இந்திய கிரிக்கெட் அணியின் தலைமைப் பயிற்சியாளர் கௌதம் கம்பீர், முன்னாள் கேப்டன் எம்.எஸ். தோனிக்கு ஒரு சுவாரஸ்யமான சவாலையும் வாழ்த்தையும் விடுத்துள்ளார். சமீபத்தில் இந்தியா டி20 உலகக் கோப்பையை வென்றபோது, இன்ஸ்டாகிராமில் பதிவிட்ட தோனி, எப்போதும் சீரியஸாக இருக்கும் கம்பீரைப் பார்த்து, "பயிற்சியாளர் சார், உங்கள் முகத்தில் இந்தச் சிரிப்பு அழகாக இருக்கிறது" என்று கிண்டலாகப் பாராட்டியிருந்தார்.
தோனியின் வைரல் பதிவு
சுமார் இரண்டு ஆண்டுகளுக்குப் பிறகு இன்ஸ்டாகிராமில் பதிவிட்ட தோனி, இந்திய அணிக்கும், பயிற்சியாளர் குழுவிற்கும் தனது வாழ்த்துகளைத் தெரிவித்தார். அதில் கம்பீரை கிண்டல் செய்யும் விதமாக, "வரலாறு அகமதாபாத்தில் படைக்கப்பட்டுள்ளது. பயிற்சியாளர் சாப் (கம்பீர்), உங்கள் முகத்தில் புன்னகை அழகாக இருக்கிறது. தீவிரமான ஆட்டத்துடன் இந்த புன்னகை ஒரு 'கில்லர் காம்போ'. அருமை, மகிழுங்கள்" என்று பதிவிட்டிருந்தார். மேலும், பும்ராவைப் பற்றி எழுத வார்த்தைகளே இல்லை என்றும் அவர் குறிப்பிட்டிருந்தார்.
இதற்குப் பதிலளித்த கம்பீர், "சிரிப்பதற்கு இதைவிடப் பெரிய காரணம் என்ன இருக்க முடியும்? உங்களைப் பார்த்ததில் மகிழ்ச்சி" என்று பதிவிட்டிருந்தார்.
கம்பீரின் நெகிழ்ச்சியான பதில்
சமீபத்தில் நடைபெற்ற ஒரு நிகழ்ச்சியில் இது குறித்துப் பேசிய கம்பீர், தோனியின் இந்தச் செய்கை நெகிழ்ச்சியாக இருந்ததாகத் தெரிவித்தார். இதற்குப் பதிலளிக்கும் விதமாகப் பேசிய கம்பீர், "ஒருநாள் தோனி எனது இடத்தில் (பயிற்சியாளராக) அமர வேண்டும்; அப்போது இதேபோல ஒரு கருத்தை நான் அவருக்கு எழுத வேண்டும். அவரும் டக்-அவுட்டில் அமர்ந்து சிரிப்பதைப் பார்க்க ஆசைப்படுகிறேன்" என்று நெகிழ்ச்சியுடன் தெரிவித்துள்ளார். தோனி தன்னைச் சிரிக்க வைத்தது போலவே, எதிர்காலத்தில் தோனியும் பயிற்சியாளர் பொறுப்பில் இருந்து அதே புன்னகையுடன் வெற்றியை ரசிக்க வேண்டும் என்பதே கம்பீரின் விருப்பமாக உள்ளது.