IND Vs WI ICC T20 Worldcup: இந்தியா மற்றும் மேற்கிந்திய தீவுகள் மோதும் போட்டி, கொல்கத்தா ஈடன் கார்டன் மைதானத்தில் இரவு 7 மணிக்கு தொடங்குகிறது.
அரையிறுதி டிக்கெட் யாருக்கு?
ஐசிசி டி20 உலகக் கோப்பையின் சூப்பர் 8 சுற்று இறுதி கட்டத்தை எட்டியுள்ளது. க்ரூப் 2 பிரிவிலிருந்து இங்கிலாந்து மற்றும் நியூசிலாந்து அணிகள் அரையிறுதிக்கு முன்னேறிவிட்டன. நேற்றைய போட்டியில் இலங்கை அணியை வீழ்த்தி இருந்தாலும், மோசமான ரன்ரேட் காரணமாக பாகிஸ்தான் தனது அரையிறுதி வாய்ப்பை இழந்தது. மறுமுனையில் க்ரூப் 1 பிரிவிலிருந்து தென்னாப்ரிக்கா அணி தனது அடுத்த சுற்றுக்கான வாய்ப்பை உறுதி செய்துவிட்டது. இந்நிலையில் கடைசியாக அரையிறுதிக்கு முன்னேறப்போகும் நான்காவது அணி யார் என்பதை தீர்மானிக்கும் முக்கியமான போட்டி இன்று நடைபெற உள்ள்து. இந்தியா மற்றும் மேற்கிந்திய தீவுகள் அணிகளுக்கு இடையேயான போட்டியில் வெற்றி பெறும் அணி, அரையிறுதிக்கு தகுதி பெற உள்ளது.
இந்தியா - மேற்கிந்திய தீவுகள் பலப்பரீட்சை:
கொல்கத்தாவில் உள்ள ஈடன் கார்டன் மைதானத்தில் உள்ளூர் நேரப்படி இரவு 7 மணிக்கு, இந்தியா மேற்கிந்திய தீவுகள் இடையேயான போட்டி தொடங்க உள்ளது. இதன் நேரலையை தொலைக்காட்சியில் ஸ்டார் ஸ்போர்ட்ஸ் அலைவரிசையிலும், ஒடிடியில் ஜியோ ஸ்டார் செயலியிலும் ரசிகர்கள் கண்டுகளிக்கலாம். இரு அணிகளும் இதுவரை சூப்பர் 8 சுற்றில் தலா இரண்டு போட்டிகளில் விளையாடி, ஒரு வெற்றி மற்றும் ஒரு தோல்வியை பதிவு செய்துள்ளன. ரன் ரேட் அடிப்படையில் மேற்கிந்திய தீவுகள் அணி முன்னிலையில் இருந்தாலும், இன்றைய போட்டியில் வெற்றி பெற்றால் 4 புள்ளிகளுடன் அரையிறுதிக்கு செல்லும் வாய்ப்பை இந்திய அணி கொண்டுள்ளது.
இந்திய அணியின் பலம், பலவீனம்..
இந்திய அணியின் பலம் மற்றும் பலவீனம் இரண்டுமே பேட்டிங் யூனிட்டிலேயே உள்ளது. ஒட்டுமொத்த தொடரில் சென்னை போட்டியிலேயே, ஓரளவிற்கு சுமாரான தொடக்கத்தை சூர்யகுமார் யாதவ் தலைமையிலான அணி கண்டது. அபிஷேக் அந்த ஒரு போட்டியில் மட்டுமே அதிரடியாக ரன் குவித்தார். சஞ்சு சாம்சன் வேகமாக ரன் குவித்தாலும், நிலைத்து நின்று ஆட வேண்டிய அவசியம் உள்ளது. அனுபவம் வாய்ந்த மூத்த வீரரான பாண்ட்யா இன்னும் பொறுப்புடன் செயல்பட்டால் அணி சரியான சமநிலையை எட்டக்கூடும். ஆல்ரவுண்டர்களான துணைகேப்டன் அக்சர் படேல் மற்றும் வாஷிங்டர் சுந்தரை பயன்படுத்துவதில் உள்ள குழப்பத்தை தீர்த்தால், வலுவான ப்லேயிங் லெவனை கட்டமைக்க கூடும். பந்துவீச்சு யூனிட்டி சூழலுக்கு ஏற்ப சிறப்பாகவே செயல்பட்டு வருகிறது. ஆனால், மிகவும் ஆழமான மற்றும் அதிரடியான பேட்டிங் ஆர்டரை கொண்டுள்ள மேற்கிந்திய தீவுகள் அணி, இன்று இந்திய அணியின்பவுலிங் தரத்தை சோதிக்க தயாராக உள்ளது.
