இந்தியா- நியூசிலாந்து அணிகளுக்கு இடையிலான இரண்டாவது டி20 போட்டி லக்னோவில் இன்று இரவு 7.30 மணிக்கு நடைபெறுகிறது. முதல் போட்டியில் இந்திய அணி 21 ரன்கள் வித்தியாசத்தில் தோல்வியை சந்தித்தது. இப்படிப்பட்ட கடினமான சூழ்நிலையில் இந்திய அணிக்கு இது வாழ்வா? சாவா? போட்டியாகும். 


ராஞ்சியில் நடந்த முதலாவது போட்டியில் இந்திய அணியின் பந்து வீச்சாளர்கள் ஏமாற்றத்தை கொடுத்தனர். கடைசி ஓவர் வீசிய அர்ஷ்தீப் சிங் 27 ரன்களை விட்டுகொடுத்தார். இதன்மூலம், நியூசிலாந்து அணி 176 ரன்கள் குவித்தது. இதுவே இந்திய அணியின் தோல்விக்கு முக்கிய காரணமாக இருந்தது. அதேபோல், வேகப்பந்து வீச்சாளர் உம்ரான் மாலிக் ஒரே ஓவரில் 16 ரன்களை விட்டுகொடுத்து ஏமாற்றம் அளித்தார். 


இஷான் - ஹூடாவின் தொடர் சொதப்பல்:


இரண்டாவது டி20 போட்டிக்கான இந்திய அணியின் சில மாற்றங்களை செய்ய வேண்டும் என ரசிகர்கள் எதிர்பார்த்து வருகின்றன. இந்திய அணியின் தொடக்க வீரர் இஷான் கிஷன் மற்றும் தீபக் ஹூடா கடந்த சில போட்டிகளாக ரன் எடுக்க திணறி வருகின்றன. வங்கதேசத்திற்கு எதிரான கடைசி ஒருநாள் போட்டியில் இரட்டை சதமடித்த இஷான் கிஷன், ஒருநாள் மற்றும் டி20 போட்டிகளில் கடந்த ஏழு இன்னிங்ஸ்களாக 37, 2, 1, 5, 8, 17 மற்றும் 4 ரன்களை மட்டுமே எடுத்துள்ளார். இஷான் கிஷன் கடைசியாக தென்னாப்பிரிக்கா அணிக்கு எதிராக கடந்த ஜூன் மாதம் அரைசதத்தை அடித்தார். 


அதேபோல், அயர்லாந்து அணிக்கு எதிராக கடந்த ஆண்டு டி20யில் சதமடித்த தீபக் ஹூடா, கடந்த 13 இன்னிங்ஸில் 17.88 சராசரியை மட்டுமே எடுத்துள்ளார். கடந்த வெள்ளிக்கிழமை நடந்த நியூசிலாந்துக்கு எதிரான டி20 போட்டியில் 10 பந்துகளை சந்தித்த ஹூடா 10 ரன்களை மட்டுமே எடுத்து வெளியேறினார். இந்த சூழ்நிலையில், இவ்வீரர்களுக்கு பதிலாக விக்கெட் கீப்பர் ஜிதேஷ் சர்மா மற்றும் பிரித்வி ஷா களமிறங்கலாம். இது நடந்தால், பிரித்வி ஷா ஓபனிங்கும், ஜித்தேஷ் சர்மா மிடில் ஆர்டரும் விளையாடுவார்கள். 


நம்பிக்கை அளித்த சூர்யா- சுந்தர்:


கடந்த போட்டியில் அதிரடி ஆட்டக்காரர் சூர்யகுமார் யாதவ் 46 ரன்களும், ஆல்-ரவுண்டர் வாஷிங்டன் சுந்தர் 50 எடுத்து நம்பிக்கை அளித்தனர். மற்ற வீரர்கள் யாரும் பெரிதாக சோபிக்கவில்லை. பந்துவீச்சிலும் சுந்தர் இரண்டு விக்கெட்களை வீழ்த்தினார். இந்தநிலையில், இரண்டாவது போட்டியில் வெற்றிபெற்று தொடரை கைப்பற்றும் முயற்சியில் நியூசிலாந்து அணி விரும்புகிறது. டேவான் கான்வே மற்றும் மிட்செல் ஆகியோர் சிறப்பான பார்மில் இருந்து வருவது இந்திய அணிக்கு பின்னடைவே. 


இந்திய டி20 அணி: ஹர்திக் பாண்டியா (கேப்டன்), சூர்யகுமார் யாதவ் (துணை கேப்டன்), இஷான் கிஷன் (விக்கெட் கீப்பர்), சுப்மன் கில், பிரித்வி ஷா, தீபக் ஹூடா, ராகுல் திரிபாதி, ஜிதேஷ் சர்மா (விக்கெட் கீப்பர்), வாஷிங்டன் சுந்தர், குல்தீப் யாதவ், யுசுவேந்திர யாதவ். , அர்ஷ்தீப் சிங், உம்ரான் மாலிக், சிவம் மாவி மற்றும் முகேஷ் குமார். 


நியூசிலாந்து டி20 அணி: மிட்செல் சான்ட்னர் (கேப்டன்), ஃபின் ஆலன், டெவோன் கான்வே (விக்கெட் கீப்பர்), க்ளென் பிலிப்ஸ், டேன் கிளீவர் (விக்கெட் கீப்பர்), மார்க் சாப்மேன், மைக்கேல் பிரேஸ்வெல், டேரில் மிட்செல், மைக்கேல் ரிப்பன், லாக்கி பெர்குசன், இஷ் சோதி, பிளேர் டிக் ஜேக்கப் டஃபி, ஹென்றி ஷிப்லி மற்றும் பென் லிஸ்டர்.