப்கானிஸ்தான் அணிகளுக்கு எதிரான முத்தரப்புத் தொடரில் தங்கள் முத்திரையைப் பதிக்கக் காத்திருக்கின்றனர்.

 இந்திய 'ஏ' அணி விவரம்:

திலக் வர்மா (கேப்டன்), ருதுராஜ் கெய்க்வாட் (துணைக்கேப்டன்), பிரியான்ஷ் ஆர்யா, வைபவ் சூர்யவன்ஷி, ஆயுஷ் படோனி, நிஷாந்த் சிந்து, சூர்யன்ஷ் ஷெட்ஜ், பிரப்சிம்ரன் சிங் (WK), குமார் குஷாக்ரா (WK), விப்ராஜ் நிகம், யாஷ் தாக்கூர், யுத்வீர் சிங், அன்ஷுல் கான்போஜ், அனுக்குல் ராய்