புள்ளிப்பட்டியல்:
| அணிகள் | போட்டிகள் | வெற்றி | தோல்வி | புள்ளிகள் | ரன் ரேட் |
| தென்னாப்ரிக்கா | 2 | 2 | 0 | 4 | 2.890 |
| மேற்கிந்திய தீவுகள் | 2 | 1 | 1 | 2 | 1.791 |
| இந்தியா | 2 | 1 | 1 | 0 | -0.10 |
| ஜிம்பாப்வே | 2 | 0 | 2 | 0 | -4.475 |
இந்தியா - மேற்கிந்திய தீவுகள்: நேருக்கு நேர்
சர்வதேச டி20 போட்டிகளில் இரு அணிகளும் இதுவரை 30 போட்டிகளில் மோதியுள்ளன. அதில் இந்திய அணி 19 போட்டிகளிலும், மேற்கிந்தீய தீவுகள் அணி 10 போட்டிகளிலும் வெற்றி பெற்றுள்ளது. ஒரு போட்டியில் முடிவு ஏதும் எட்டப்படவில்லை.
ஈடன் கார்டன் மைதானம் எப்படி?
நடப்பு உலகக் கோப்பையிலேயே இரண்டு முறை 200-க்கும் அதிகமான ரன்கள் கொல்கத்தா ஈடன் கார்டன் மைதானத்தில் குவிக்கப்பட்டுள்ளது. பேட்டிங்கிற்கு சாதகமான இந்த ஆடுகளம் அதிகப்படியான ரன்களை குவிக்க தாராளமாக வாய்ப்புகளை வழங்குகிறது. ஆட்டத்தின் கடைசி கட்டத்தில் சுழற்பந்துவீச்சாளர்கள் தாக்கத்தை ஏற்படுத்த முடியும். ஆனால், பனிப்பொழ்விற்கும் வாய்ப்பு இருப்பதால், சேஸிங் செய்யும் அணி வெற்றி பெற அதிக வாய்ப்புள்ளது. மழைக்கு வாய்ப்பு ஏதும் இல்லை என்பதால், இன்றைய போட்டியில் எந்த குறுக்கீடும் இருக்காது.
உத்தேச பிளேயிங் லெவன்:
இந்தியா: சஞ்சு சாம்சன், இஷான் கிஷன், அபிஷேக் சர்மா, சூர்யகுமார் யாதவ் (கே), ஹர்திக் பாண்ட்யா, திலக் வர்மா, அக்சர் படேல், ஷிவம் துபே, வருண் சகரவர்த்தி, அர்ஷ்தீப் சிங், ஜஸ்பிரித் பும்ரா
மேற்கிந்திய தீவுகள் : சாய் ஹோப் (கேப்டன் & விக்கெட் கீப்பர்), பிராண்டன் கிங், ஷிம்ரான் ஹெட்மியர், ஷெர்ஃபேன் ரூதர்ஃபோர்ட், ரொமாரியோ ஷெப்பர்ட், ரோவ்மேன் பவல், ஜேசன் ஹோல்டர், அகீல் ஹொசைன், மேத்யூ ஃபோர்டு, குடகேஷ் மோதி, ஷமர் ஜோசப்