Ishan Kishan: இடியாய் இடிக்கும் இஷான்..! இதான்டா கம்பேக் - சிக்ஸர் சிங்கம் கிஷன் 2.0!

டி20 உலகக்கோப்பையில் இந்திய அணியின் தொடக்க வீரராக களமிறங்கும் இஷான்கிஷன் தனது அதிரடியான ஆட்டத்தால் இந்தியாவின் வெற்றி வாய்ப்பை பிரகாசமாக்குகிறார்.

இஷான்கிஷன்

Source : twitter

டி20 உலகக்கோப்பை கிரிக்கெட் தொடர் விறுவிறுப்பாக நடந்து வருகிறது. இந்த தொடரில் இந்திய அணி இதுவரை தாங்கள் ஆடிய  3 போட்டிகளிலும் வெற்றி பெற்று சூப்பர் 8 சுற்றுக்கு முன்னேறியுள்ளது. 

மிரட்டும் இஷான்கிஷன்:

இந்திய அணியின் டி20 செயல்பாடு சமீபகாலங்களில் பாராட்டும் வகையிலே இருந்து வருகிறது. இந்த தொடருக்காக அறிவிக்கப்பட்ட அணியில் சுப்மன்கில் நீக்கப்பட்டு அவருக்கு பதிலாக இஷான்கிஷன் சேர்க்கப்பட்டார். பிசிசிஐ-யின் இந்த முடிவுக்கு ரசிகர்கள் பாராட்டு தெரிவித்தனர். 

அணியில் இடம்பெற்றது முதலே சிறப்பாக ஆடி வரும் இஷான்கிஷன், கடந்த 2021ம் ஆண்டு இந்திய அணிக்காக அறிமுகமானார். 2022 மற்றும் 2023ம் ஆண்டு வரை இந்திய அணியில் வாய்ப்பு பெற்று வந்த இஷான்கிஷனுக்கு கடந்த 2024 மற்றும் 2025ம் ஆண்டுகளில் அணியில் விளையாட வாய்ப்பு மறுக்கப்பட்டது. 

அசத்தல் பேட்டிங்:

பின்னர் உள்ளூர் போட்டிகளில் சிறப்பாக ஆடி இந்திய அணியில் இடம்பிடித்த இஷான்கிஷன் நியூசிலாந்து அணிக்கு எதிரான டி20 தொடரில் சிறப்பாக ஆடி தனது கம்பேக்கின் அவசியத்தை உணர்த்தினார். தற்போது டி20 உலகக்கோப்பையில் அபிஷேக் சர்மா மீது பலரும் எதிர்பார்ப்புடன் இருக்க, அவர் 2 போட்டிகளில் ஆடி 2 போட்டியிலும் டக் அவுட்டானார். ஆனால், இந்திய அணியின் துருப்புச்சீட்டாக இஷான்கிஷன் உருவெடுத்துள்ளார். 

இஷான் கிஷான் இதுவரை இந்திய அணிக்காக மொத்தமாக 39 டி20 போட்டிகளில் ஆடி 1169 ரன்களை எடுத்துள்ளார். அதில் 1 சதம், 9 அரைசதங்கள் அடங்கும். அதிகபட்சமாக 103 ரன்கள் எடுத்துள்ளார். 

இதில், 2021ம் ஆண்டு முதல் 2023ம் ஆண்டு வரை அதாவது அணியில் இருந்து நீக்கப்படுவதற்கு முன்பு வரை 32 டி20 போட்டிகளில் ஆடி 796 ரன்கள் எடுத்துள்ளார். அதில் 6 அரைசதங்கள் அடங்கும். அதிகபட்சமாக 89 ரன்கள் மட்டுமே எடுத்துள்ளார். அதில் 6 அரைசதங்கள் அடங்கும்.

கம்பேக்னா இதுதான் கம்பேக்:

அணியில் இருந்து 2 ஆண்டுகள் ஓரங்கட்டப்பட்ட நிலையில், இந்தாண்டு மீண்டும் அணிக்கு திரும்பினார். அணிக்கு திரும்பிய அவர் இதுவரை 7 டி20 போட்டிகளில் ஆடி 373 ரன்களை எடுத்துள்ளார். அதில் 1 சதங்கள் 3 அரைசதங்கள் அடங்கும். ஸ்ட்ரைக் ரேட் 215.60 ஆகும். சராசரி 53.28 ஆகும். 

நடப்பு டி20 உலகக்கோப்பையில் இதுவரை 3 போட்டிகளில் ஆடி 158 ரன்களை எடுத்துள்ளார். அதில் 2 அரைசதங்கள் அடங்கும்.  ஸ்ட்ரைக் ரேட் 197.50 ஆகும். 52.66 சராசரியாக வைத்துள்ளார். தனது கம்பேக்கில் தொடர்ந்து சிறப்பாக ஆடி வரும் இஷான்கிஷன் இந்திய அணியின் தவிர்க்க முடியாத வீரராக உருவெடுத்துள்ளார். 

இஷான் 2.0:

இந்த டி20 உலகக்கோப்பையில் இந்திய அணியின் எஞ்சிய போட்டிகளில் இஷான்கிஷனின் பேட்டிங் இந்தியாவின் வெற்றி வாய்ப்பை பிரகாசப்படுத்தும் என்றே எதிர்பார்க்கப்படுகிறது. பாகிஸ்தான் அணிக்கு எதிராக கொழும்பு மைதானத்தில் சூர்யகுமார் யாதவ், ஹர்திக் பாண்ட்யா, திலக் வர்மா, அபிஷேக் சர்மா ரன்கள் எடுக்க திணறிய நிலையில் அலட்சியமாக சிக்ஸரும், பவுண்டரியும் விளாசி ரன்களை இஷான்கிஷன் குவித்தார். இஷான்கிஷனின் இந்த செயல்பாடு இஷான் 2.0 என்று ரசிகர்கள் பாராட்டி வருகின்றனர்.